Pudno ti Sao ti Dios
1. Ania a napateg nga impormasion ti linaon ti Biblia?
1 “Ti kababagas ti saom ket kinapudno,” insurat ti salmista. (Sal. 119:160) Babaen ti naipaltiing a Saona, impaay ni Jehova dagiti makapnek a sungbat dagiti napateg unay a saludsod iti biag. Liwliwaen ken ikkanna iti namnama dagidiay mariribukan. Ken ipakitana kadatayo no kasanotay a makaadani kenkuana. Kinuna ti maysa a manangipateg a babai: “Ti pannakaammo iti kinapudno a linaon ti Biblia ket mayarig iti panangpanaw iti nakasipsipnget ken makapaladingit a lugar ken iseserrek iti nalawag, naraniag, ken makaay-ayo a siled.” Ikagkagumaanyo kadi nga iranud ti kinapudno a linaon ti Sao ti Dios iti amin a gundaway?
2. Kasano a mapasayaat ti Biblia ti kabibiag dagiti tattao?
2 Adda Bilegna a Mangbalbaliw ken Makaawis iti Amin: Adda bileg ti kinapudno a linaon ti Biblia a mangtukay iti puso ken mangbalbaliw iti biag. (Heb. 4:12) Maysa ni Rosa nga agkabannuag a babai a naigamer idi iti prostitusion, kasta met iti panaginum ken panagdroga. Kinunana: “Naminsan idi napukawanakon iti namnama, adda agassawa a Saksi a nagkuna kaniak a makatulong ti Biblia a mangrisut kadagiti parikuttayo. Rinugiak ti nagadal iti Sao ti Dios, ket naayatanak iti dayta. Kalpasan ti makabulan, naaddaanak iti tured a mangbalbaliw iti kabibiagko. Ita ta addan panggep ti biagko, diakon kasapulan ti agpannuray iti alkohol wenno droga. Ket yantangay tarigagayak unay ti agbalin a gayyem ni Jehova, determinadoak nga agbiag a mayannurot kadagiti pagalagadanna. No saan a gapu iti praktikal a sirib iti Sao ti Dios, masiguradok a nagpakamatayak koman.”—Sal. 119:92.
3. Apay a ditay koma bumdeng a mangiranud iti mensahe ti Biblia kadagiti sabsabali?
3 Saan a kas iti kaaduan a libro ita, makaawis ti Biblia kadagiti tattao iti ‘amin a nasion, tribu, ili, ken pagsasao.’ (Apoc. 7:9) Pagayatan ti Dios a “maisalakan koma dagiti amin a kita ti tattao ken dumtengda iti umiso a pannakaammo iti kinapudno.” (1 Tim. 2:4) Gapuna, pulos a ditay koma ipagarup a saan nga ipangag ti maysa a tao ti naimbag a damag gapu laeng iti kasasaadna. Imbes ketdi, iranudyo ti mensahe ti Pagarian iti amin, nga usarenyo a direkta ti Biblia no mabalin.
4. Kasanotay a mausar ti Biblia no mangaskasabatayo?
4 Itampokyo ti Kasuratan: Adu dagiti gundaway a mausartayo ti Biblia iti ministerio. No mangitukon kadagiti magasin, iramanyo ti teksto nga agparang iti naisingasing a presentasion. No usarenda ti literatura a maitukon iti naituding a bulan, natakuatan dagiti dadduma nga epektibo ti panangibasa iti napili a teksto iti introduksionda. No sumarungkar, ibasayo ti maysa wenno ad-adu pay a teksto iti Biblia iti tunggal gundaway tapno matulongan ti bumalay nga in-inut a makagun-od iti umiso a pannakaammo. No mangikondukta iti panangyadal iti Biblia, ipamaysayo a pagsaritaan dagiti napateg a teksto. Adda koma Biblia a madadaan nga usarenyo no maaddaankayo iti gundaway a mangasaba iti di pormal a pamay-an.—2 Tim. 2:15.
5. Apay nga ikagumaantay koma nga usaren ti Biblia iti ministeriotayo?
5 Sapay koma ta tulongantayo dagiti dadduma a magunggonaan iti mangbalbaliw a bileg ti kinapudno a linaon ti Sao ti Dios babaen ti panangusar iti Biblia iti tunggal maitutop a gundaway iti ministeriotayo.—1 Tes. 2:13.