Itantandudoyo Kadi ti Sao ti Dios?
1 Iti lubong a masansan a saan a mamatpati iti Biblia, dagiti pudno a Kristiano sireregta nga itantandudoda ti Sao ti Dios. Gapu ta kombinsidotayo nga “amin a Kasuratan impaltiing ti Dios,” umanamongtayo ken Jesu-Kristo a nangpaneknek iti Biblia babaen ti kararagna ken Jehova: “Ti saom ket kinapudno.” (2 Tim. 3:16; Juan 17:17) Kasano a sieepektibo a maitandudotayo ti Sao ti Dios?
2 Adalentayo ti Kasuratan: Awan duadua a siaanep nga inadal ni Jesus ti Sao ti Dios. Iti intero a ministeriona, daytoy ti nakatulong kenkuana a nangisuro manipud iti Kasuratan. (Luc. 4:16-21; 24:44-46) Kasano a makabesadotayo ti adu a teksto? Maaramidtayo dayta babaen ti inaldaw a panangbasa iti Biblia ken panangutob iti maysa a bersikulo a nangnangruna a makaparegta wenno makatulong iti ministerio. No agisaganatayo kadagiti gimong, nasken a kitaen ken basaentayo a mismo manipud iti Biblia dagiti naisitar a teksto ken nalabit mangisaganatayo iti komento maipapan kadagita. No tumabunotayo kadagiti gimong ket adda dagiti teksto nga ibasa ti ispiker, surotentayo ti pannakaibasana iti Bibliatayo. Ti panangadal kadagiti teksto iti Biblia isagananatayo a ‘mangaramat a siuumiso iti sao ti kinapudno.’—2 Tim. 2:15.
3 Ibasatayo ti Biblia: No makiramantayo iti ministerio, masapul nga ibasatayo ti Biblia. Kas pagarigan, no ipalubos ti kasasaad, ikagumaantayo ti mangiranud iti teksto iti bumalay. No agsaludsod wenno sumupiat, kasayaatan nga usarentayo ti Biblia a mangted iti sungbat. No okupado ti bumalay, makairanudtayo latta iti maysa a teksto iti Biblia babaen ti panangibagatayo, “Sakbay a pumanawak, kayatko koma nga iranud kenka daytoy a teksto.” No posible, direkta nga ibasayo ti Biblia iti wagas a makita met ti bumalay ti basbasaenyo.
4 Kastoy ti kinuna ti maysa a bumalay idi naipabasa kenkuana dagiti teksto a mangbalusingsing iti Trinidad: “Nabayagen a makimismisaak ngem diak nga ammo kastoy ti ibagbaga ti Biblia!” Isu ket immanamong a mayadalan iti Biblia. Kinuna ni Jesus a dagiti karnerona imdenganda ti timekna. (Juan 10:16, 27) Ti kasayaatan a pamay-an tapno dagiti napudno ti panagpuspusoda a tattao mabigbigda ti kinapudno ket ti pannakabasada iti dayta manipud iti Kasuratan. Gapuna, itandudotayo ngarud ti kinapudno ti Sao ti Dios!