Tumultulongkayo Kadi iti Panagsaranay?

Wen, masansan a tumulong dagiti Saksi ni Jehova no adda didigra. Mangipapaaykami iti praktikal a tulong kadagiti Saksi ken saan a Saksi. Maitunos dayta iti bilin ti Biblia iti Galacia 6:10: “Aramidentayo koma ti naimbag kadagiti amin, ngem nangnangruna kadagidiay nainaig kadatayo iti pammati.” Ikagkagumaanmi met ti mangipaay iti emosional ken naespirituan a tulong a kasapulan unay dagiti biktima ti didigra.—2 Corinto 1:3, 4.

Panangorganisar

Kalpasan ti didigra, dagiti panglakayen kadagiti kongregasion iti lugar a nadidigra ikagkagumaanda a kontaken dagiti kameng ti kongregasion tapno maammuanda no natalgedda wenno no ania a tulong ti kasapulanda. Kalpasanna, ireport dagiti panglakayen iti sanga nga opisina dagiti Saksi ni Jehova ti resulta ti surbey ken ti naipaaydan a tulong.

No saan a kabaelan nga ipaay dagiti kongregasion iti dayta a lugar ti kasapulan a tulong, ti Bagi a Manarawidwid dagiti Saksi ni Jehova ti mangyurnos no kasano a maipaay dagita. Umasping dayta iti panagtitinnulong dagiti nagkauna a Kristiano idi adda napasamak a bisin. (1 Corinto 16:1-4) Ti sanga nga opisina iti dayta a lugar ket mangdutok kadagiti Disaster Relief Committee a mangorganisar ken mangiwanwan iti panagsaranay. Tumultulong met dagiti Saksi iti dadduma a lugar babaen ti panangipaayda iti tiempo ken sanikuada.—Proverbio 17:17.

Pondo

Ti maysa kadagiti pakaus-usaran dagiti donasion a maipatpatulod kadagiti sanga nga opisina dagiti Saksi ni Jehova ket ti panangtulong kadagiti biktima ti didigra. (Aramid 11:27-30; 2 Corinto 8:13-15) Yantangay boluntario dagiti agtrabtrabaho, ti nailatang a pondo ket mausar amin iti panagsaranay saan a pangsueldo kadagiti mangiwanwanwan. Us-usarenmi a naimbag dagiti amin a donasion.—2 Corinto 8:20.