Tulongan ni Jehova Dagiti Agtalek Kenkuana
1 Para kadagiti adu a tattao, ti balligi ket agpannuray iti kuarta, pannakabalin, ken abilidad. (Sal. 12:4; 33:16, 17; 49:6) Ngem kadagidiay agbuteng ken agtalek ken ni Jehova, ipanamnama ti Biblia nga “isu ti saranayda ken kalasagda.” (Sal. 115:11) Usigentayo ti dua a benneg a maipakitatayo ti panagtalek ken ni Jehova.
2 Kas Kristiano a Ministro: Masapul nga agpannuraytayo iti Diostayo no adda pasettayo iti kongregasion wenno no mangisurotayo iti tay-ak ti ministerio. Usigenyo ti ulidan ni Jesus. Nupay isu ti Anak ti Dios, saan a nagpannuray iti bukodna a sirib wenno abilidad no di ket naan-anay a nagpannuray iti nailangitan nga Amana. (Juan 12:49; 14:10) Anian nga ad-adda a kasapulantayo ti agpannuray iti Dios! (Prov. 3:5-7) Babaen laeng ti tulong ni Jehova a ti nanumo a gapuanantayo ket mangyeg iti pakaidayawanna ken pakagunggonaan ti dadduma.—Sal. 127:1, 2.
3 Maipakitatayo ti panagpannuraytayo ken ni Jehova babaen ti panangikararag iti panangiwanwanna ken iti tulong ti nasantuan nga espirituna. (Sal. 105:4; Luc. 11:13) Maysa pay, maipakitatayo ti panagtalektayo iti Dios no naibatay iti Biblia dagiti isursurotayo. Adda bileg ti mensahena a mangtignay kadagiti puso ken mamagbalbaliw iti biag dagiti tattao. (Heb. 4:12) Maipadayag ni Jehova no ‘agserbitayo a kas agpampannuray iti bileg nga ipaay ti Dios.’—1 Ped. 4:11.
4 Panangtaming Kadagiti Parikut: Masapul met nga agpatulongtayo ken ni Jehova no maipasangotayo kadagiti pakarigatan ken parikut. (Sal. 46:1) Kas pagarigan, mabalin a dinatay palubosan nga agbakasion ti amotayo tapno tumabuno iti asamblea, wenno nalabit maipasangotayo iti maysa a narigat a kasasaad iti pamilia. Agtalektayo ken ni Jehova babaen ti napasnek a panagkararag kenkuana ken panagpaidalan iti Sao ken organisasionna. (Sal. 62:8; 119:143, 173) Iti kasta, mapasaran dagiti adipen ni Jehova ti tulongna.—Sal. 37:5; 118:13, 16.
5 Ni Jehova a mismo ti mangipanamnama kadatayo: “Bendito ti nabaneg a lalaki a mangikabil ti panagtalekna ken Jehova, ket ni Jehova ti nagbalin a pagkammatalkanna.” (Jer. 17:7) Sapay koma ta ipakitatayo ti panagtalektayo kenkuana iti amin nga aramidentayo!—Sal. 146:5.