‘Naan-anay nga Ikasabayo ti Sao ti Dios’

¹ No pudno nga apresiarenyo ti naimbag a banag a naawatyo, diyo kadi ipakita dayta babaen ti kababalin ken ar-aramidyo? Siempre, ipakitayo! No maipapan iti kinaimbag ken naayat a kinamanangngaasi ni Jehova iti sangatauan, utobenyo no kasano ti reaksion ni apostol Pablo. Kinunana: “Pagyamanan iti Dios gapu iti di mailadawan a sagutna nga awanan bayad”! Ania ti ramanen dayta a “sagutna nga awanan bayad”? Kadagiti amin a naipakita kadatayo a “mangringbaw a di kaikarian a kinamanangngaasi ti Dios,” ti kadakkelan a pannakaiparangarang dayta ket idi insagutna ti bukodna nga Anak kas pangsubbot kadagiti basoltayo.—2 Cor. 9:14, 15; Juan 3:16.

² Babaen laeng kadi iti sasao nga inyebkas ni Pablo ti panagyamanna? Saan! Impakitana ti dakkel nga apresasionna iti adu a pamay-an. Maseknan unay iti naespirituan a pagimbagan dagiti padana a Kristiano ket kayatna nga aramiden ti amin a kabaelanna a tumulong kadakuada tapno naan-anay a magunggonaanda iti naayat a kinamanangngaasi ti Dios. Kinuna ni Pablo kadakuada: “Yantangay adda kinalailomi kadakayo, naay-ayokami unay a mangiburay kadakayo, saan laeng a ti naimbag a damag ti Dios, no di ket kasta met dagiti bukodmi a kararua, agsipud ta nagbalinkayo a dungdungnguenmi.” (1 Tes. 2:8) Malaksid iti panangtulongna kadagidiay kameng ti kongregasion tapno magun-odanda ti pannakaisalakan, siaanep nga inkasaba ni Pablo ti naimbag a damag, a nagdaliasat iti rinibu a kilometro iti daga ken baybay tapno sapulenna dagidiay “siuumiso nga agannayas iti agnanayon a biag.” (Ara. 13:48) Ti naimpusuan nga apresasionna iti amin nga inaramid ni Jehova kenkuana ti nangtignay ken Pablo a ‘naan-anay a mangikasaba iti sao ti Dios.’​—Col. 1:25.

³ Saannatayo kadi a tignayen ti apresasiontayo kadagiti amin nga inaramid ni Jehova tapno ipaaytayo ti naespirituan a pannaranay kadagiti agkasapulan ti tulong iti kongregasiontayo? (Gal. 6:10) Ken saantayo kadi a matignay a mangaramid iti amin a kabaelantayo a mangikasaba iti naimbag a damag ti Pagarian iti teritoriatayo?​—Mat. 24:14.

⁴ Tiempo Tapno Ipakita ti Apresasion: Iti kada tawen, ti Panglaglagip iti ipapatay ni Kristo ket mangipapaay kadatayo iti naisangsangayan a gundaway tapno ipakita ti apresasiontayo iti naaramidan kadatayo ni Jehova ken ni Jesus. Daytoy ket saan laeng a basta panagtitipon manen wenno panglaglagip iti maysa a pasamak. Kuna ni Jesus: “Itultuloyyo nga aramiden daytoy kas panglaglagip kaniak.” (Luc. 22:19) Ti Panglaglagip iti ipapatay ni Kristo ket maysa nga okasion tapno mennamennaen ti kinasiasino ni Jesus. Tiempo daytoy tapno ipabigbigtayo nga isu ket sibibiag ken aktibo iti kaaldawantayo, buyogen ti dayag ken kinaari a naipaay kenkuana gapu iti matalek a panagbiag ken sakripisiona. Daytoy a pasken ket gundaway met tapno ipakitatayo ti panagpasakuptayo iti kinaulo ni Kristo bayat nga iturongna dagiti trabaho ken aktibidad ti kongregasion Kristiano. (Col. 1:17-20) Amin a tattao ti Dios rumbeng a siraraem a tabunuanda ti Panglaglagip iti ipapatay ni Kristo. Iti daytoy a tawen, maangay daytoy kalpasan ti ilelennek ti init iti Huebes, Marso 28, 2002.

⁵ Gapu iti kinaaneptayo sakbay ti Memorial idi napalabas a tawen, naaddaantayo iti kangatuan pay laeng a bilang ti dimmar-ay nga 424,306 ditoy Pilipinas. Mano ngata ti dumar-ay ita a tawen? Agpannuray dayta iti ‘panagtrabaho a sipipinget ken panagagawatayo,’ nga ikagumaantayo ti mangawis iti ad-adu no mabalbalin.—1 Tim. 4:10.

⁶ Malaksid iti idadar-ay iti Pangrabii ti Apo, mabalin a maparang-aytayo ti serbisiotayo iti tay-ak. Awan duadua a pinullo a ribu a kakabsat ti ag-auxiliary pioneer iti maysa wenno ad-adu pay a bulan. Iti kada tawen iti naglabas a lima a tawen, naaddaantayo iti promedio nga 41,618 nga auxiliary pioneer bayat ti tiempo ti Memorial, Marso agingga Mayo. Ti nagpasalista idi 2001 ket 33,802, a nababbaba ngem iti promedio. Mabalinyo kadi nga iwayaan ti pribilehio nga ag-auxiliary pioneer ita a tawen? Nagsayaat dayta a pamay-an a maipakitayo ti napudno nga apresasionyo iti naayat a sagut ti Dios, ti daton ni Kristo. Manamnamayo ti bendision ni Jehova, kas ipakita dagiti sumaganad a kapadasan.

⁷ Maipapan iti panagserbina kas auxiliary pioneer idi napan a Marso, kastoy ti insurat ti maysa a sister nga addaan iti amin-tiempo a sekular a trabaho: “Iti Pebrero 2001 a Ti Ministeriotayo iti Pagarian, naiparegta iti amin nga agserbida kas auxiliary pioneer bayat ti tiempo ti Memorial no ipalubos ti kasasaadda. Yantangay adda lima a Sabado iti Marso, mayataday daytoy iti eskediulko. Isu nga inkeddengko ti nagpasalista.” Iti rugi ti bulan, intudingna a kalat ti mangyadal iti Biblia iti pagtaengan. Nagballigi kadi? Wen, iti maika-52 nga oras a panangasabana iti dayta a bulan! Ania ti makunana? “Adda dagiti naisangsangayan a bendision no mangaramidtayo iti kanayonan a panangikagumaan.”

⁸ Ania dagiti magunggona ti pamilia no agdadanggayda nga agpayunir? Para iti maysa a pamilia a buklen ti uppat a tao, didanto malipatan ti bulan ti Abril a panagpayunirda. Kinuna ti ina: “Nasayaat ti panangmatmatmi iti kada aldaw, agsipud ta nagdadanggaykami iti ministerio! Ti panagsasaritami maipapan kadagiti inaldaw a nagapuananmi iti tay-ak ti namagbalin iti pangrabiimi a naragsak.” Kinuna ti anak: “Pakaragsakak ti panangasabami ken ni Tatang bayat ti lawas, kadagiti aldaw nga adda koma iti sekular a trabahona.” Innayon ti ama: “Kas ulo ti pamilia, mariknak ti pannakapnek ta ammok a sangsangkamaysakami a nakipaset iti kapapatgan a trabaho iti tiempotayo.” Makapagpayunirkayo kadi kas maysa a pamilia? Apay a di pagsasaritaan ken pagadalan ti pamiliayo no mabalinan ti intero a sangakabbalayanyo ti ag-auxiliary pioneer bayat ti tiempo ti Memorial?

⁹ Mapagbalintayo Kadi ti Marso a Kasayaatan a Bulantayo? Iti insert ti Marso 2000 a Ti Ministeriotayo iti Pagarian, naisaludsod: “Mapagbalintayo Kadi ti Abril 2000 a Kasayaatan a Bulantayo?” Ania ti resultana? Napagbalintayo a nangatngato ngem iti dati ti kangatuan a bilang dagiti agibumbunannag ken timmabuno iti Memorial, ken 19,704 ti nagserbi kas auxiliary pioneer iti dayta a bulan. Immadu met ti bilang ti oras, naipaima a magasin, ken panagsarungkar, ket dimmanon iti 100,156 ti iyad-adalantayo iti Biblia. Malagipyo kadi ti ragsak ti kongregasionyo gapu iti kinaokupado iti naespirituan nga aktibidad bayat dayta naisangsangayan a bulan? Maulit wenno maartapantayo kadi ita a tawen dagita a nagapuanantayo? Babaen ti agdadanggay a panangikagumaan ti amin, posible nga agbalin ti Marso 2002 kas ti “Kasayaatan a Bulantayo.” Apay a Marso?

¹⁰ Adda dua a rason no apay a ti Marso ti agbalin koma a naisangsangayan a bulan ti aktibidad. Umuna, maangay ti Memorial iti maudi a paset ti Marso, ket nawayatayo iti umuna a paset ti bulan a mangawis iti adu a tumabuno. Maikadua, ti Marso ita a tawen ket addaan iti lima a kompleto a ngudo ti lawas, a mangted kadatayo iti adu a gundaway nga ag-auxiliary pioneer para kadagiti mangmangged wenno estudiante. Apay a diyo itugawan ti panangaramid iti nasayaat nga eskediul, nga usarenyo ti kalendario a naipaay iti daytoy nga insert? Mabalin a nalaklaka ti ag-auxiliary pioneer ngem iti panagkunayo. Kas pagarigan, no mangilatangkayo iti 8 nga oras a panangasaba bayat ti tunggal maysa kadagiti lima a ngudo ti lawas, masapul laengen a mangilatangkayo iti 10 a kanayonan nga oras iti sabali nga aldaw bayat ti bulan tapno maragpatyo ti makalikaguman a 50 nga oras.

¹¹ Ania ti maaramidan dagiti panglakayen tapno matulonganda ti amin a kakabsat iti kongregasion a ‘naan-anay a mangikasaba iti sao ti Dios’? Pagagarenyo ida babaen dagiti paset iti gimong ken personal a panagsasarita. Iti biang dagiti konduktor ti Panagadal iti Libro ti Kongregasion ken dagiti katulonganda, mabalin nga asitgan ken kasaoda ti tunggal naitimpuyog iti grupoda tapno personal a tulonganda dagitoy. Mabalin a ti kasapulan laeng ket sumagmamano a pammaregta a sasao wenno praktikal a singasing. (Prov. 25:11) Adunto ti makaamiris a mabalinda ti makiraman iti pribilehio nga ag-auxiliary pioneer, babaen ti sumagmamano a panagbalbaliw iti urnosda. Iti adu a kongregasion, nangipaay iti nagsayaat nga ulidan ti kaaduan, no saan man nga amin, a panglakayen ken ministerial nga adipen ken dagiti assawada, babaen ti agdadanggay a panagpayunirda bayat ti tiempo ti Memorial. Daytoy ti nangparegta iti adu nga agibumbunannag a tumulad kadakuada. Gapu iti kinakapuy iti pisikal wenno dadduma a kasasaad, mabalin a saan a makapagpayunir ti sumagmamano nga agibumbunannag. Nupay kasta, mabalin a maparegtada a mangipakita iti apresasion babaen ti panangaramid iti kabaelanda iti ministerio a kaduada ti dadduma iti kongregasion.

¹² Ti panagballigi ket agpannuray iti naannad a panagplano dagiti panglakayen. Dagiti taripnong sakbay ti panangasaba ket rumbeng a mayeskediul iti maitutop a tiempo bayat ti lawas. No posible, mangdutok a nasaksakbay ti manangaywan iti serbisio kadagiti kualipikado a kakabsat a lallaki a mangikondukta iti taripnong sakbay ti panangasaba. Masapul ti panagsagana a nalaing tapno saan nga aglabes dagitoy a taripnong iti 10 agingga 15 a minuto, a pakairamanan ti panangorganisar kadagiti grupo, panangituding iti teritoria a mawanas, ken panagkararag. (Kitaenyo ti “Saludsod” iti Setiembre 2001 a Ti Ministeriotayo iti Pagarian.) Ti urnos ti aktibidad para iti bulan ket nabatad koma a mailawlawag iti kongregasion ken maipaskil iti information board.

¹³ Adda koma a kanayon ti mawanas a teritoria. Agtungtong koma a kanayon ti manangaywan iti serbisio ken ti mangas-asikaso iti teritoria tapno mangyurnosda iti panangasaba kadagiti manmano a mawanas a teritoria. Maipangpangruna koma ti panangasaba kadagidiay saan a madandanon kadagiti pagtaenganda, panangasaba iti lansangan ken kadagiti pagtagilakuan, ken panangasaba iti rabii. No mayanatup, mabalin a matulongan ti dadduma nga agibumbunannag tapno mangasabada iti telepono.

¹⁴ Tulonganyo Ida nga Agserbi Manen: Adda kadi siasinoman iti teritoria ti kongregasionyo a saanen nga aktibo iti panangikasaba iti naimbag a damag? Kameng pay la ida ti kongregasion ket masapulda ti tulong. (Sal. 119:176) Yantangay asideg unayen ti panungpalan daytoy daan a lubong ken sumungsungaden ti baro a lubong, addaantayo iti naimbag a rason tapno ikagumaantayo a tulongan dagidiay nagbalin a di aktibo. (Roma 13:11, 12) Bayat ti naglabas a lima a tawen ditoy Pilipinas, nasurok a 3,150 a tao iti kada tawen ti nagbalin manen nga aktibo idi natulonganda. Ania ti maaramidantayo tapno matulongan ti adu a mangisubli iti sigud nga ayat ken panagkompiansada?​—Heb. 3:12-14.

¹⁵ Iti biang ti bagi dagiti panglakayen, mabalin a pagsasaritaanda no kasano a matulonganda dagiti nagbalin a di aktibo bayat ti naglabas a sumagmamano a tawen. (Mat. 18:12-14) Ti sekretario sukimatenna koma dagiti Congregation’s Publisher Record kard ket ilistana ti amin a nagbalin a di aktibo. Maaramid koma ti naisangsangayan a panangikagumaan a tumulong babaen ti panagipastor. Mabalin a kayat ti maysa a panglakayen a sarungkaran ti maysa nga agibumbunannag agsipud ta kabesado wenno nakalkalangenna, wenno dadduma nga agibumbunannag ti makiddaw a tumulong. Mabalin a dagitoy ti nangyadal iti daydiay saanen nga aktibo ket nangnangruna a makatulongda iti daytoy a tiempo ti pakasapulan. Sapay koma ta adu kadagiti nagbalin a di aktibo ti matignay manen a mangikasaba iti sao ti Dios. No makualipikarda, ti kasayaatan a panangirugida ket kabayatan ti tiempo ti Memorial!​—Para iti kanayonan a detalye, kitaenyo ti “Saludsod” iti Nobiembre 2000 a Ti Ministeriotayo iti Pagarian.

¹⁶ Kualipikado Kadi ti Dadduma a Mangasaba? Agtultuloy ti panangbendision ni Jehova iti ilina babaen ti panangyeg kadagiti “matarigagayan a banag dagiti amin a nasion.” (Hag. 2:7) Iti kada tawen, rinibu ti agbalbalin a di bautisado nga agibumbunannag. Siasinoda? Dagiti annak dagiti Saksi ni Jehova ken dagiti narang-ay nga estudiante ti Biblia. Kasanotayo nga ammo no kualipikadoda nga agbalin nga agibumbunannag iti naimbag a damag?

¹⁷ Annak Dagiti Saksi ni Jehova: Adu nga annak ti nakikadkadua kadagiti dadakkelda iti panagbalaybalay iti adun a tawen, nupay saanda pay a di bautisado nga agibumbunannag. Mabalin a ti Marso ti nasayaat a tiempo tapno mangrugida. Kasanoyo nga ammo no kualipikado ti anakyo? Iti panid 100 ti Organisado a Mangitungpal ti Ministeriotayo, nakuna a dayta ket “no ti maysa nga ubing ket mapagulidanan iti kababalinna ken kabaelanna nga iyebkas a personal ti pammatina babaen ti pannakisasaona kadagiti dadduma maipapan ti naimbag a damag, a natignay manipud pusona a mangaramid iti dayta.” No iti panagkunayo ket kualipikado ti anakyo, makitungtongkayo iti maysa kadagiti panglakayen ti Congregation Service Committee.

¹⁸ Dagiti Kualipikado nga Estudiante ti Biblia: No nakagun-oden iti pannakaammo ken tumabtabunon iti gimong ti maysa nga estudiante ti Biblia, mabalin a tarigagayanna ti agbalin nga agibumbunannag iti Pagarian. No dakayo ti mangyad-adal iti dayta nga estudiante, utobenyo dagitoy a saludsod: Rumangrang-ay kadi ti iyad-adalanyo, sigun iti edad ken abilidadna? Iti di pormal a pamay-an, nairugina kadin nga iranud ti pammatina iti sabsabali? Inrugina kadin nga ikawes ti “baro a personalidad”? (Col. 3:10) Adda kadi kenkuana dagiti kualipikasion ti di bautisado nga agibumbunannag, a nailista iti panid 97-9 iti libro a Ti Ministeriotayo? No wen, asitganyo ti Congregation Service Committee tapno mayurnos ti pannakisarita ti dua a panglakayen kadakayo ken iti estudiante. No makualipikar, ipakaammo kenkuana ti dua a panglakayen a mabalinnan ti mangasaba iti publiko.

¹⁹ Ti Ngay Abril ken Mayo? Naisangsangayan met dagitoy a bulan para iti ad-adu a pannakiraman iti tay-ak ti ministerio. Adu a nag-auxiliary pioneer iti Marso ti mabalin manen nga agpayunir iti Abril ken/wenno Mayo. Bayat ti ministeriotayo iti Abril ken Mayo, ipangpangrunatayo nga itampok ti magasin a Pagwanawanan ken Agriingkayo! Anian a makagunggona ti epekto dagita kadagiti mangbasa! Dakkel ti naaramidan dagitoy a magasin iti panangragpat iti kasta unay a panagrang-ay iti sangalubongan. Bayat ti Abril ken Mayo, maaramid ti naisangsangayan a panangikagumaan a maitukon dagiti magasin kadagiti adu a tao agingga a posible. Iplanoyo itan ti naan-anay a pannakiramanyo.

²⁰ Gapu ta planoyo ti ad-adu a pannakiraman iti panangasaba, masapul kadi a nayonanyo ti bilang dagiti magasin nga alaenyo iti kongregasion? Iti intero a tawen serbisio, itampoktayo Ti Pagwanawanan ken Agriingkayo! iti kada Sabado, ti aldaw ti Panagiwaras iti Magasin. Ngem yantangay adu ti ag-auxiliary pioneer ken mangipaimatayo amin iti magasin bayat ti dua a bulan, mabalin a kasapulan a nayonanyo ti orderyo a magasin iti kongregasion. No kasta, pangngaasiyo ta pakaammuanyo a dagus ti manangaywan iti magasin iti kongregasionyo. Siguraduen met koma ti manangaywan iti literatura a ti amin ket adda ti mausarda nga umdas a suplay ti tract a Kayatyo Kadi a Maammuan ti Ad-adu Pay Maipapan iti Biblia?

²¹ Adu ti nangapresiar iti benneg Ti Ministeriotayo iti Pagarian a napauluan “No Ania ti Ibagayo Maipapan Kadagiti Magasin.” Ap-aprobetsarenyo kadi daytoy a probision babaen ti panangensayo kadagiti pagsurotan no kasano nga ipaima ti magasin? Bayat ti panagadal ti pamiliayo iti Biblia, apay a diyo usaren ti sumagmamano a kanito tapno ensayuen dagitoy a panangiparang?

²² Naan-anay a Gundawayanyo Daytoy a Tiempo ti Memorial: Kas ken apostol Pablo, ipakitatayo koma ken Jehova ti napalalo a panangapresiartayo iti “di mailadawan a sagutna nga awanan bayad” babaen ti naan-anay a pannakipasettayo kadagiti naespirituan nga aktibidad a naiplano iti daytoy tiempo ti Memorial. Pakaibilangan ti (1) itatabuno iti kapatgan nga okasion iti tawen, ti pannakarambak ti Pangrabii ti Apo inton Huebes, Marso 28, 2002; (2) panangtulong kadagidiay nagbalin a di aktibo a mangisubli iti ‘ayat nga adda [kadakuada] idi damo’ (Apoc. 2:4; Roma 12:11); (3) panangtulong kadagiti annaktayo ken siasinoman nga estudiante ti Biblia tapno makualipikarda nga agbalin a di bautisado nga agibumbunannag; ken (4) pannakiraman a naan-anay iti trabaho a panagebanghelio agingga a posible, uray ti panag-auxiliary pioneer iti Marso, Abril, ken Mayo no ipalubos ti kasasaadyo.—2 Tim. 4:5.

²³ Sipapasnek nga ikararagtayo nga amintayo ket naan-anay koma a makipaset iti panangikasaba iti naimbag a damag ti Pagarian bayat daytoy tiempo ti Memorial. Iti kasta, maipakitatayo ti napalalo a panangapresiar iti amin a naaramidan ti Dios agpaay kadatayo.

[Kahon iti panid 6]

Personal nga Eskediul iti Tay-ak ti Serbisio Para iti Marso 2002

Domingo Lunes Martes Mierkoles Huebes Biernes

Sabado

1  2

Panagiwaras iti Magasin

3 4 5 6 7 8 9

Panagiwaras iti Magasin

10 11 12 13 14 15 16

Panagiwaras iti Magasin

17 18 19 20 21 22 23

Panagiwaras iti Magasin

24 25 26 27 28 29 30

MEMORIAL Panagiwaras iti Magasin

KALPASAN TI

31 ILELENNEK TI INIT

Makaiwayakayo kadi iti 50 nga oras tapno ag-auxiliary pioneer iti Marso?