Makapabang-ar ti Komendasion
1 “Saanak kadi a nasingpet ita nga aldaw?” insaibbek ti ubing a babai iti pagiddaanna. Nakigtot ni nanangna iti dayta a saludsod. Nupay napaliiwna nga iti dayta nga aldaw ket nakasingsingpet ti anakna, naliwayanna a kinomendaran. Dagiti lua dayta nga ubing ipalagipna a datayo amin—ubing man wenno nataengan—kasapulantayo ti komendasion. Pabpabang-arantayo kadi dagiti dadduma babaen ti panangkomendar kadagiti nasayaat nga aramidda?—Prov. 25:11.
2 Adu dagiti panggapuantayo a mangkomendar kadagiti padatayo a Kristiano. Dagiti panglakayen, ministerial nga adipen, ken payunir igagaedda a tungpalen dagiti rebbengenda. (1 Tim. 4:10; 5:17) Dagiti managbuteng-Dios a nagannak ar-aramidenda ti amin a kabaelanda a mangpadakkel iti annakda kadagiti dalan ni Jehova. (Efe. 6:4) Dagiti Kristiano nga agtutubo ikagkagumaanda a sarangten “ti espiritu ti lubong.” (1 Cor. 2:12; Efe. 2:1-3) Dagiti dadduma simamatalek nga agserserbida ken ni Jehova nupay lumallakaydan, addaanda kadagiti an-annayen, wenno maipaspasangoda iti dadduma pay a parikut. (2 Cor. 12:7) Maikarida amin a makomendaran. Komkomendarantay kadi ti panagreggetda?
3 Personal ken Espesipiko: Pudno a maragsakantayo amin a makangngeg iti komendasion manipud iti plataporma. Nupay kasta, ad-adda a makapabang-ar ti komendasion no personal a maiturong kadatayo. Kas pagarigan, iti kapitulo 16 ti suratna kadagiti taga Roma, espesipiko nga inyebkas ni Pablo ti komendasionna maipapan kada Febe, Prisca ken Aquila, Trifena ken Trifosa, Persida, ken dadduma pay. (Roma 16:1-4, 12) Anian a makapabang-ar dagiti saona kadagitoy a matalek a kakabsat! Ti kasta a pammadayaw ipatalgedna kadagiti kakabsattayo a kasapulantay ida ken pagbalinennatayo a nasingsinged iti tunggal maysa. Adda kadi personal a kinomendaranyo a kabsat itay nabiit?—Efe. 4:29.
4 Naimpusuan: Tapno pudno a makapabang-ar, masapul a naimpusuan ti komendasion. Madlaw dagiti tattao no naimpusuan ti ibagbagatayo wenno ‘mamaspasablog laeng babaen iti dila.’ (Prov. 28:23) No ruamentayo a kitaen dagiti nasayaat a galad dagiti sabsabali, matignay ti pusotayo a mangkomendar. Sapay koma ta naparaburtayo a mangted iti naimpusuan a komendasion, ta ammotayo a “ti sao iti umiso a tiempona O anian a nagsayaat!”—Prov. 15:23.