Kasapulan ti Tulongmo
1 “Pagyamanan iti amin a tulongyo kadakami. Talaga a nagunggonaankami.” Dayta a komento maitutop nga iyebkasna ti panagyamantayo kadagiti panglakayen ken ministerial nga adipen. Bayat nga agtultuloy a dumakdakkel ti organisasion ti Dios, agtultuloy met ti panagkasapulan kadagiti nataengan a lallaki nga agserbi iti agarup 100,000 a kongregasion iti intero a lubong. No maysaka a bautisado a kabsat a lalaki, kasapulan ti tulongmo.
2 “Iraragpat”: Kasano a maragpatmo dagiti kanayonan a pribilehio iti serbisio? (1 Tim. 3:1) Babaen ti panangipaay iti nasayaat nga ulidan iti amin nga aspeto ti panagbiagmo. (1 Tim. 4:12; Tito 2:6-8; 1 Ped. 5:3) Makiramanka a naan-anay iti trabaho a panangasaba, ken tulongam dagiti dadduma a mangaramid met iti kasta. (2 Tim. 4:5) Maaddaanka iti napasnek a pannakaseknan iti pagimbagan dagiti kapammatiam. (Roma 12:13) Siaanep nga adalem ti Sao ti Dios, ken patanorem ti ‘arte ti panangisuro.’ (Tito 1:9; 1 Tim. 4:13) Sigaganetget nga asikasuem dagiti annongen nga intalek kenka dagiti panglakayen. (1 Tim. 3:10) No maysaka nga ulo ti pamilia, ‘idauluam ti bukodmo a sangakabbalayan iti nasayaat a pamay-an.’—1 Tim. 3:4, 5, 12.
3 Ti pannakadutok kas ministerial nga adipen wenno panglakayen ramanenna ti napinget a panagtrabaho ken kalikagumanna ti kinamanagsakripisio. (1 Tim. 5:17) Gapuna, no ragpatem dagitoy, ipamaysam ti agserbi a sipapakumbaba kadagiti sabsabali. (Mat. 20:25-28; Juan 13:3-5, 12-17) Usigem ti kababalin ni Timoteo, ken ikagumaam a tuladen. (Fil. 2:20-22) Kas kenkuana, bay-am a ti nasayaat a kababalinmo ti mangirekomenda kenka. (Ara. 16:1, 2) Bayat a patpatanorem dagiti naespirituan a kualidad a kasapulan iti panangtaming kadagiti kanayonan a pribilehio ken iyaplikarmo ti aniaman a balakad a tumulong kenka a rumang-ay, ‘maiparangarang ti panagrang-aymo iti amin a tattao.’—1 Tim. 4:15.
4 Nagannak, Sanayenyo Dagiti Ubbing a Tumulong: Mabalin a mangrugin nga agsursuro a tumulong dagiti annak manipud iti kinaubingda. Sanayenyo ida a dumngeg kadagiti gimong, mangasaba, ken agbalin a mapagulidanan iti kababalin iti Kingdom Hall ken iti eskuelaan. Sursuruanyo ida a makiraman iti panagserbi kadagiti sabsabali, kas koma iti itutulong nga agdalus iti Kingdom Hall, panangsaranay kadagiti natataengan, ken dadduma pay. Bay-anyo a mapasaranda ti ragsak nga itden ti panangted. (Ara. 20:35) Makatulong kadakuada ti kasta a pannakasanay tapno agbalindanto a payunir, ministerial nga adipen, ken panglakayen iti masanguanan.