‘Ayatenyo ni Jehova, Dakayo Amin a Nasungdo’
Marambakan ti Ipapatay ni Jesus Inton Abril 4
1 Adu a tawenen ti napalabas, idi a ti Ukraine ket adda iti sidong ti Komunista a turay, dagiti autoridad siiinget a siniputanda dagiti kakabsat—nangruna no umad-adani ti aldaw ti Pangrabii ti Apo—agsipud ta namnamaenda a maduktalanda ti pakaangayanna. Daytoy ti kanayon a parikut, tangay dagiti autoridad mapattapattada ti petsa ti Memorial. Ania ti inaramid dagiti kakabsat? Malaylayus ti sirok ti balay ti maysa a kabsat a babai. Tangay saan nga ipagarup dagiti autoridad a sadiay ti pagtataripnongan dagiti tattao, nangikabil dagiti kakabsat iti plataporma a nangatngato ngem iti pagattumeng a danum. Nupay agrukobda nga agtugaw iti plataporma iti sirok ti nababa a bobida, awan ti nangsinga kadakuada bayat a siraragsak ti kongregasion a nangrambak iti Memorial.
2 Ti determinasion dagiti kakabsattayo idiay Ukraine a mangtungpal iti bilin a manglaglagip iti ipapatay ni Jesus ket maysa a naisangsangayan a panangiparangarang iti ayatda iti Dios. (Luc. 22:19; 1 Juan 5:3) No maipasangotayo kadagiti tubeng, maparegtatayo koma kadagiti kasta nga ulidan ken determinadotayo a tumabuno iti pannakarambak ti Pangrabii ti Apo inton Abril 4. No aramidentayo daytoy, ipakpakitatayo nga umanamongtayo iti karirikna ti salmista a nangikanta: “O ayatenyo ni Jehova, dakayo amin a nasungdona.”—Sal. 31:23.
3 Tulonganyo Dagiti Sabsabali a Mangparayray iti Ayatda iti Dios: Ti ayattayo iti Dios tignayennatayo met a mangawis kadagiti sabsabali a makipagrambak iti pananglaglagip iti ipapatay ni Jesus. Ti suplemento ti Pebrero a Ti Ministeriotayo iti Pagarian pinaregtana ti tunggal maysa kadatayo a mangilista kadagidiay planotayo nga awisen iti Memorial. Siaanep kadi a sarsarungkaran ken aw-awisenyo ti tunggal tao nga inlistayo? Ilawlawagyo a naimbag kadakuada ti kinapateg dayta nga okasion. Mabalin a maparegtada a tumabuno no siaanus nga ipalagipyo kadakuada ti aldaw ken oras ti Memorial ken no maitutop, kaduaenyo ida.
4 Iti pakaangayan ti Memorial, ikagumaanyo nga abrasaen a nangnangruna dagidiay naawis a timmabuno, ken ipariknayo kadakuada a maawatda. Kasanoyo a matulongan ida a mangparayray iti ayatda ken ni Jehova? Madadaankayo koma a mangsungbat kadagiti saludsodda. Sisasaganakayo koma a mangitukon iti panagadal iti Biblia no ipalubos ti kasasaad. Awisenyo ida a tumabuno kadagiti linawas a gimongtayo iti kongregasion. Dagiti panglakayen nangnangruna nga asikasuenda dagiti tumabuno a di aktibo a Kristiano. Mabalin nga iyurnosda a sarungkaran ken paregtaen ida a makitimpuyog manen iti kongregasion, a nalabit ipaganetgetda nga ad-adda dagiti punto a naidatag iti palawag ti Memorial.—Roma 5:6-8.
5 Panangpauneg iti Mismo nga Ayattayo ken ni Jehova: Ti panangutob iti sagut a subbot mapaunegna ti ayattayo ken ni Jehova ken iti Anakna. (2 Cor. 5:14, 15) Kinuna ti maysa a kabsat a nabayagen a tumabtabuno iti Memorial: “Padpadaananmi ti Memorial. Ad-adda a naisangsangayan daytoy iti kada tawen. Malaglagipko a nakatakderak iti puneraria 20 a tawenen ti napalabas, a matmatmatak ti patpatgek nga ama, ket ad-adda a maapresiarko ti naipaay a subbot. Sakbay a natay ni tatangko, maysa laeng dayta nga impormasion. Ammok amin a teksto maipapan iti subbot ken mailawlawagko dagita! Ngem idi laeng nariknak ti epekto ti ipapatay a nagrag-o unay ti pusok gapu iti maaramid kadatayo ti nagpateg a subbot.”—Juan 5:28, 29.
6 Bayat nga umad-adani ti aldaw a pannakarambak ti Memorial iti daytoy a tawen, isaganayo a naimbag ti pusoyo iti daytoy nga okasion. (2 Cron. 19:3) Utobenyo ti nayeskediul a naisangsangayan a panagbasa iti Biblia iti lawas ti Memorial, a naibalabala iti Panangsukimat Kadagiti Kasuratan iti Inaldaw—2004 ken iti 2004 Calendar. Kaay-ayo dagiti dadduma a repasuen ti kapitulo 112-16 iti libro a Katan-okan a Tao bayat ti panagadal ti pamiliada. Dagiti dadduma mangaramidda iti kanayonan a panagsukimat babaen ti panangusarda kadagiti dadduma pay a katulongan iti panagadal nga ipapaay ti klase matalek ken masirib nga adipen. (Mat. 24:45-47) Datayo amin, mabalin a sipapasnek nga ikararagtayo ti sagut a subbot. (Sal. 50:14, 23) Wen, bayat daytoy a panawen ti Memorial, itultuloytayo koma nga utoben ti ayat ni Jehova kadatayo ken mangbiroktayo kadagiti pamay-an a mangiparangarang iti ayattayo kenkuana.—Mar. 12:30; 1 Juan 4:10.