‘Aramidenyo ti Amin a Bambanag Maipagapu iti Naimbag a Damag’
1. Ania ti pagragsakan nga aramiden ti manangikaskasaba iti Pagarian para kadagiti sabsabali, ken apay?
1 Narikna ni apostol Pablo nga adda personal nga obligasionna a mangikasaba iti naimbag a damag. (1 Cor. 9:16, 19, 23) Umasping iti dayta, ti pannakaseknantayo iti agnanayon a pagimbagan dagiti tattao tignayennatayo met nga agregget a mangiranud iti naimbag a damag kadakuada.
2. Iti panangasabatayo, ania dagiti panagbalbaliw a situtulok nga aramidentayo, ken apay?
2 Mangasaba iti Oras ken Lugar nga Adda Dagiti Bumalay: Ti nalaing a mangngalap ket agkalap iti oras ken lugar nga ad-adu ti makalapanna, saan nga iti oras ken lugar a komportable para kenkuana. Kas “dumadaklis iti tattao,” nalabit kasapulan a mangaramidtayo kadagiti panagbalbaliw iti eskediultayo tapno madanontayo dagiti tattao iti teritoriatayo, iti kasta matagiragsaktayo a naan-anay ti pribilehio a panagurnong iti “tunggal kita ti ikan.” (Mat. 4:19; 13:47) Mabalintay kadi ti mangasaba iti sardam tapno madanontayo dagiti tattao iti pagtaenganda wenno iti bigbigat tapno mangasabatayo iti lansangan? Kalat idi ni Pablo ti mangipaay iti ‘naan-anay a panangsaksi iti naimbag a damag,’ ket inaramidna dayta iti tunggal maitutop a gundaway.—Ara. 17:17; 20:20, 24.
3, 4. Kasanotayo nga agbalin a mannakibagay iti ministeriotayo, ket ania ti maaramidan dayta?
3 Ibagayyo ti Presentasionyo: Masansan a baliwan dagiti mangngalap ti metododa tapno makakalapda iti partikular a kita ti ikan. Kasanotayo nga idatag ti naimbag a damag ti Pagarian iti wagas a makaallukoy kadagiti tattao iti teritoriatayo? Masapul a sitataktika a dakamatentayo ti banag a pakaseknan ti kaaduan a tattao iti teritoriatayo sa imdengantayo a naimbag ti makunada maipapan iti dayta. (Sant. 1:19) Mabalintay nga imtuoden no ania ti kapanunotanda iti maysa a banag. (Prov. 20:5) Iti kasta, maibagaytayo ti panangidatagtayo iti naimbag a damag iti wagas a mangdanon iti pusoda. Nagbalin ni Pablo nga “amin a bambanag iti amin a kita ti tattao.” (1 Cor. 9:22) Napateg ti panangibagaybagay iti presentasiontayo tapno madanontayo ti puso dagiti tattao.
4 Anian a rag-o ti panangiburay kadagiti tattao iti “naimbag a damag ti maysa a banag a nasaysayaat”! (Isa. 52:7) Sapay koma ta ‘aramidentayo ti amin a bambanag maipagapu iti naimbag a damag’ tapno madanontayo ti adu a tattao aginggat’ mabalin.—1 Cor. 9:23.