Mangipakita iti Personal nga Interes—Babaen ti Kinamanagpaliiw
1 Ammo unay ni Jehova a Dios ken ni Kristo Jesus no ania ti kasapulan dagiti tattao ken madadaanda a tumulong. (2 Cron. 16:9; Mar. 6:34) No mailasintayo dagiti paginteresan ken pakaseknan dagiti makasabaantayo, maibagaytayo ti wagastayo a mangidatag iti naimbag a damag.
2 Agbalin a Nasiput Kadagiti Bambanag: Managpaliiw ni Jesus. (Mar. 12:41-43; Luc. 19:1-6) Umasping iti dayta, no umasidegtayo iti ruangan ti bumalay ket makitatayo nga adda narelihiosuan a dekorasion, islogan kadagiti lugan, wenno ay-ayam iti paraanganda, makaparnuaytayo kadagiti gundaway tapno sieepektibo a maikasabatayo ti naimbag a damag.
3 Dagiti ekspresion ti rupa ken kababalin ti maysa a tao mabalin nga ipamatmatna ti rikriknana. (Prov. 15:13) Nalabit kasapulanna ti liwliwa gapu iti ipupusay ti maysa a patpatgenna iti biag wenno gapu iti dadduma pay a makapaupay a kasasaad. Mabalin nga apresiarenna no ibasaantayo iti sumagmamano a maitutop a teksto. (Prov. 16:24) Agap-apura kadi a pumanaw ti bumalay wenno nakaubba iti agsangsangit nga ubing? No kasta, nasaysayaat nga iyurnosyo ti agsubli iti sabali a tiempo. No mannakaawat ken mannakipagriknatayo, mabalin a matignay ti bumalay a dumngeg inton agsublitayo.—1 Ped. 3:8.
4 Ibagayyo Dagiti Komentoyo: Napaliiw ni apostol Pablo nga addaan ti siudad ti Atenas iti altar a “Maipaay iti Dios a Di Am-ammo.” Daytoy ti nangapektar iti wagas a panangidatagna iti naimbag a damag, ta kinunana: “Ti saanyo nga ammo a pangipapaayanyo ti nadiosan a debosion, isu daytoy ti ibunannagko kadakayo.” Ti nataktika a pamay-an ni Pablo ti nangtignay kadagiti dadduma nga adda sadiay a mangipangag iti mensahe ti Pagarian ket nagbalinda a manamati.—Ara. 17:23, 34.
5 Umasping iti dayta, ti kinamanagpaliiwtayo tulongannatayo a mangilasin iti paginteresan ti maysa a tao, iti kasta maibagaytayo ti pamay-antayo. Agusarkayo kadagiti saludsod a mangtignay iti bumalay a mangyebkas iti kapanunotan wenno rikriknana. Mangpanunotkayo kadagiti teksto a mangparayray iti interesna. (Prov. 20:5) Ti kinamanagpaliiw ken personal a pannakaseknantayo kadagiti sabsabali tulongannatayo a mangiranud a sisisigo iti naimbag a damag.