Eskediul ti Pamilia—Ti Inaldaw a Teksto
1 Dagiti naayat a nagannak inaldaw a makumikomda a mangisagana iti makapasalun-at a taraon nga agpaay kadagiti annakda. Napatpateg nga amang ti panangpakan kadakuada iti naespirituan a taraon nga aggapu iti Sao ti Dios. (Mat. 4:4) Ti maysa a pamay-an tapno matulonganyo dagiti annakyo a mangpatanor iti panagtarigagay iti naespirituan a taraon ken ‘dumakkel nga agturong iti pannakaisalakan’ ket babaen ti inaldaw a panangusig iti teksto ken komento kas pamilia. (1 Ped. 2:2) Kaano a maaramidyo daytoy iti eskediul ti pamiliayo?
2 No Pannangan: Ti panangirugi iti aldaw babaen ti panangusig iti teksto matulonganna ti pamiliayo a kanayon a silalagip ken ni Jehova iti agmalem. (Sal. 16:8) Inwayaan ti maysa nga ina a basaen ken usigen ti teksto ken komento a kaduana ti anakna a lalaki bayat ti pammigatda sa agkararagda sakbay a mapan ti anakna iti eskuelaan. Daytoy ti nangpabileg iti anakna a di makikompromiso no maipasango iti kasasaad nga adda pakainaiganna iti nasionalismo, mangsaranget kadagiti imoral a pakasulisogan, ken situtured a mangasaba kadagiti estudiante ken mannursuro. Nupay isu laeng ti Saksi idiay eskuelaanda, nariknana a saan nga agmaymaysa.
3 No saan a praktikal kadakayo ti panangusig iti teksto iti agsapa, mabalinyo nga aramiden dayta kas pamilia iti sabali a gundaway, nalabit bayat ti pangrabiiyo. Iti dayta a gundaway, dagiti dadduma iramanda a pagsasaritaan dagiti kapadasanda iti ministerio iti tay-ak ken dagiti punto a nagustuanda iti personal a panagbasada iti Biblia. Adu dagiti agkuna a dagiti kasta a gundaway nga addada iti sango ti panganan ket maibilang kadagiti kararagsakan a kanito a panaglalangenda kas pamilia.
4 Iti Rabii: Kadagiti dadduma a pamilia, ti kasayaatan a gundaway a panangusigda iti inaldaw a teksto ket sakbay ti pannaturogda iti rabii. Mangted met daytoy iti nasayaat a gundaway nga agkararag kas pamilia. No inaldaw a mangngegdakayo dagiti annakyo a mangisarsarita iti maipapan ken ni Jehova ken mangngegdakayo nga agkararag kenkuana, ibilangda ni Jehova a maysa a pudno a persona.
5 Sapay koma ta bendisionan ni Jehova ti panangikagumaanyo a mangitukit iti kinapudno kadagiti annakyo bayat nga usarenyo a naimbag ti Panangsukimat Kadagiti Kasuratan iti Inaldaw.