Itultuloyyo nga Isarsarita ti Maipapan Kadagiti Nakaskasdaaw nga Aramid ni Jehova

1. Ania ti sumagmamano kadagiti nakaskasdaaw nga aramid ni Jehova ti nangnangruna nga apresiarenyo?

¹ Awan ti umasping iti naindaklan a Diostayo, ni Jehova! Insurat ni David: “Adu a banag ti inaramidmo, O Jehova a Diosko, ti mismo a nakaskasdaaw nga ar-aramidmo ken ti pampanunotmo maipaay kadakami; awan ti maipadis kenka.” (Sal. 40:5) Dagiti nakaskasdaaw nga aramid ni Jehova ramanenna ti panangparsuana iti uniberso, ti Mesianiko a Pagarian, dagiti ebkas ti naayat a kinamanangngaasina kadagiti adipenna, ken ti sangalubongan a kampania a panangasaba. (Sal. 17:7, 8; 139:14; Dan. 2:44; Mat. 24:14) Ti ayat ken ni Jehova ken ti panagyaman kadagiti amin nga inaramidna ti mangtignay kadatayo a mangisarsarita kadagiti dadduma iti maipapan kenkuana. (Sal. 145:5-7) Bayat ti Marso, Abril, ken Mayo, adda gundawaytayo a mangaramid iti daytoy.

2. Kasanotayo a magunggonaan a mismo iti panag-auxiliary pioneer?

² Kas Auxiliary Pioneer: Maurnosmo kadi ti eskediulmo tapno maaddaanka iti 50 nga oras iti ministerio bayat ti maysa wenno ad-adu pay kadagitoy a bulan ti naisangsangayan a teokratiko nga aktibidad? Sigurado a makagunggona ti aniaman a panagbalbaliw nga aramidem iti rutinam. (Efe. 5:16) Adu ti nakatakuat a ti panag-auxiliary pioneer ti timmulong kadakuada a mangparang-ay iti kalidad ti ministerioda. Ad-addan a komportableda a makisarita iti ruangan ken ad-addan nga usarenda ti Biblia. No ad-adu nga oras ti busbosenda iti ministerio, nalaklakada nga itultuloy a tulongan dagiti interesado a masarakanda, ket dagiti dadduma nga awan pay idi ti iyad-adalanna iti Biblia naaddaanda iti maysa bayat ti panag-auxiliary pioneer-da. Gapu ta ti panag-auxiliary pioneer ramanenna ti panangikagumaantayo a mangtulong kadagiti sabsabali, makaparagsak daytoy a trabaho.—Ara. 20:35.

3. Kasano a nakapag-auxiliary pioneer ti dadduma uray no narigat ti kasasaadda?

³ Dimo ipato a dagus a dinaka palubosan ti kasasaadmo nga ag-auxiliary pioneer. Idi napan a tawen, nag-auxiliary pioneer ti maysa a panglakayen nga addaan iti dua nga annak ken addaan iti amin-tiempo a trabaho. Kasano a naaramid daytoy ti okupado a kabsat? Tangay agtartrabaho bayat ti lawas, implanona ti mangasaba iti adu nga oras kadagiti ngudo ti lawas, nga irugina ti mangasaba iti lansangan iti 7:00 ti bigat tunggal Sabado. Nag-auxiliary pioneer met ti sumagmamano iti kongregasion nga addaan iti kasta met la a kasasaad, ket sinuportaran ken pinabilegda ti tunggal maysa. Iti sabali pay a kongregasion, inkeddeng ti 99 ti tawenna a kabsat a babai ti agpayunir iti bulan ti Mayo idi inawis ti anakna a babai a makikadua kenkuana. Dagiti dadduma pay iti kongregasion tinulonganda daytoy baketen a kabsat a mapan mamalaybalay ken mangyadal iti Biblia babaen ti panangiduronda iti wheelchair-na. Nakiraman met iti panangasaba babaen ti telepono, panangasaba iti lansangan, ken panagsurat. Kombinsido a maaramidna daytoy saan a babaen ti bukodna a pigsa, no di ket babaen laeng iti tulong ni Jehova.—Isa. 40:29-31.

4. Ania dagiti banag a mabalintay nga usigen no mangaramidtayo iti eskediul tapno makapag-auxiliary pioneer?

⁴ Padasem ti mangaramid iti eskediul a maitutop unay iti kasasaadmo. Mabalin a makatulong dagiti pagsurotan nga eskediul iti daytoy a ruar. Agtartrabahoka kadi iti amin-tiempo wenno ages-eskuelaka? Mabalin a praktikal unay kenka ti eskediul a panangasaba kadagiti ngudo ti lawas. No addaanka kadagiti parikut iti salun-at ken saanmo a kabaelan ti mangasaba iti napaut iti sumagmamano nga aldaw, mabalin a kasayaatan ti eskediul a panangasaba iti sumagmamano la nga oras iti inaldaw. Isarsaritam kadagiti dadduma ti tarigagaymo nga ag-auxiliary pioneer. Mabalin nga ikagumaanda met nga aramiden dayta.

5. Ania dagiti kalat a mabalin nga ikeddeng dagiti agtutubo para iti Marso, Abril, ken Mayo?

⁵ Dagiti Pamay-an No Kasano a Makiraman Dagiti Agtutubo: Maay-ayo ni Jehova no isarsarita dagiti agtutubo ti maipapan kadagiti nakaskasdaaw nga aramidna. (Sal. 71:17; Mat. 21:16) No agtutuboka ken nabautisarankan, mabalinmo ti ag-auxiliary pioneer iti maysa wenno ad-adu pay a bulan bayat ti bakasionyo iti eskuelaan. No saanka a makapag-auxiliary pioneer, makaaramidka kadi kadagiti espesipiko a kalat tapno maparang-aymo ti pannakiramanmo ken ti kalidad ti ministeriom bayat dagitoy a bulan? No mangaskasabakan a kaduam dagiti dadakkelmo ngem saanka pay laeng a di bautisado nga agibumbunannag, mabalin a nasayaat daytoy a gundaway tapno padasem a ragpaten daytoy. Saan a kasapulan a panunotem a nasken nga agbalinka a nalaing a mangsungbat kadagiti saludsod maipapan iti Biblia wenno nasken a ti pannakaammom ket kas kaadu ti pannakaammo dagiti bautisado nga adulto. Maawatam kadi dagiti pagdamdamuan a sursuro iti Biblia? An-annurotem kadi dagiti moral a pagalagadan iti Biblia? Kayatmo kadi ti maibilang kas maysa kadagiti Saksi ni Jehova? No kasta, kasaritam dagiti dadakkelmo maipapan iti daytoy a banag. Mabalindaka a kaduaen a makisarita kadagiti panglakayen tapno kitaenda no maragpatmo dagiti kualipikasion.—Kitaenyo ti libro a Ti Ministeriotayo, panid 98-9.

6. Kasanotayo a matulongan dagiti mayad-adalan iti Biblia nga agbalin nga agibumbunannag iti naimbag a damag?

⁶ Panangtulong Kadagiti Dadduma a Mangasaba: Dagiti narang-ay nga iyad-adalan iti Biblia ket mabalin a makualipikar a makiraman kadatayo kas agibumbunannag kadagiti sumungsungad a bulan ti naisangsangayan a teokratiko nga aktibidad. No adda iyad-adalam iti Biblia a nasayaat ti panagrang-ayna, agpatulongka iti manangaywan iti panagadalyo iti libro wenno iti manangaywan iti serbisio. Mabalin a maysa kadakuada ti mangkadua kenka a mangyadal tapno kitaenna ti panagrang-ay ti iyad-adalam. No kualipikado ti iyad-adalam ken tarigagayanna ti agbalin nga agibumbunannag, mabalin a mangyurnos ti mamangulo a manangaywan iti dua a panglakayen a makisarita kenka ken iti iyad-adalam. (Kitaenyo Ti Pagwanawanan, Nobiembre 15, 1988, panid 17.) Apaman a maaprobaran ti iyad-adalam, dagus a sanayem iti ministerio.

7. Kasano a matulongan dagiti saan a regular ken di aktibo nga agibumbunannag?

⁷ Dagiti manangaywan iti panagadal iti libro rumbeng nga ipaayanda iti naisangsangayan nga atension dagiti di aktibo wenno saan a regular iti grupoda. Personal nga awisenyo ida a makikadua kadakayo a mangasaba. No nabayagen a saanda nga aktibo, nasaysayaat no kasarita ida pay nga umuna ti dua a panglakayen tapno kitaenda no kualipikadoda. (Kitaenyo ti “Saludsod” iti Nobiembre 2000 a Ti Ministeriotayo iti Pagarian.) Ti regta ti kongregasion bayat dagitoy a bulan ti naisangsangayan a teokratiko nga aktibidad mabalin a gutugotenna ida a makiraman a kanayon iti ministerio.

8, 9. Ania ti mabalin nga aramiden dagiti panglakayen tapno maparayrayda ti panaggagar a makiraman iti naisangsangayan nga aktibidad?

⁸ Agsagana Itan Para iti Naganetget nga Aktibidad: Dakayo a panglakayen, rugianyo itan a paregtaen ti kongregasionyo nga ag-auxiliary pioneer. Adu ti maaramidanyo babaen dagiti positibo a komento ken nasayaat nga ulidanyo. (1 Ped. 5:3) Ania ti napalabas a kangatuan a bilang dagiti auxiliary pioneer iti kongregasion? Malab-awan kadi iti daytoy a tawen? Dagiti manangaywan iti panagadal iti libro ken dagiti katulonganda mangkitada koma kadagiti pamay-an a mangparegta kadagiti amin iti grupoda a mangparang-ay iti aktibidadda. Mabalin a mangyurnos dagiti manangaywan iti serbisio kadagiti kanayonan a taripnong sakbay ti panangasaba. Ipakaammoyo a nasaksakbay iti kongregasion no ania ti urnos. Siguraduenyo a dagiti makabael nga agibumbunannag ti matudingan a mangidaulo, ket dagiti taripnong sakbay ti panangasaba masapul a mangrugi ken agngudo iti umiso nga oras. (Kitaenyo ti “Saludsod” iti Setiembre 2001 a Ti Ministeriotayo iti Pagarian.) Ti manangaywan iti serbisio kitaenna met koma nga adda umdas a teritoria, magasin, ken literatura.

⁹ Idi napan a tawen, dagiti panglakayen iti maysa a kongregasion sireregget ken nasapada nga imparegta ti panag-auxiliary pioneer, a sumagmamano kadakuada ti nangted iti aplikasionda. Nangyurnosda kadagiti kanayonan a taripnong sakbay ti panangasaba​—ti maysa ket 5:30 iti bigat para iti panangasaba iti lansangan, ti sabali pay ket 3:00 iti malem para kadagidiay aggapu iti eskuelaan, ken ti maikatlo ket 6:00 iti malem para kadagidiay aggapu iti trabaho. Maysa pay, tallo a taripnong sakbay ti panangasaba ti nayurnos iti tunggal Sabado. Nagtignay ti kongregasion ket 66 ti nag-auxiliary pioneer idi Abril!

10. Kasano a makapagsagana dagiti pamilia a mangparang-ay iti aktibidadda?

¹⁰ Apay a saankayo a mangilatang iti oras inton sumaruno a panagadal ti pamiliayo tapno mangikeddeng kadagiti realistiko a kalat kadagiti sumungsungad a bulan? Babaen ti nasayaat a panagtitinnulong ken panagplano, mabalin nga ag-auxiliary pioneer ti sumagmamano wenno amin a kameng ti pamilia. No saan a posible dayta, mangaramidkayo kadagiti kalat a mangparang-ay iti aktibidadyo babaen ti panangpaatiddogyo iti gagangay a panangasabayo wenno babaen ti panangasabayo kadagiti dadduma pay a gundaway. Ikararagyo daytoy a banag kas pamilia. Makapagtalekkayo a bendisionan ni Jehova dagiti panagreggetyo.—1 Juan 3:22.

11. (a) Ania dagiti nagsayaat a banag a naaramidan ti daton ni Kristo? (b) Kaano ken sadino a marambakan ti Memorial?

¹¹ Ti Kasayaatan nga Aramid ti Dios: Ti kasayaatan nga ebkas ti ayat ni Jehova ket ti panangisagutna iti Anakna kas subbot agpaay kadatayo. (1 Juan 4:9, 10) Ti daton a subbot ti legal a pakaibatayan ti panangsubbot iti sangatauan manipud iti basol ken ipapatay. (Roma 3:23, 24) Ti naiparukpok a dara ni Jesus pinatalgedanna ti baro a tulag, a mamagbalin a posible kadagiti imperpekto a tattao nga agbalin nga annak ti Dios nga addaan iti namnama nga agturay iti nailangitan a Pagarian. (Jer. 31:31-34; Mar. 14:24) Kangrunaanna, ti naan-anay a panagtulnog ni Jesus sinantipikarna ti nagan ni Jehova. (Deut. 32:4; Prov. 27:11) Inton Domingo, Abril 4, kalpasan ti ilelennek ti init, marambakan iti intero a lubong ti Panglaglagip iti ipapatay ni Kristo.

12. Kasano a magunggonaan dagiti interesado a tattao iti itatabunoda iti pannakarambak ti Pangrabii ti Apo?

¹² Ti panangrambak iti Pangrabii ti Apo itan-okna dagiti nakaskasdaaw nga aramid ni Jehova. Ti palawag parayrayenna ti apresasiontayo iti inaramid ni Jehova a nangipaay iti subbot. Maammuanto dagiti interesado a tumabuno dagiti dadduma pay a nakaskasdaaw nga aramid ti Dios. Makitadanto ti panagkaykaysa ken nabara nga ayat nga insuro ni Jehova nga iparangarang dagiti adipenna. (Efe. 4:16, 22-24; Sant. 3:17, 18) Ti itatabuno iti daytoy napateg nga okasion ket addaan iti dakkel nga epekto iti panagpampanunot ti maysa a tao, isu a kayattayo nga adu ti tumabuno aginggat’ mabalin.—2 Cor. 5:14, 15.

13, 14. Siasino dagiti rumbeng nga awisentayo iti Memorial, ken kasano?

¹³ Panangawis Kadagiti Sabsabali a Tumabuno: Dagus a rugianyon ti agsagana babaen ti panangilista kadagidiay awisenyo. Karaman koma iti listaanyo dagiti di manamati a kameng ti pamilia, kaarruba, gagayyem iti pagtrabahuan wenno iti eskuelaan, napalabas ken agdama nga iyad-adalan iti Biblia, ken amin a sarsarungkaranyo. Dagiti manangaywan iti panagadal iti libro rumbeng nga iramanda iti listaanda ti siasinoman a di aktibo nga agibumbunannag.

¹⁴ Usarenyo dagiti nayimprenta nga imbitasion iti Memorial, sa imakinilia wenno nalawag nga isuratyo kadagita ti oras ken pakaangayan ti Memorial. Wenno mabalin a kayatyo nga usaren ti imbitasion nga adda iti makinlikud nga akkub ti Marso 15, 2004, a Pagwanawanan wenno ti Marso 22, 2004, nga Agriingkayo! Bayat nga umad-adani ti Abril 4, palagipanyo dagidiay inlistayo, personal man wenno babaen ti telepono.

15. Kasanotayo a maipakita ti kinamanagpadagus iti rabii ti Memorial?

¹⁵ Iti Memorial: Ikagumaanyo ti sumangpet a nasapa iti rabii ti Memorial. Ipakitayo ti kinamanagpadagus babaen ti sibabara a panangabrasayo kadagiti kabbaro. (Roma 12:13) Addaankayo iti naisangsangayan a responsabilidad kadagiti inawisyo a sangaili. Ipariknayo kadakuada a maawatda, ken iyam-ammoyo ida kadagiti dadduma iti kongregasion. Mabalin a pagtugawenyo ida iti asideg kadakayo. Ket no adda asinoman nga awanan iti Biblia wenno pagkantaan, iranudyo kadakuada ti Biblia wenno pagkantaanyo, wenno kasaritayo dagiti dadduma a mangiranud iti Biblia wenno pagkantaanda. Kalpasan ti panangrambak, iwayaanyo a sungbatan ti aniaman a mabalin nga isaludsodda. No damo a timmabuno dagiti dadduma, damagenyo no kayatda a maammuan ti ad-adu pay maipapan iti Sao ti Dios ken ti panggepna. Itukonyo kadakuada ti panagadal iti Biblia iti pagtaengan.

16. Ania ti mabalin nga aramiden tapno matulongan a rumang-ay iti naespirituan dagidiay timmabuno?

¹⁶ Itultuloyyo a Tulongan Dagidiay Timmabuno: Kadagiti lawas kalpasan ti Memorial, mabalin nga agkasapulan iti kanayonan a tulong dagidiay timmabuno. Karaman ditoy dagidiay kanayon idi a makigimgimong ngem limitado itan ti pannakitimpuyogda iti kongregasion. Masapul a siguraduen dagiti panglakayen a saan a maliwayan dagiti kasta a tattao, nga ammuenda no apay a nagsardengdan a rumang-ay iti naespirituan ken ipaganetgetda kadakuada ti kinaganat ti tiempo. (1 Ped. 4:7) Tulonganyo ti amin a mangkita iti pagsayaatan ti panangtungpal iti Nainkasuratan a patigmaan a makitimpuyog a kanayon kadagiti adipen ti Dios.—Heb. 10:24, 25.

17. Apay a nasken nga itultuloytayo nga isarsarita ti maipapan kadagiti nakaskasdaaw nga aramid ni Jehova?

¹⁷ Tangay nakaskasdaaw unay dagiti aramid ni Jehova, saantayo a maawatan a naan-anay dagita uray no agbiagtayo nga agnanayon. (Job 42:2, 3; Ecl. 3:11) Gapuna, pulos a saantayto a maibusan iti panggapuan a mangidayaw kenkuana. Iti daytoy panawen ti Memorial, maipakitatayo ti panagyamantayo kadagiti nakaskasdaaw nga aramid ni Jehova babaen ti naisangsangayan a panangikagumaantayo a mangpalawa iti ministeriotayo.

[Tsart iti panid 5]

Makapag-Auxiliary Pioneer-ka Kadi Babaen ti Panangusarmo iti Maysa Kadagitoy nga Eskediul?

Marso  D L* Ma* Mi* H B S Bulan Dagup

Tunggal Aldaw 2  1  1  1  1  1  5 51

Dua nga Aldaw 0 5 0 5 0 0 0 50

Abril  D L Ma Mi H* B* S Bulan Dagup

Tunggal Aldaw 2  1  1  1  1  1  5 50

Dua nga Aldaw 0 0 0 0 5 5 0 50

Mayo  D* L* Ma Mi H B S* Bulan Dagup

Tunggal Aldaw 2  1  1  1  1  1  4 51

Dua nga Aldaw 0 5 0 0 0 0 5 50

* Lima iti bulan