Saludsod

◼ Ania ti kasayaatan a pamay-an ti panangted iti donasion nga agpaay kadagiti agkasapulan a kakabsat kadagiti sabali a pagilian?

No dadduma, madamagtayo nga adda kakabsat iti sabali a pagilian nga agkasapulan iti material a tulong gapu iti pannakaidadanes, didigra, wenno dadduma pay a narigat a kasasaad. Adda dagiti kakabsat a mangipatulod iti kuarta a direkta kadagiti sanga nga opisina kadagita a pagilian. Mabalin a kiddawenda a ti kuarta ket mausar a pangtulong kadagiti indibidual, iti kongregasion, wenno iti naituding a proyekto a panagibangon.—2 Cor. 8:1-4

Nupay makomendaran ti kasta a naayat a pannakaseknan kadagiti kapammatian, masansan nga adda dagiti nagangganat a panagkasapulan ngem iti pampanunoten ti nagdonar. No dadduma, ti kayat a tulongan ti nagdonar ket naasikason. Siempre, makapagtalektayo a no maipatulod dagiti donasion iti lokal a sanga nga opisina para iti sangalubongan a trabaho, Kingdom Hall Fund, wenno pangsaranay kadagiti biktima ti didigra, dagiti maidonar ket mausar sigun iti kiddaw ti nagdonar.

Dagiti amin a sanga nga opisina ket nasanay a naimbag nga agtignay a dagus kadagiti di ninamnama a panagkasapulan dagiti kakabsat. Iti amin a kaso, ti sanga kanayon a pakaammuanna ti Bagi a Manarawidwid maipapan kadagita a banag. No kasapulan ti kanayonan a tulong, ti Bagi a Manarawidwid mabalin nga awisenna a tumulong dagiti asideg a sanga wenno direkta a maipatulod dagiti pondo nga aggapu iti hedkuarter.—2 Cor. 8:14, 15.

Gapuna, amin a donasion a nairanta nga agpaay iti sangalubongan a trabaho, proyekto a panagibangon kadagiti sabali a pagilian, wenno pangsaranay kadagiti biktima ti didigra ket maipatulod koma iti sanga nga opisina iti pagilian a pagnanaedanyo, babaen man iti kongregasion wenno direkta. Iti kasta, “ti matalek ken masirib nga adipen,” babaen dagiti urnos ti organisasion nga impasdek ti Bagi a Manarawidwid, maipaayna iti naurnos a pamay-an ti kasapulan dagiti kakabsat iti sangalubongan.—Mat. 24:45-47; 1 Cor. 14:33, 40.