Panangbirok Kadagiti Maikari

¹ Makakarit dagiti pammilin ni Jesus maipapan iti panangitungpaltayo iti trabaho a panangasaba. Kinunana: “Iti aniaman a siudad wenno purok a serkanyo, birokenyo no siasino iti dayta ti maikari.” (Mat. 10:11) Ita ta manmano laengen a madanon dagiti tattao kadagiti pagtaenganda, kasanotayo a sieepektibo a biroken dagidiay maikari?

² Usigem ti Teritoriam: Umuna iti amin, usigem ti teritoriam. Kaano nga adda dagiti tattao iti pagtaenganda? Sadino ti ayanda iti agmalem? Adda kadi aniaman nga aldaw iti lawas wenno oras iti aldaw a mabalin a nalaklaka ida a makasarita? Mabalin a nasaysayaat ti resultana no ibagaymo ti ministeriom kadagiti rutina ken kasasaad dagiti tattao iti teritoriam.—1 Cor. 9:23, 26.

³ Naballigi ti panagbirok ti adu nga agibumbunannag bayat ti sardam. Kadagita nga oras, nawaywaya ken sidadaan a dumngeg dagiti dadduma a bumalay. No agtudtudo ken dika makaruar gapu iti layus, mabalin nga epektibo ti panangasaba babaen ti telepono wenno panagsurat. Ti panangasaba iti lugar ti negosio ken kadagiti publiko a lugar ket sabali pay a pamay-an tapno maidanonmo ti naimbag a damag kadagiti tattao.

⁴ Bayat iti bulan ti naisangsangayan a trabaho, inyurnos ti maysa a kongregasion ti mangasaba iti mumalmalem ti Sabado ken Domingo ken kadagiti rabii ti Mierkoles ken Biernes. Inyurnosda pay ti mangasaba babaen ti telepono ken nangasabada iti lugar ti negosio. Dagitoy nga urnos pinarayrayna ti panagreggetda iti ministerio isu nga inkeddeng ti kongregasion nga itultuloyda dagitoy.

⁵ Ganetgetam ti Agsarungkar: No saanmo a kanayon a madanon dagiti tattao iti pagtaenganda no agsarungkarka, mangibagaka iti espesipiko nga aldaw ken oras ti panagsublim sakbay nga agpakadaka tunggal sumarungkarka, agraman iti damo a panagsaritayo. Kalpasanna, siguraduem a tungpalem dayta. (Mat. 5:37) No mabalin, dawatem ti numero ti teleponona. Makatulong met daytoy tapno makasaritamto manen ti bumalay.

⁶ Sigurado a bendisionan ni Jehova ti naanep a panagreggettayo a mangbirok kadagiti maikari ken mangsukay iti interes dagiti tattao.—Prov. 21:5.