Kasanotayo a Makatulong?
1 No madamag dagiti Saksi ni Jehova nga adda didigra a napasamak iti dadduma a paset ti lubong, masansan nga iyimtuodda: “Kasanotayo a makatulong?” Kas naisalaysay iti Aramid 11:27-30, dagiti Kristiano idi umuna a siglo nangipaayda iti tulong kadagiti kakabsat nga agnanaed idiay Judea gapu iti nakaro a bisin.
2 Iti panawentayo, ti karta ti organisasiontayo ipalubosna ti pannakausar ti pondo a pangtulong kadagiti agsagsagaba gapu kadagiti natural wenno aramid ti tao a didigra ken kadagiti dadduma pay a tiempo ti panagkasapulan.
3 Kas pagarigan, idi napan a tawen adu a kakabsat ti nangipaay iti pinansial a tulong kadagiti naapektaran iti tsunami, wenno aluyo, iti Abagatan nga Asia, agraman ti bagyo a Katrina iti abagatan nga Estados Unidos. Maapresiar unay daytoy a pannakipagrikna babaen ti panangipatulod kadagiti donasion a mapan iti pondo ti organisasion a mausar a pangsaranay. Ngem no dinakamat ti nagdonar no kaano ken ania nga espesipiko a kalamidad ti pakausaran ti donasionna, kalikaguman ti linteg iti dadduma a pagilian nga iti dayta laeng a panggep a mausar ti pondo, uray no dagiti kasapulan dagiti kakabsat ket mabalin a naasikason.
4 Gapuna, maisingasing a dagiti donasion a pangtulong kadagiti nadidigra maiturongda koma iti sangalubongan a trabaho. Mausar dayta a pondo a pangtulong kadagiti nadidigra ken para kadagiti naespirituan a kasapulan dagiti Kristiano a kakabsat. No kayat ti maysa a ti donasionna a pangtulong kadagiti nadidigra ket saan a maitipon kadagiti kontribusion para iti sangalubongan a trabaho gapu iti sumagmamano a rason, kaskasdi a maawat dayta ken mausar a pangtulong kadagiti agkasapulan iti sadinoman a lugar. Nupay kasta, maapresiar no saan nga iyespesipiko ti nagdonar no ania ti pakausaran ken no kasano ti pannakausar ti donasionna.
5 Ti makagapu no apay nga iturongtayo dagiti donasion a nangnangruna iti sangalubongan a trabaho ket tapno ad-adu ti pondo a mausar mainaig iti amin a benneg ti trabaho ti Pagarian imbes a nakareserba laeng dayta kadagiti agkasapulan iti tulong iti masanguanan. Maitunos daytoy iti kababagas ti Efeso 4:16, nga agtrabahotayo a sangsangkamaysa a mangipaay no ania ti kasapulan “maipaay iti idadakkel ti bagi maipaay iti mismo a pannakapabilegna iti ayat.”