Mangipakita iti Personal nga Interes—Babaen ti Panangted iti Komendasion
1 Ti napasnek a komendasion paregtaenna dagiti tattao, gutugotenna ida nga agtignay, ken mangyeg iti rag-o kadakuada. Natakuatan ti adu nga agibumbunannag nga uray ababa laeng ti maited a napasnek a komendasion, masansan a makatulong dayta tapno dumngeg dagiti tattao a masarakanda iti ministerio. Kasanotayo a makomendaran dagiti tattao bayat nga iranranudtayo kadakuada ti naimbag a damag?
2 Agbalinkayo a Nasiput: Kalpasan ti panagsubli ni Jesu-Kristo idiay langit, napaliiwna ti nasayaat nga aramid ti pito a kongregasion idiay Asia Menor. (Apoc. 2:2, 3, 13, 19; 3:8) Umasping iti dayta, ti napasnek a pannakaseknan kadagiti tattao a masarakantayo iti ministerio ti mangtignay kadatayo a mangbirok kadagiti gundaway a mangted iti komendasion. Kas pagarigan, mabalintayo ti mangted iti komendasion no mapaliiwtayo ti nadalus nga arubayan, ti maysa a nagannak a sidudungngo a mangas-asikaso kadagiti annakna, ken ti nainggayyeman nga isem ken kablaaw ti bumalay. Sisasaganakayo kadi nga agpaliiw ken manggundaway kadagiti kasta nga oportunidad?
3 Dumngegkayo a Naimbag: No kasabaanyo dagiti sabsabali, awisenyo ida a mangyebkas iti kapanunotanda babaen ti panangyimtuodyo kadagiti maitutop a saludsod. Padayawanyo ida babaen ti panangimdengyo a naimbag iti ibagada. (Roma 12:10) Nalabit nga adda maibagada a mabalin a pangkomendaranyo a sipapasnek kalpasanna, pagsaritaanyo ti punto a pagnumuanyo.
4 Usarenyo ti Pannakaawat: Ania ti aramidenyo no adda maibaga ti bumalay a saan a maitunos iti kinapudno iti Biblia? Imbes a supiatenyo ti di umiso a kapanunotanna, apresiarenyo ti imbagana sa kunaenyo, “Madlawko nga interesadokayo iti daytoy a banag.” (Col. 4:6) Uray no mannakisupiat ti bumalay, masansan a mabalintayo a komendaran ti napasnek a panaginteresna iti topiko. Ti kasta a naalumamay a pamay-an mapaluknengna ti rikna ti maysa a tao a kasla bumusbusor iti naimbag a damag.—Prov. 25:15.
5 Tapno makaparegta ti itedtayo a komendasion, nasken a napasnek dayta. Pakaidayawan ni Jehova ti panangusar iti kasta a makapabileg a sasao ken maguyugoyna dagiti sabsabali a dumngeg iti mensahe maipapan iti Pagarian.