Ti Panawen ti Memorial—Tiempo ti Naganetget nga Aktibidad
1. Ania ti epektona kadagiti managbuteng iti Dios nga Israelita dagiti naipanapanawen a piesta?
1 Kadagiti naituding a tiempo ti tawen, dagiti Israelita idi un-unana rinambakanda ti “naipanapanawen a piesta ni Jehova.” (Lev. 23:2) Ti panangiwayada iti tiempo a mangutob iti kinaimbag ti Diosda ket nagbanag iti dakkel a rag-o ken nanggutugot kadakuada nga agbalin a naregta iti nasin-aw a panagdayaw.—2 Cron. 30:21–31:2.
2, 3. Apay a maitutop a palawaentayo ti naespirituan nga aktibidadtayo iti panawen ti Memorial, ken kaano a rambakantayo ti Memorial?
2 Iti moderno a panawen, tinawen a rumayrayray ti naragsak a teokratiko nga aktibidadtayo no panawen ti Memorial. Daytoy ti panawen a panangutobtayo a naimbag iti di magatadan a sagut nga impaay kadatayo ni Jehova—ti bugbugtong nga Anakna. (Juan 3:16; 1 Ped. 1:18, 19) Bayat nga utobentayo ti ayat nga impakita ti Dios ken ti Anakna, matignaytayo a mangidayaw ken ni Jehova ken mangikagumaan a mangaramid iti pagayatanna.—2 Cor. 5:14, 15.
3 Iti daytoy a tawen, marambakan ti Pangrabii ti Apo inton Huebes, Marso 24, kalpasan ti ilelennek ti init. Yantangay adda espesial a panagiwarastayo iti broshur nga Agtultuloyka nga Agbantay! inton Marso 21 agingga iti Abril 17, nangnangruna a tarigagayantayo ti agtitinnulong iti dayta a tiempo. Kasano a mapalawatayo ti pannakiramantayo iti ministerio iti bulan ti Marso, Abril, ken Mayo?
4, 5. (a) Ania ti nakatulong kadagiti dadduma a mangidanon iti naimbag a damag kadagiti ad-adu pay a tattao? (b) Ania ti nakitam nga epektibo iti lugaryo?
4 Panangdanon iti Ad-adu Pay a Tattao: No makiramankayo iti serbisio iti tay-ak, mangbirokkayo kadagiti pamay-an a mangdanon iti adu a tattao aginggat’ mabalin. Maiplanoyo kadi ti makiraman iti trabaho a panagbalaybalay no ad-adu a tattao ti adda iti pagtaenganda, kas iti mumalem wenno iti rabii? No iti grupo ti panagadalyo iti libro ket adda mayat a makiraman iti serbisio sakbay ti panagadal, mabalin a mangyurnos ti manangaywan iti panagadal iti libro iti ababa a taripnong sakbay ti panangasaba tapno mabalinda ti mangasaba iti asideg a teritoria.
5 Ti sabali pay a pamay-an tapno madanon ti adu a tattao ket babaen ti panangasaba kadagiti publiko a lugar. Kayat ti maysa a kabsat a babai idiay Japan ti ag-auxiliary pioneer uray no isu ket addaan iti amin-tiempo a trabaho. Insingasing ti maysa a panglakayen a tunggal aldaw sakbay a mapan iti panggedanna, mabalinna ti mangasaba iti lansangan nga asideg iti estasion ti tren. Naparmekna ti kinamanagbabainna ken ti panangumsi ti dadduma a pasahero, ket naaddaan iti ruta ti magasin nga agdagup iti agarup 40 a tattao, a pakairamanan dagiti sumagmamano a pasahero, agtartrabaho iti estasion ti tren, ken kadagiti makinkukua kadagiti pagtagilakuan nga adda iti asideg. Agpromedio iti 235 a magasin ti binulan a naipaimana. Babaen ti panangiranudna kadagiti Nainkasuratan a punto kadagiti tattao iti sumagmamano la nga oras iti kada aldaw, nakairugi iti innem a panangyadal iti Biblia.
6. Kasano a mapalawa dagiti agtutubo ti naespirituan nga aktibidadda?
6 Dagiti Gundaway a Mangasaba: Bayat ti Marso, Abril, ken Mayo, agbakasion iti eskuelaan ti kaaduan kadagiti ages-eskuela nga agibumbunannag. Nasayaat dagitoy a tiempo tapno ag-auxiliary pioneer. Mainayon pay, dagiti Kristiano nga agtutubo mapalawada ti aktibidadda babaen ti panangasabada iti eskuelaan. Mabalin a maklaatka no maammuam a dagiti kaklasem ket interesado kadagiti patpatiem. Apay a dimo gundawayan ti mangasaba bayat dagiti saritaan iti klase wenno pagsuratennakayo iti salaysay ti mannursuroyo? Adu ti nakaaramiden iti kasta babaen ti panangusarda kadagiti video-tayo. Nakairugi pay dagiti dadduma kadagiti panangyadal iti Biblia kadagiti kaklaseda ken natulonganda ida nga agdedikar ken agpabautisar. Nagsayaat dagitoy a pamay-an a ‘mangidayaw iti nagan ni Jehova.’—Sal. 148:12, 13.
7. (a) Kasano a ginundawayan ti maysa a kabsat a lalaki dagiti oportunidad a mangasaba? (b) Adda kadi umasping a kapadasanyo?
7 Iti inaldaw a rutinam, mangbirokka kadagiti pamay-an tapno maisaritam kadagiti tattao ti maipapan iti nakaim-imbag a Diostayo ken kadagiti nakaskasdaaw a karina. Inaldaw nga agluglugan iti tren ti maysa a kabsat a lalaki, ket kadagita a gundaway kasabaanna dagiti padana a pasahero no maitutop. Kas pagarigan, iti maysa nga estasion bayat ti panagur-urayna iti sumaruno a tren, inaldaw a kinaskasabaanna iti agarup lima a minuto ti maysa nga agtutubo a lalaki. Kas resultana, ti agtutubo a lalaki ken ti katrabahuanna immanamongda nga agadal iti Biblia. Naikondukta ti panagadal iti Biblia bayat a nakaluganda iti tren. Di nagbayag, ti maysa a baket a dumdumngeg iti saritaanda inasitganna ti kabsat ket kiniddawna a mayadalan iti Biblia. Tinagiragsakna met ti panagadalna bayat dagiti aldaw a panagluganna iti tren. Iti daytoy a pamay-an, sangapulo a panagadal iti Biblia ti naikondukta ti kabsat bayat a nakalugan iti tren.
8. Ania a pamay-an ti panangasaba ti makatulong kadagidiay limitado ti kabaelanna gapu iti kinalakay ken kinabaket wenno kinakapuy ti salun-at tapno ad-adu ti maaramidanda iti ministerio?
8 Kasanon no limitado ti kabaelanyo gapu iti kinalakay ken kinabaket wenno kinakapuy ti salun-at? Adda dadduma pay a pamay-an tapno ad-adu ti maaramidanyo a mangidayaw ken ni Jehova. Napadasanyo kadin ti nangasaba babaen ti telepono? No saanyo nga ammo no kasano nga aramiden daytoy, ibagayo iti manangaywan iti panagadal iti libro. Mabalin nga iyurnosna ti pannakikadua kadakayo dagiti agibumbunannag a mangar-aramid iti daytoy a pamay-an. No agkaduakayo, makasursuro ken makapagtinnulongkayo a mangasaba iti epektibo a pamay-an. Masarakan dagiti nasayaat a singasing no kasano ti mangasaba babaen ti telepono iti Pebrero 2001 a Ti Ministeriotayo iti Pagarian, panid 5-6.
9. Kasano a matulongantayo dagiti iyad-adalantayo iti Biblia tapno agbalinda a kualipikado a makikadua iti kongregasion a mangasaba iti publiko?
9 No tumabunoda iti Memorial, mabalin a magutugot dagiti kabbaro a mangparayray iti panangidayawda ken ni Jehova. Matulonganyo ida a mangdaer iti aniaman a panagamakda a makiraman iti pormal a panangasaba babaen ti panangisalaysayyo kadagiti makaparegta a kapadasan iti panagserbi iti tay-ak ken babaen ti in-inut a panangsanayyo kadakuada a mangilawlawag kadagiti sursuro ti Biblia ken mangidepensa iti pammatida. (1 Ped. 3:15) No ibaga ti estudiante iti Biblia a kayatnan ti makiraman a mangibunannag iti naimbag a damag, makisaritakayo iti mamangulo a manangaywan. Iyurnosna ti pannakisarita kenkuana dagiti panglakayen tapno maikeddeng no kualipikadon a makikadua iti kongregasion a mangasaba iti publiko. Sigurado a maragsakan ti puso ni Jehova no makitana dagiti kabbaro a dumasig kenkuana mainaig iti sapasap nga isyu!—Prov. 27:11.
10. (a) Kasano a makatulong ti nasayaat nga eskediul tapno makapag-auxiliary pioneer-tayo? (b) Nakapag-auxiliary pioneer-kayo kadi idi napan a tawen iti panawen ti Memorial? Kasano?
10 Makapag-Auxiliary Pioneer-kayo Kadi? Masapul a saanyo a tagtagilag-anen ti 50 nga oras a makalikaguman kadagiti auxiliary pioneer. (Mat. 5:37) Kaipapanan daytoy a nasken nga agpromedio iti 12 oras ti busbosenyo nga agserbi iti tay-ak iti tunggal lawas. Maitutop kadi iti kasasaadyo ti maysa kadagiti pagtuladan nga eskediul iti panag-auxiliary pioneer iti panid 5? No saan, makaaramidkayo kadi iti eskediul tapno makapag-auxiliary pioneer-kayo iti Marso, Abril, ken Mayo? Ikararagyo ken ni Jehova a bendisionanna ti panagreggetyo a mangpalawa iti pannakiramanyo iti serbisio.—Prov. 16:3.
11. Kasano a masuportaran dagiti panglakayen ken ministerial nga adipen dagidiay agserbi kas auxiliary pioneer?
11 Dagiti panglakayen ken ministerial nga adipen naan-anay a suportaranda ti panagreggetyo tapno agbalin a naisangsangayan a pakaidayawan ni Jehova ti panawen ti Memorial, nangruna iti kampania a panagiwaras iti broshur nga Agtultuloyka nga Agbantay! Mabalin nga adu kadakuada ti ag-auxiliary pioneer. Mangyurnosto dagiti panglakayen kadagiti kanayonan a taripnong sakbay ti panangasaba kas kadagiti malem, kadagiti rabii dagiti aldaw ti lawas, ken kadagiti ngudo ti lawas no kasapulan. Tapno maikeddeng no sadino ken kaano a maangay dagita a taripnong ken no siasino ti mabalin a mangidaulo, mabalin a kasarita dagiti panglakayen dagidiay addaanen iti masnup a plano nga agpayunir wenno dagidiay mangpampanunot pay laeng iti dayta. Ikagumaan dagiti panglakayen ti mangyurnos kadagiti agibumbunannag a makipagtrabaho kadakayo kadagiti aldaw ken oras nga inlatangyo para iti serbisio. Iti daytoy a pamay-an, maipasdek a sititibker dagiti planotayo ken adu ti nasayaat a maaramidantayo.—Prov. 20:18.
12. Ania ti mangtignay kadatayo a mangidayaw ken ni Jehova iti amin a tiempo?
12 Aramidenyo ti Amin a Kabaelanyo: No saankayo a makapag-auxiliary pioneer gapu iti kasasaadyo, laglagipenyo nga awaten ni Jehova dagiti panagregget ken sakripisiotayo ‘sigun iti adda kadatayo, saan a sigun iti awan kadatayo.’ (2 Cor. 8:12) Adu ti panggapuantayo nga agyaman ken ni Jehova. Adda naimbag a rason nga insurat ni David: “Bendituekto ni Jehova iti amin a tiempo; patinayon a ti pakaidaydayawanna addanto iti ngiwatko.” (Sal. 34:1) Sapay koma ta kasta ti determinasiontayo iti daytoy a panawen ti Memorial.
[Kahon iti panid 3]
Kasanom a Palawaen ti Ministeriom?
◼ Mangasabaka no adda dagiti tattao kadagiti pagtaenganda
◼ Mangasabaka kadagiti publiko a lugar
◼ Mangasabaka iti pagtrabahuan wenno iti eskuelaan
◼ Mangasabaka babaen ti telepono
◼ Agserbika kas auxiliary pioneer
[Tsart iti panid 5]
Dagiti Pagtuladan nga Eskediul ti Panag-Auxiliary Pioneer—Nagduduma a Pamay-an ti Panangyeskediul iti 12 Oras a Panagserbi iti Tay-ak iti Kada Lawas
Agsapa—Lunes Agingga iti Sabado
Mabalin nga isandi ti Domingo iti aniaman nga aldaw.
Aldaw Periodo Oras
Lunes Agsapa 2
Martes Agsapa 2
Mierkoles Agsapa 2
Huebes Agsapa 2
Biernes Agsapa 2
Sabado Agsapa 2
Dagup nga Oras: 12
Dua nga Aldaw nga Agmalmalem
Mabalin a pilien ti aniaman a dua nga aldaw iti lawas.
(Depende kadagiti aldaw a pinilim, daytoy nga eskediul ket mabalin nga agdagup laeng iti 48 oras iti maysa a bulan.)
Aldaw Periodo Oras
Mierkoles Agmalmalem 6
Sabado Agmalmalem 6
Dagup nga Oras: 12
Dua a Rabii ken Ngudo ti Lawas
Mabalin a pilien ti aniaman a rabii ti dua nga aldaw iti lawas.
Aldaw Periodo Oras
Lunes Rabii 11⁄2
Mierkoles Rabii 11⁄2
Sabado Agmalmale 6
Domingo Kagudua Aldaw 3
Dagup nga Oras: 12
Tallo a Malem ken Sabado
Mabalin nga isandi ti Domingo iti aniaman nga aldaw.
Aldaw Periodo Oras
Lunes Malem 2
Mierkoles Malem 2
Biernes Malem 2
Sabado Agmalmalem 6
Dagup nga Oras: 12
Personal nga Eskediulko iti Panagserbi iti Tay-ak
Ikeddengmo no mano nga oras ti busbosem iti tunggal periodo.
Aldaw Periodo Oras
Lunes
Martes
Mierkoles
Huebes
Biernes
Sabado
Domingo
Dagup nga Oras: 12