Eskediul ti Pamilia—Ti Panagadal ti Pamilia
1 Kas Kristiano nga ama wenno ina, ti ayatmo ken ni Jehova ti kapatgan a sagut a maitedmo kadagiti annakmo. Ti maysa a napateg a gundaway a mabalinmo nga aramiden daytoy ket “no agtugawka iti balaymo” para iti linawas a sangapamiliaan a panagadal iti Biblia. (Deut. 6:5-7) Kapammatiam man ti asawam, saanmo a karelihionan dagiti kabbalaymo, wenno agsolsoloka a nagannak, matulongam dagiti annakmo nga agbalin a nasinged kenka agraman ken ni Jehova babaen ti kaadda ti regular a panagadal ti pamiliayo.
2 Panangirugi: Ti umuna nga addang ket ti panangipaugali iti panagadal kas pamilia. No saanyo a maikeddeng no kaano nga angayen ti panagadal, apay a diyo pagsasaritaan daytoy kas pamilia? (Prov. 15:22) No ubbing pay dagiti annakyo, mabalin nga iyab-ababayo ti panagadalyo iti intero a lawas. Kitaenyo no ania ti kasayaatan iti sangakabbalayanyo. Iti eskediul ti pamiliayo, mangikeddengkayo iti masnup nga aldaw ken oras ti panagadalyo, ket determinadokayo koma a mangsurot iti dayta.
3 Ania ti mabalinyo nga adalen? Dagiti dadduma isaganada ti leksion a mausig iti Panagadal iti Libro ti Kongregasion wenno iti Panagadal iti Pagwanawanan. Kaay-ayo dagiti dadduma ti material a nairanta kadagiti agtutubo. Kinuna ti maysa nga ama nga addaan iti annak nga ubing a lalaki ken babai: “Magustuan la unay dagiti annakmi ti agadal no iyaktomi dagiti eksena iti Ti Librok Dagiti Estoria ti Biblia. Napatpateg nga amang ti kauneg ti pannakaitukit ti masursuro ken maawatan dagiti ubbing ngem ti kaadu dagiti parapo a masaklawmi.”
4 Linawas nga Agadal: Regular koma a maangay ti panagadal ti pamilia ken sigagagar a padpadaanan dagiti amin a kameng ti pamilia. Mabalin a baliwbaliwan ti aldaw ken oras ti panagadal no bilang ta adda dagiti di ninamnama a kasasaad a nasken a tamingen. Mabalin nga adda met dagiti gundaway a masapul a baliwan ti material nga adalen. Ngem saan koma a maitantan iti mabayag ti naipasdek nga eskediul ti panagadal ti pamilia no kas pagarigan ta adda dagiti nasken a maaramid a panagbalbaliw. Iti maysa a sangakabbalayan, kinuna ti anak a babai: “No kasapulan a baliwan ti oras ti panagadalmi, kanayon nga ikabil ni Tatang ti baro nga eskediul iti rikep ti reprihiradora tapno ammomi amin no kaano.” Anian a nagsayaat ti kasta a panangikagumaan a mangtaginayon iti regular a panagadal ti pamilia! Bayat nga agtultuloy a padakkelenyo dagiti annakyo “iti disiplina ken panangiturong-panunot ni Jehova,” ipakpakitayo ti ayatyo kadakuada ken iti nailangitan nga Amatayo.—Efe. 6:4.