Agtutubo—Ipasdekyo ti Nasayaat a Pundasion Para iti Masanguanan
1. Apay a nasken a patanoren dagiti agtutubo a Kristiano ti natibker a pammati?
1 Ania ti kapatgan iti panunotmo? Ania ti pampanunotem? Kangrunaan kadi a pakaseknam dagiti bambanag iti agdama, wenno ti masanguanan ken dagiti kari ti Dios? (Mat. 6:24, 31-33; Luc. 8:14) Kasapulan ti natibker a pammati tapno makapagtalekka kadagiti kari ti Dios, kas makita kadagiti ulidan da Abraham ken Moises. (Heb. 11:8-10, 24-26) Kasanom a mapatanor ti kasta a pammati ken kasanoka a makaipasdek “iti nasayaat a pamuon maipaay iti masanguanan”?—1 Tim. 6:19.
2. Ania ti maadaltayo iti ulidan ni Ari Josias?
2 Birokem ni Jehova: Makomendaran no adda rutinam iti naespirituan nga aktibidad a kaduam ti pamiliam. Ngem dimo koma ipapan a ti kasta a rutina automatiko a patanorenna ti natibker a pammati. Tapno masarakam “ti mismo a pannakaammo iti Dios,” masapul a personal a birokem ni Jehova. (Prov. 2:3-5; 1 Cron. 28:9) Kasta ti inaramid ni agtutubo nga Ari Josias. Uray no dimmakkel iti saan a nasayaat a naespirituan a kasasaad, “rinugianna a biroken ti Dios ni David nga amana” idi 15 pay laeng ti tawenna.—2 Cron. 34:3.
3. Kasano a dagiti agtutubo a Kristiano ita mabirokanda ni Jehova?
3 Kasanom a biroken ni Jehova? Babaen ti siaannad a panangsukimatmo iti patpatiem ken ‘panangpaneknekmo iti bagim’ no talaga met la a pudno dayta. (Roma 12:2) Kas pagarigan, mailawlawagmo kadi no ania ti kuna ti Biblia maipapan iti dara wenno mapaneknekam kadi a ti Pagarian ti Dios ket nangrugin nga agturay idiay langit idi 1914? Ti pananggun-od “iti umiso a pannakaammo iti kinapudno” ket nagpateg iti panangipasdek iti nasayaat a pundasion para iti masanguanan.—1 Tim. 2:3, 4.
4. Kasano a maiparangarang dagiti di bautisado nga agibumbunannag ti panagrang-ayda?
4 Nasayaat ti resulta ti panangbirok ni Josias iti Dios. Sakbay nga agtawen iti 20, situtured nga inikkatna iti ilina ti ulbod a panagdayaw. (2 Cron. 34:3-7) Umasping iti dayta, maiparangarang ti naespirituan a panagrang-aymo babaen dagiti aramidmo. (1 Tim. 4:15) No maysaka a di bautisado nga agibumbunannag, pagreggetam a parang-ayen ti kalidad ti ministeriom. Saanka koma a mapnek iti basta panagitukon laeng iti literatura. Aramidem a kalat ti panangusar iti Biblia, pannakirinnason kadagiti tattao, ken panangsukay iti interes dagiti nabirokam nga interesado. (Roma 12:7) Matulongannaka daytoy a rumang-ay iti naespirituan.
5. Ania dagiti oportunidad a silulukat kadagiti bautisado a Kristiano tapno mapalawada ti ministerioda?
5 Ipaaymo ti Kasayaatan ken ni Jehova: No agpabautisarka kas simbolo ti dedikasionmo ken ni Jehova, agbalinka nga ordinado a ministro ti Dios. (2 Cor. 3:5, 6) Daytoy ti mangted kenka kadagiti oportunidad nga agserbi ken ni Jehova iti amin a tiempo. Karaman kadagitoy ti panagpayunir, panagserbi iti pagtaengan a Bethel, panagmisionero, ken panagboluntario iti internasional a serbisio. Ti sabali pay a pamay-an tapno mapalawam ti ministeriom ket babaen ti panagsursurom iti sabali a pagsasao wenno iyaakar iti lugar nga addaan iti dakdakkel a panagkasapulan.
6. Kasanotayo amin a maipasdek ti nasayaat a pundasion para iti masanguanan?
6 Siempre, saan nga amin ket magundawayanda dagitoy a pribilehio iti serbisio, ngem tunggal maysa kadatayo maipaayna ti kasayaatan ken ni Jehova. (Mat. 22:37) Aniaman ti kasasaadmo, ti panagserbi ken ni Jehova ti ipamaysam iti biagmo. (Sal. 16:5) No aramidem dayta, mangibangbangonka iti nasayaat a pundasion para iti masanguanan.