Panangasaba iti Agbaliwbaliw a Lubong
1 Anian a nagpartak nga agbaliw dagiti bambanag! Mabalin a pagsasaritaan ita dagiti tattao ti didigra, krisis iti ekonomia, napolitikaan a riribuk, wenno agdinamag a trahedia. Nupay kasta, mabalin nga agbaliw met a dagus ti pakaseknan dagiti tattao. (Ara. 17:21; 1 Cor. 7:31) Iti daytoy agbaliwbaliw a lubong, kasanotay a maala ti atension dagiti tattao tapno mairanudtayo kadakuada ti mensahe ti Pagarian?
2 Ammuenyo Dagiti Pakaseknanda: Ti maysa a pamay-an tapno maala ti atension dagiti tattao ket babaen ti panangdakamat kadagiti agdama a pasamak. Idi ginutugot ni Jesus dagiti agdengdengngeg kenkuana a sipapasnek a panunotenda ti takderda iti imatang ti Dios, naminsan dinakamatna dagiti nabiit pay a napasamak a trahedia a pagaammoda. (Luc. 13:1-5) Kasta met, no ipakaammotayo ti naimbag a damag, nasayaat no mangdakamattayo iti kaudian a damag wenno lokal nga isyu a paginteresan dagidiay adda iti teritoriatayo. Nupay kasta, no mapagsasaritaan dagita a banag, masapul nga annadantayo nga awan dasigantayo kadagiti napolitikaan wenno sosial nga isyu.—Juan 17:16.
3 Kasanotay a maammuan no ania ti agdama a pampanunoten dagiti tattao? Nalabit a ti kasayaatan a pamay-an ket babaen laeng ti panagsaludsod ken panagimdeng. (Mat. 12:34) Ti pannakaseknan kadagiti tattao tignayennatayo nga umimdeng iti panangmatmat dagiti sabsabali ken sitataktika nga agsaludsod pay. Ti ibagbaga ti maysa a bumalay mabalin nga ipalgakna no ania ti pakaseknan dagiti adu iti lugarda ken mabalin a manglukat dayta iti gundaway a mangasaba.
4 Panangisagana iti Presentasion: Iti panagsaganatayo a mangasaba iti agbaliwbaliw a lubong, mabalintay nga usaren ti libro a Panakirinnason. Dagiti makatulong a singasing no kasano nga iraman dagiti agdama a pasamak iti presentasiontayo ket nailanad iti panid 10-11, iti babaen ti “Krimen/Kinatalged” ken “Agdama a Paspasamak.” Kasta met laeng nga impormasion ti masarakan iti Setiembre 2000 a Ti Ministeriotayo iti Pagarian, panid 4. No isagsaganayo ti presentasionyo, siguraduenyo nga iraman ti maysa a maitutop a teksto.
5 Bayat a palpaliiwentayo dagiti agbaliwbaliw a pakaseknan dagidiay adda iti teritoriatayo, nasken nga iyatadaytayo ti pamay-antayo a mangipakaammo iti naimbag a damag. Iti kasta a wagas, makasaritatayo dagiti tattao maipapan kadagiti banag a pakaseknanda unay. Iti kasta, adu pay ti matulongantayo a mangammo iti Daydiay di agbaliwbaliw dagiti kualidad ken pagalagadanna.—Sant. 1:17.