Saludsod

● Apay a masapul nga ipaay iti espesial nga asikaso maipapan iti panagkawes ken panaglanglangatayo no bumisitatayo kadagiti sanga nga opisina iti Sosiedad?

Ti kawes ken langatayo iti amin a tiempo ti masapul nga iyanninagna iti dignidad a maikari kadagiti adipen ni Jehova. Pudno daytoy nangruna no bumisitatayo iti Bethel. Ti Organisado a Mangitungpal ti Ministeriotayo a libro komentuanna iti panagkasapulan ti pisikal a kinadalus ken natakneng a panagkawes no mapantayo iti tay-ak ken iti gimong. Kalpasanna, iti panid 131, parapo 2, kunaenna: “Kasta met laeng ti agaplikar no bumisbisitatayo iti pagtaengan a Bethel idiay Brooklyn wenno iti aniaman kadagiti sanga nga opisina ti Sosiedad. Laglagipenyo, ti nagan a Bethel kayatna a sawen ket “Balay ti Dios,” gapuna ti kawestayo, ti buok ken kababalintayo ti umas-asping koma iti manamnama kadatayo no tumabtabunotayo kadagiti gimgimong a maipaay iti panagdaydayaw idiay Kingdom Hall.”

Nakuna ni Pablo a datayo ket “maysa a bubuyaen iti teatro ti lubong.” (1 Cor. 4:9) Gapuna a ti panagkawes ken panagbubuoktayo isut’ masapul a positibo nga impluensia iti dadduma no maipapan iti pudno a panagdayaw. Nupay kasta, madlaw kadagiti dadduma a kakabsat, a no bumisitada iti Bethel, ket agparangda a subra ti kinagagangay iti panagkawesda. Dagita a panagkawes ti saan a maiparbeng no sumarungkarkayo kadagiti pasilidad iti sanga. Iti daytoy a banag, kayatmi a masalimetmetan iti nangato a pagalagadan a mangilasin kadagiti tattao ti Dios a naiduma manipud iti lubong babaen ti panangaramid iti amin a bambanag a maipaay iti dayag ti Dios. (Roma 12:2; 1 Cor. 10:31) Naimbag met a banag no makasao dagidiay estudiantetayo ti Biblia ken dagiti sabsabali a bumisita iti Bethel ti umuna a daras tapno palagipan ida nga ipaayda iti asikaso maipapan ti umiso a panagkawes ken panagaruat.

No ngarud ta bumisitakayo kadagiti pasilidad ti Sosiedad, saludsodanyo ti bagbagiyo: ‘Ti kadi kawes ken langak ket natakneng? (Mik. 6:8) Naimbag ngata ti maisilnagna iti Dios a pagdaydayawak? Masaktan aya dagiti dadduma iti panaglanglangak?’ Sapay koma ta kanayon a “maarkosan ti sursuro iti Manangisalakantayo, ti Dios, iti amin a bambanag” babaen iti panagkawes ken panaglanglangatayo.—Tito 2:10.