Panagbalin a Nasinged ken ni Jehova

1. Ania ti nabigbig ti maysa a kabsat maipapan iti naespirituan a rutinana?

¹ “Ag-20 a tawenen nga addaak iti kinapudno babaen laeng ti pannakigimong ken panangasaba,” inamin ti maysa a Kristiano a babai. Nupay kasta, intuloyna: “Nautobko a nupay napateg dagita a banag, saan nga umdas dagitoy a mangsustiner kaniak kadagiti narigat a kasasaad. . . . Mabigbigko itan a nasken a baliwak ti panagpampanunotko ken irugik a pagbalinen a makagunggona ti panagadalko tapno pudno a maam-ammok ni Jehova ken masursurok nga ayaten ken ipateg ti impaay ti Anakna kadatayo.”

2. Apay a nasken a patanoren ti nasinged a relasion ken ni Jehova?

² Nasken ti panagregget iti panangpatanor iti nasinged a relasion ken ni Jehova. Saan nga umdas ti basta regular a panangaramid iti Nakristianuan nga aktibidad. No ditay agkararag a kanayon ken ni Jehova, mabalin a kaslanto laengen dati a nasinged a gayyem a nabayagen a ditay nakasarita ti pagbalinanna kadatayo inton agangay. (Apoc. 2:4) Usigentayo no kasano a ti personal a panagadal iti Biblia ken panagkararag matulongannatayo nga agbalin a nasinged ken ni Jehova.—Sal. 25:14.

3. No maipapan iti personal a panagadal, ania ti aramidentayo tapno sumingedtayo iti Dios?

³ Napateg ti Panagkararag ken Panagmennamenna: Saan laeng a basta pananguged kadagiti kangrunaan a punto iti mapagadalan a material ken panangbasa kadagiti nadakamat a teksto ti ramanen ti personal a panagadal a mangsustiner iti puso. Masapul a panunotentayo no ania ti ipalgak ti impormasion maipapan kadagiti dalan, pagalagadan, ken galad ni Jehova. (Ex. 33:13) Ti pannakatarus kadagiti naespirituan a banag apektaranna ti rikriknatayo ken tignayennatayo a mangutob iti biagtayo. (Sal. 119:35, 111) Ti panggep ti personal a panagadal ket tapno sumingedtayo ken ni Jehova. (Sant. 4:8) Ti napasnek a panagadal kalikagumanna ti panawen ken maitutop a kasasaad, ket ti regular a panagadal kalikagumanna ti disiplina. (Dan. 6:10) Uray no adu ti pakakumikomanyo, inaldaw kadi nga iwaywayaanyo nga utoben dagiti nakaskasdaaw a galad ni Jehova?​—Sal. 119:147, 148; 143:5.

4. Kasano a ti panagkararag mainaig iti personal a panagadal tulongannatayo nga agbalin a nasinged ken ni Jehova?

⁴ Ti naimpusuan a panagkararag ket napateg a paset ti makagunggona a personal a panagadal. Tapno matukayna ti pusotayo ken magutugotnatayo dagiti kinapudno a linaon ti Biblia a ‘mangipaay iti sagrado a panagserbi iti Dios buyogen ti nadiosan a buteng ken panagamak,’ kasapulantayo ti nasantuan nga espiritu ti Dios. (Heb. 12:28) Gapuna, irugitayo ti tunggal panagadal babaen ti panagdawat iti espiritu ni Jehova. (Mat. 5:3) No utobentayo dagiti Kasuratan ken usarentayo dagiti katulongan iti panagadal nga impaay ti organisasion ni Jehova, lukluktantayo ti pusotayo ken ni Jehova. (Sal. 62:8) Paset ti panagdayaw ti kastoy a panagadal. Babaen iti dayta, mayebkastayo ti debosiontayo ken ni Jehova ken sumingedtayo kenkuana.—Jud. 20, 21.

5. Apay a nasken nga inaldaw nga utobentayo ti Sao ti Dios?

⁵ Kas iti amin a relasion, masapul a mataripato a kanayon ti relasiontayo ken ni Jehova tapno agtultuloy a rumangpaya iti unos ti panagbiagtayo. Sapay koma ngarud ta inaldaw a gundawayantayo ti umadani iti Dios, ta ammotayo nga umadaninto met kadatayo.—Sal. 1:2, 3; Efe. 5:15, 16.