Paset 11—Panangikondukta Kadagiti Progresibo a Panagadal iti Biblia
Panangtulong Kadagiti Estudiante a Mangaramid Kadagiti Panagsarungkar
1 No irugin ti mayad-adalan iti Biblia ti makiraman iti trabaho a panangasaba, makasarakto kadagiti tattao a mangipakita iti interes iti naimbag a damag. Kasanotayo a matulongan ti kabbaro nga agibumbunannag a mangaramid kadagiti epektibo a panagsarungkar ken mangparayray iti interes dagiti makasaritana?
2 Ti panagsagana para iti panagsarungkar ket mangrugi iti damo nga ibibisita. Paregtaenyo ti estudiante a maaddaan iti napasnek nga interes kadagidiay makasaritana. (Fil. 2:4) In-inut a sanayenyo ti kabbaro nga agibumbunannag a mangawis kadagiti bumalay a mangyebkas kadagiti kapanunotanda, dumngeg kadagiti komentoda, ken mangpaliiw kadagiti banag a pakaseknanda. No adda mangipakita iti interes, paisuratyo iti kabbaro nga agibumbunannag ti napateg nga impormasion maipapan iti ibibisita. Usarenyo dayta nga impormasion a tumulong kenkuana nga agsagana para iti kanayonan a panagsasarita.
3 Panagsagana nga Agsarungkar: Lagipenyo ti damo nga ibibisitayo, ken ipakitayo iti estudiante no kasano ti mangpili iti aspeto ti mensahe ti Pagarian a paginteresan ti bumalay. (1 Cor. 9:19-23) Duakayo a mangisagana iti ababa a presentasion a mangitampok iti maysa a teksto ti Biblia agraman ti maysa a parapo iti mapagadalan a publikasion. Kanayonanna, mangisaganakayo iti saludsod a mabalin nga iyimtuod iti ngudo ti saritaan tapno addanto pagsasaritaanyo iti sumaganad a panagsarungkar. Ipakitayo iti kabbaro nga agibumbunannag no kasanona a nayonan ti pannakaammo ti bumalay maipapan iti Sao ti Dios iti tunggal panagsarungkar.
4 Makatulong met no suruanyo ti estudiante iti simple nga introduksion. Kalpasan a makablaawanna ti bumalay, mabalinna a kunaen: “Tinagiragsakko ti napalabas a panagsaritata, ket nagsubliak tapno mangiranud iti kanayonan nga impormasion iti Biblia maipapan iti [mangdakamatkayo iti topiko].” Mabalinyo met nga isuro iti kabbaro nga agibumbunannag no ania ti aramidenna no sabali a tao ti manglukat iti ridaw.
5 Agsarungkar a Siaanep: Paregtaenyo ti iyad-adalanyo a mangipakita iti nasayaat nga ulidan iti dagus a panangsarungkar kadagiti amin a mangipakita iti interes. Tapno madanonyo dagiti tattao iti pagtaenganda, mabalin a kasapulan a naanepkayo nga agsarungkar. Isuroyo iti estudiante no kasano ti makitulag para iti panagsarungkar, ken tulonganyo a mangtarus a nasken ti panagsubli no inkarina ti agsubli. (Mat. 5:37) Sanayenyo ti kabbaro nga agibumbunannag nga agbalin a naasi, naanus, ken nadayaw bayat ti panangbirokna kadagiti marakarnero a tattao ken bayat ti panangsukayna iti interesda.—Tito 3:2.