‘Naan-anay a Panangsaksi iti Naimbag a Damag’
1. Ania a naimbag a damag ti masapul nga iranudtayo?
1 Iti lubong a manmano ti mangngeg a naimbag a damag, addaantayo iti pribilehio a ‘naan-anay a mangsaksi iti naimbag a damag ti di kaikarian a kinamanangngaasi ti Dios.’ (Ara. 20:24) Ramanen daytoy ti panangipakaammo kadagiti tattao a dagiti “maudi nga aldaw” ket mabiiten a suktan ti nalinteg a baro a lubong ni Jehova, a sadiay, ‘ti immuna a bambanag naglabaston.’ (2 Tim. 3:1-5; Apoc. 21:4) Awanton ti sakit iti dayta a tiempo. (Isa. 33:24) Dagiti pimmusay nga ing-ingungotentayo rummuardanto kadagiti pakalaglagipan a tanem ket maisublidanto iti denna ti pamilia ken gagayyemda. (Juan 5:28, 29) Agbalinto ti intero a daga a napintas a paraiso. (Isa. 65:21-23) Sumagmamano laeng dagitoy a pagarigan ti naimbag a damag a masapul nga iranudtayo!
2. Apay a ti panawen ti Memorial ipaayannatayo iti nagsayaat a gundaway a mangsaksi iti naimbag a damag?
2 Ti bulan ti Marso, Abril, ken Mayo ipaayandatayo iti nagsayaat a gundaway a mangipakaammo iti kasta a naimbag a damag. Kabayatan dagitoy a bulbulan, nasayaat ti paniempo ken at-atiddog ti aldaw iti adu a deppaar ti lubong isu nga ad-adu nga oras ti mabusbostayo iti ministerio. Malaksid iti dayta, ti Memorial a kapatgan nga okasion iti tawen ket maselebraranto iti intero a lubong kalpasan ti ilelennek ti init inton Sabado, Marso 22. Itan ti tiempo nga irugitayo ti agsagana para iti panangpalawa iti aktibidadtayo.
3. Ania ti makatulong kadatayo a mangpalawa iti aktibidadtayo kas pamilia?
3 Panag-auxiliary Pioneer: Kabaelam kadi nga urnosen ti eskediulmo tapno makapagserbika kas auxiliary pioneer iti maysa, dua, wenno tallo a bulan? Apay a diyo pagsasaritaan daytoy a banag iti sumaganad a panagadalyo kas pamilia? No agtitinnulongkayo, mabalin a makapag-auxiliary pioneer ti maysa wenno ad-adu pay a kameng ti pamiliayo. (Prov. 15:22) Ikararagmo daytoy a banag ket kitaem no kasano a bendisionan ni Jehova dagiti panagreggetmo. (Prov. 16:3) Uray no awan ti kameng ti pamilia a makapag-auxiliary pioneer, mabalin a mangipasdek dagiti amin a kameng ti pamilia kadagiti espesipiko a kalat a mangpalawa iti pannakiramanda iti ministerio babaen ti pannakipagtrabahoda kadagidiay makapag-auxiliary pioneer.
4. Kasanotay a maurnos ti eskediultayo tapno makapag-auxiliary pioneer-tayo uray no agtartrabahotayo iti amin-tiempo?
4 No agtartrabahoka iti amin-tiempo, mabalin a makapagserbika latta kas auxiliary pioneer no addaanka iti nasayaat nga eskediul. Nalabit mabalinmo ti mangasaba iti sumagmamano a minuto bayat ti oras ti pangngaldaw. Wenno mabalin nga agkiddawka iti personal a teritoria nga asideg iti pagtaengam wenno iti pagtartrabahuam ket mangasabaka iti maysa wenno ad-adu pay nga oras sakbay wenno kalpasan ti trabahom. Maaddaanka iti kanayonan nga oras iti eskediulmo no aramidem iti sabali a bulan dagiti saan unay a napateg nga aktibidad ken no agmalmalem a mangasabaka kadagiti ngudo ti lawas. Ti ar-aramiden dagiti dadduma ket agbakasionda iti maysa wenno dua nga aldaw tapno mapanda mangasaba.
5. Kasano a matulongam nga ag-auxiliary pioneer ti maysa a nataengan wenno nakapuy ti salun-atna?
5 No maysaka a nataengan wenno masakit wenno nakapuy ti salun-atna, mabalinmo ti ag-auxiliary pioneer babaen ti panangasabam iti sumagmamano nga oras iti kada aldaw. Ikararagmo ken Jehova nga ikkannaka iti “pannakabalin a nalablabes ngem ti gagangay.” (2 Cor. 4:7) Adda kabsat a babai a nakapag-auxiliary pioneer iti edad a 106! Babaen ti tulong dagiti Kristiano a kabagianna ken ti dadduma a kakabsat iti kongregasion, nabaelanna ti nangasaba iti binalaybalay, nagsarungkar, nangyadal iti Biblia, ken nakiraman iti dadduma pay a benneg ti ministerio. Isu ket timmulong a nangirugi iti panangyadal iti Biblia kadagiti sangapulo a tattao. “No pampanunotek ti nagsayaat a pribilehiok a nagserbi kas auxiliary pioneer,” kunana, “mapmapno ti pusok iti ayat ken apresasion ken Jehova, iti Anakna, ken iti organisasionna. Talaga a kayatko nga ibaga ti ‘pagyamanan, Jehova!’”
6. Kasano a posible a makapag-auxiliary pioneer dagiti bautisado nga agtutubo nga ages-eskuela pay laeng?
6 No maysaka a bautisado nga agtutubo nga ages-eskuela pay laeng, mabalinmo met ti agpasalista kas auxiliary pioneer. Kas kadagiti agtartrabaho iti amin-tiempo, nalabit mabalinmo met ti makiraman iti ministerio kadagiti ngudo ti lawas. Baka mabalinmo met ti mangasaba iti maysa wenno ad-adu pay nga oras kalpasan ti klasem iti dadduma nga aldaw. Adda kadi piesta opisial iti eskuelaanyo a mabalinmo a gundawayan tapno makiramanka iti ministerio? No kayatmo ti ag-auxiliary pioneer, makisaritaka kadagiti dadakkelmo maipapan iti dayta.
7. Ania ti mabalin nga aramiden dagiti panglakayen tapno rumayray ti kinaregta a makiraman iti ministerio kabayatan ti panawen ti Memorial?
7 Panangparayray iti Kinaregta: Dakkel ti maaramidan ti ehemplo dagiti panglakayen iti panangparayray iti kinaregta ti kongregasion. (1 Ped. 5:2, 3) Mabalin nga ikeddengda ti mangyeskediul kadagiti kanayonan a taripnong sakbay ti panangasaba para kadagidiay makiraman iti ministerio iti bigbigat, kalpasan ti klase, wenno trabaho. Ti manangaywan iti serbisio nasken a siguraduenna nga adda dagiti kualipikado nga agibumbunannag a mangidaulo kadagitoy a taripnong ken masapul nga adda umdas a teritoria kasta met dagiti magasin ken literatura a mausar kadagiti bulan ti naisangsangayan nga aktibidad.
8. Ania ti masursurotayo iti kapadasan ti maysa a kongregasion?
8 Adda maysa a kongregasion a nasapa iti sumagmamano a bulan ti panangiparegta dagiti panglakayen iti panag-auxiliary pioneer. Linawas nga ipakaammoda iti kongregasion no mano nga agibumbunannag ti naaprobaran nga ag-auxiliary pioneer. Gapuna, dagidiay mayat a mangpalawa iti ministerioda ammoda nga adu ti kaduada a mangasaba. Adda dagiti nayurnos a kanayonan a taripnong sakbay ti panangasaba iti bigbigat ken iti rabii. Kas resultana, 53 nga agibumbunannag ti nakapag-auxiliary pioneer idi Abril, dandani kagudua daytoy iti bilang dagiti agibumbunannag iti kongregasion!
9. Apay a ti panawen ti Memorial ket nakasaysayaat a gundaway para kadagidiay kualipikadon a mangikasaba iti naimbag a damag?
9 Tulongan Dagiti Sabsabali a Mangasaba: No kualipikadon a mangasaba dagiti kabbaro ken agtutubo, mabalinen nga ikadua ida kadagiti aduan kapadasan nga agibumbunannag. Mabalin a dumteng ti kasta nga oportunidad kabayatan ti panawen ti Memorial ta adu iti kongregasion ti mangpalawa iti aktibidadda. Adda kadi iyad-adalam iti Biblia a rumangrang-ay iti naespirituan ken agbibiagen a maitunos kadagiti nalinteg a pagalagadan ni Jehova? Nasingpet ken rumangrang-ay kadi iti naespirituan dagiti annakmo ngem saanda pay nga agibumbunannag? No ibagada a kayatdan ti agbalin a di bautisado nga agibumbunannag ket kombinsidoka a kualipikadoda, ibagam dayta iti maysa kadagiti panglakayen. Mangyurnos ti mamangulo a manangaywan iti dua a panglakayen a makisarita kenka ken iti anakmo wenno iti iyad-adalam iti Biblia maipapan iti dayta a banag.
10. Ania ti mabalin nga aramiden dagiti panglakayen tapno matulongan dagidiay di aktibo?
10 Dagiti masungad a bulan ipaayanda met dagiti di aktibo iti nagsayaat a gundaway a makiraman manen iti ministerio a kadua ti kongregasion. Dagiti manangaywan iti Panagadal iti Libro ti Kongregasion ken dagiti dadduma pay a panglakayen masapul nga ikagumaanda a sarungkaran dagiti kasta a kakabsat ket sibabara nga awisenda a makipagtrabaho manen kadakuada iti ministerio. No nabayagen a saanda nga aktibo, kasarita pay ida nga umuna ti dua a panglakayen tapno masinunuo no kualipikadoda.—km 11/00 p. 7.
11. Ania ti katan-okan nga ebkas ti “di kaikarian a kinamanangngaasi ti Dios?”
11 Agsagana Maipaay iti Memorial: Ti subbot ket isu ti katan-okan nga ebkas ti “di kaikarian a kinamanangngaasi ti Dios.” (Ara. 20:24) Riniwriw a managyaman a tattao iti intero a lubong ti agtataripnong inton Sabado, Marso 22, kalpasan ti ilelennek ti init, tapno rambakanda ti Panglaglagip iti ipapatay ti Apo. Kayattayo nga awisen ken tulongan dagiti amin a napudno ti panagpuspusoda a tattao a tumabuno iti daytoy napateg nga okasion a mangsaksi maipapan iti di kaikarian a kinamanangngaasi ni Jehova iti sangatauan.
12. Siasino dagiti awisentayo iti Memorial?
12 Ilistam dagidiay kayatmo nga awisen. Awan duadua a kayatmo nga iraman iti listaan dagiti kabagiam, am-ammom iti pagtrabahuan wenno eskuelaan, dagidiay dati ken madama nga iyad-adalam, ken amin a dadduma pay a regular a sarsarungkaram. No ti dadduma nga awisem ket agsaludsod maipapan iti Memorial, mabalin a makatulong no usarem ti artikulo iti apendise maipapan iti Pangrabii ti Apo iti panid 206-8 ti libro nga Isursuro ti Biblia. Mabalin a makatulong pay ketdi daytoy iti panangirugi iti panangyadal iti Biblia, yantangay ikkannaka iti gundaway a mangiruangan iti publikasion nga us-usarentayo iti panangyadal iti Biblia.
13. Kasano a binendisionan ni Jehova ti panagregget ti dua nga agibumbunannag a nangikeddeng a mangawis kadagiti sabsabali a tumabuno iti Memorial?
13 Inlista ti maysa a kabsat a babai ti 48 a pamilia nga awisenna. Gulisanna ti nagan dagidiay naawisnan ken isuratna no kaano ti panangawisna kadakuada. Anian a ragsakna ta 26 kadagiti inawisna ti timmabuno iti Memorial! Ti kabsat a lalaki a makinkukua iti pagtagilakuan inawisna ti trabahadorna a dati a padi. Timmabuno ti lalaki ket kinunana kalpasanna, “Ad-adu ti nasursurok maipapan iti Biblia iti uneg ti maysa nga oras laeng no idilig iti 30 a tawen a panagbalinko a Katoliko.” Di nagbayag kalpasan ti Memorial, immanamong a mayadalan iti libro nga Isursuro ti Biblia.
14. Ania a sangalubongan a kampania ti mangrugi inton Marso 1?
14 Kampania: Mangrugi inton Sabado, Marso 1, ken agpatpatuloy agingga inton Marso 22, maiwarasto iti intero a lubong ti espesial nga imbitasion iti Memorial. Kayat ti amin nga agibumbunannag ti makiraman a naan-anay iti daytoy a napateg a kampania. Nasaysayaat no iyawattayo ti imbitasion iti bumalay imbes nga ibatitayo lattan iti ridawda. Ngem no nalawa ti teritoria, mabalin nga ikeddeng dagiti panglakayen a maibati lattan dagiti imbitasion kadagiti pagtaengan nga awan dagiti bumalayna ngem maikabil dayta iti lugar a saan a makita dagiti aglablabas. Kadagiti ngudo ti lawas, itukontayo met dagiti kaudian a magasin.
15. Kasanotay nga ipresentar ti imbitasion iti Memorial?
15 Gapu ta limitado ti tiempo a panagiwarastayo kadagiti imbitasion, kasayaatan no ababa ti presentasiontayo. Naganaygay ken nainggayyemankayo koma. Mabalinyo nga ibaga ti kastoy: “Kayatdakayo nga awisen agraman dagiti kapamilia ken gagayyemyo a tumabuno iti napateg nga okasion a maangay inton Marso 22. Daytoy ti imbitasionyo. Dagiti detalye ket mabasayo iti imbitasion.” Mabalin nga adda salsaludsod ti bumalay. Wenno mabalin nga awatenna ti imbitasion ken ibagana pay ketdi a tumabunonto. Isuratyo dagidiay mangipakita iti interes ken sarungkaranyonto.
16. Ania a kapadasan ti mangipakita iti kinapateg ti kampania a panangawis kadagiti tattao iti teritoria a tumabuno iti Memorial?
16 Idi napan a tawen, adda maysa a soldado a nakakita iti imbitasion iti Memorial iti ridawda. Inkeddengna a tabunuan dayta ngem masapul nga agpakada iti sarhentona. Idi impakitana ti imbitasion, saan a nakauni ti sarhento ket kinunana a Saksi dagiti dadakkelna ken sumursurot idi kadakuada a mapan makigimong. Saanna laeng a pinalubosan ti soldado no di ket kinaduana a tumabuno iti Memorial!
17. Kasanotay a maipakita nga ap-apresiarentayo ti panggep ti di kaikarian a kinamanangngaasi ti Dios?
17 Panangipakita iti Apresasion: Bayat nga umad-adani ti panawen ti Memorial iti 2008, sapay koma ta utoben ti tunggal maysa ti di kaikarian a kinamanangngaasi ni Jehova kadatayo. Insurat ni apostol Pablo: “Ipakaasimi met kadakayo a saanyo nga awaten ti di kaikarian a kinamanangngaasi ti Dios ket maikapiskayo iti panggepna.” (2 Cor. 6:1) Kasanotay a maipakita nga ap-apresiarentayo iti panggep ti di kaikarian a kinamanangngaasi ti Dios? Insurat ni Pablo: “No di ket iti tunggal pamay-an irekomendami ti bagbagimi kas ministro ti Dios.” (2 Cor. 6:4) No kasta, maipakitatayo ti apresasiontayo iti sagut ni Jehova babaen ti nasayaat a kababalintayo ken ti naregta a panangikasaba iti naimbag a damag. Iti daytoy panawen ti Memorial, addaantayo iti naisangsangayan a gundaway a mangpalawa iti aktibidadtayo, a naan-anay a mangsaksi iti naimbag a damag.
[Kahon iti panid 3]
Siasino Dagiti Mabalin nga Ag-auxiliary Pioneer?
◼ Dagiti pamilia
◼ Dagiti agtartrabaho iti amin-tiempo
◼ Dagiti nataengan ken nakapuy ti salun-atna
◼ Dagiti ages-eskuela
[Kahon iti panid 4]
No Agiwaraskayo Kadagiti Imbitasion iti Memorial Masapul nga:
◼ Ababa; naganaygay ti presentasionyo
◼ Isuratyo dagidiay interesado ket sarungkaranyo
◼ Itukonyo dagiti magasin kadagiti ngudo ti lawas