Panangdanon iti Amin a Tattao Aginggat’ Mabalin
1. Ania ti inaramid dagiti nagkauna a Kristiano tapno maidanonda ti naimbag a damag kadagiti amin a tattao aginggat’ mabalin?
1 Dagiti nagkauna nga adalan ni Jesus sipapasnek nga inwaragawagda ti mensahe ti Pagarian. Nangaramidda kadagiti praktikal a pamay-an tapno maidanonda ti naimbag a damag kadagiti amin a tattao aginggat’ mabalin. Dagiti Kristiano a mannurat iti Biblia insuratda dagiti naipaltiing a sursurat iti kadawyan a Griego, nga isu idi ti internasional a pagsasao iti Imperio ti Roma. Kanayonanna, mabalin nga inrusat dagiti naregta a manangaskasaba idi maikadua ken maikatlo a siglo K.P. ti panagusar iti manuskrito nga umarngi iti libro, a nalaklaka nga usaren ngem iti lukot para iti panangbirok kadagiti reperensia.
2, 3. (a) Kasano a matungtungpal ti Isaias 60:16 iti moderno a panawen? (b) Kasano a maus-usar ti teknolohia iti pannakayadelantar ti nasin-aw a panagdayaw?
2 Panangusar iti Teknolohia: Impakpakauna ni Jehova babaen ken propeta Isaias: “Pudno a susopemto ti gatas dagiti nasion.” (Isa. 60:16) Iti kaitungpalan daytoy a padto iti kaaldawantayo, us-usaren dagiti adipen ni Jehova dagiti napapateg a sanikua dagiti nasion tapno mayadelantar ti trabaho a panangasaba. Kas pagarigan, idi 1914, tawtawen sakbay a nagbalin a gagangay ti komersial a panangusar iti umasping a teknolohia, dagiti Estudiante ti Biblia inrugida nga impabuya ti “Photo-Drama of Creation.” Riniwriw a tattao ti nakabuya iti daytoy a walo nga oras a pelikula ken slide, a dekolor ken addaan iti timek.
3 Kadagitoy a tiempo, agus-usar dagiti adipen ti Dios kadagiti napartak a pagimprentaan ken dekompiuter nga alikamen tapno maipablaak iti ginasut a pagsasao dagiti Biblia ken literatura a naibatay iti Biblia. Babaen kadagiti napartak a pamay-an ti panagibiahe, maipatpatulod dagiti literatura ti Biblia kadagiti adayo a paset ti daga, a madanonna dagiti tattao iti 235 a pagilian. Babaen ti espirituna, tigtignayen ni Jehova dagiti adipenna a mangusar a sieepektibo kadagiti kasta a teknolohia, a mangipakaammo iti kinapudno ti Biblia iti ad-adu a tattao.
4. Ania a panagbalbaliw ti inaramid dagiti dadduma tapno maidanonda ti naimbag a damag kadagiti ad-adu a tattao?
4 Personal a Panagbalbaliw: Maidagadag met kadagiti pudno nga agdaydayaw a mangaramidda kadagiti personal a panagbalbaliw tapno maidanonda ti naimbag a damag kadagiti ad-adu a tattao. Adu ti nangpasimple iti biagda tapno ad-adu ti magapuananda iti trabaho a panangasaba. Adda dagiti immakar tapno agserbi iti lugar nga addaan iti dakdakkel a panagkasapulan kadagiti manangiwaragawag iti Pagarian. Dadduma ti nangpalawa iti ministerioda babaen ti panagsursuroda iti ganggannaet a pagsasao.
5, 6. Ania ti mabalintayo nga aramiden tapno madanontayo ti amin a tattao aginggat’ mabalin iti lokal a teritoriatayo?
5 Kanayonanna, maidanontayo ti naimbag a damag kadagiti ad-adu a tattao babaen ti panangasabatayo no kaano nga adda dagiti tattao iti pagtaenganda ken no sadino ti pakasarakan kadakuada. No dagiti tattao iti teritoriayo ket masansan nga awanda iti pagtaenganda bayat ti aldaw, mabaliwanyo kadi ti eskediulyo tapno makakasabakayo bayat ti sardam? Adda kadi dagiti publiko a lugar a mabalinyo a pangasabaan? Napadasanyo kadin ti nangasaba babaen ti telepono ken kadagiti lugar ti negosio? Mangsapsapulkayo kadi kadagiti gundaway tapno mangasaba iti di pormal?
6 Anian a pribilehio ti makiraman iti naindaklan a panangsaksi maipapan iti nagan ken Pagarian ni Jehova! Sapay koma ta itultuloytayo nga iranud ti mangted-biag a kinapudno manipud iti Sao ti Dios kadagiti amin a tattao aginggat’ mabalin.—Mat. 28:19, 20.