Kabaelan Kadin ti Anakmo ti Agdesision?
1. Ania ti takder dagiti agtutubo a Saksi maipapan iti pakausaran ti dara? Mangtedka iti pagarigan.
1 Desision maipapan iti ania? Panangyalison iti dara. Kas naipakita iti artikulo a napauluan iti “Magna kas Insuro ni Jehova” iti Hunio 15, 1991 a ruar Ti Pagwanawanan, dagiti annak dagiti Saksi ni Jehova nasken nga addaanda iti nalawag ken natibker a takder tapno mapaneknekanda a ti tarigagayda nga agtulnog iti linteg ti Dios maipapan iti dara ket napateg kadakuada a kas met kadagiti dadakkelda. Maikalikagum kadi met dayta iti menor de edad nga anakmo?
2. Ania a legal a pagalagadan ti impakat ti maysa a korte iti menor de edad a nagkedked a mayalisonan iti dara, ken ania ti maadal iti daytoy dagiti Kristiano a nagannak ken dagiti menor de edad nga annakda?
2 Ania ti Kuna ti Linteg? Iti panangrepaso iti kaso ti 17 ti tawenna a kabsat a babai a nagkedked a mayalisonan iti dara, kastoy ti imbilin ti Korte Suprema iti Illinois idiay Estados Unidos: “No nabatad ken makakombinsir ti ebidensia a ti menor de edad ket kabaelannan ti agdesision a bukbukod, a matarusanna dagiti pagbanagan dagiti tignayna, [ken] kasla nataenganen nga agdesdesision, ngarud, maibatay iti linteg para kadagiti menor de edad a nataenganen ti panagpampanunotna, adda karbenganna a mangikeddeng no anamongan wenno pagkedkedanna ti panangagas.” Gapuna, tapno matingiting no ti ubing ket nataenganen nga agdesdesision, dagiti doktor wenno opisial mabalinda a kauman ti pasiente tapno mangngegda ti panagkedkedna nga agpayalison iti dara. Nasken a matarusan a naimbag ti agtutubo no kasano kakaro ti sakitna ken dagiti ibunga ti pilienna a kita ti pannakaagas ken iyebkasna a silalawag ken sititibker ti narelihiosuan a patpatienna maipapan iti linteg ti Dios mainaig iti dara.
3. Ania dagiti saludsod a masapul nga usigen a naimbag dagiti nagannak, ken apay?
3 Ania ti Ibaga ti Anakmo? Nakasagana kadin dagiti annakmo a mangyebkas iti takderda maipapan iti daytoy nga isyu? Naimpusuan kadi a patienda a naggapu iti Dios ti bilin nga ‘umadayo iti dara’? (Ara. 15:29; 21:25) Mailawlawagda kadi ti patpatienda manipud iti Kasuratan? No patien dagiti doktor nga agpegpeggad ti biagda, matakderanda ngata a situtured ti natibker a desisionda maipapan iti dara uray no awan dagiti dadakkelda? Tangay ti “tiempo ken ti di mapakpakadaan a pasamak mapagteng [kadatayo] amin,” kasanoyo a maisagana dagiti annakyo iti di mapakpakadaan a pannakasubok ti kinatarnawda?—Ecl. 9:11; Efe. 6:4.
4, 5. (a) Ania ti responsabilidad dagiti nagannak, ken kasano a maitungpalda dayta? (b) Ania dagiti probision a makatulong kadagiti nagannak?
4 Nagannak, Ania ti Maaramidanyo? Responsabilidadyo nga isuro kadagiti annakyo ti panangmatmat ti Dios maipapan iti dara. (2 Tim. 3:14, 15) Masarakan iti libro a Pannakirinnason, panid 102-6 ti nabatad a pannakailawlawagna. Adalenyo dayta a naimbag a kadua ti pamiliayo. Tapno matulonganyo dagiti annakyo a maaddaan iti kapadasan a mangilawlawag no ania ken no apay a kasta ti patpatienda, ensayuenyo a kadua dagiti annakyo ti paset a “No Adda Agkuna—” iti panid 106-8. (1 Ped. 3:15) Ti dadduma pay a katulongan a makaisuro kadatayo maipapan iti dara ket ti broshur a Kasano nga Ispalen ti Dara ti Biagyo? ken Ti Pagwanawanan a Hunio 15, 2004, panid 14-24. Kanayonanna, dagiti video a Transfusion-Alternative Health Care—Meeting Patient Needs and Rights ken No Blood—Medicine Meets the Challenge, a maala itan iti DVD a napauluan iti Transfusion Alternatives—Documentary Series, mangipaayda iti makakombinsir nga impormasion maipapan iti kinanainkalintegan ken kinaepektibo ti panangagas ken panagopera a di agusar iti dara. Nabiit pay kadi a binuya ken pinagsasaritaan ti pamiliayo dagitoy a presentasion?
5 Tulonganyo dagiti annakyo a ‘mangpaneknek iti bagbagida no ania ti naimbag, makaay-ayo, ken naan-anay a pagayatan ti Dios’ maipapan iti dara. Iti kasta, makaaramidda iti desision a bendisionan ni Jehova.—Roma 12:2.