Patanorenyo ti Apresasion Kadagiti Awan Kapadpadna a Galad ni Jehova
1 Iti ministeriotayo, saantay laeng nga isuro kadagiti sabsabali dagiti pamunganayan a kinapudno iti Biblia no di ket tulongantayo ida a mangam-ammo ken ni Jehova kas maysa a persona ken patanorentayo ti apresasionda kadagiti awan kapadpadna a galadna. Dakkel ti epektona kadagiti napudno ti panagpuspusoda a tattao no maammuanda ti kinapudno maipapan iti Dios, ta matignayda a mangaramid kadagiti panagbalbaliw iti biagda ‘tapno makapagnada a maikari ken Jehova iti panggep a panangay-ayo a naan-anay kenkuana.’—Col. 1:9, 10; 3:9, 10.
2 Ti Baro a Katulongantayo iti Panangyadal: Itampok ti rugrugi ti libro nga Isursuro ti Biblia dagiti galad ni Jehova. Ti umuna a kapitulo sungbatanna dagiti saludsod a: Pudno kadi a maseknan kenka ti Dios?, Ania aya ti Dios? ken Mabalin kadi ti umadani iti Dios? Dayta a kapitulo itampokna met ti kinasanto ni Jehova (par. 10), ti kinahustisia ken asina (par. 11), ti kinamanagayatna (par. 13), ti kinamannakabalinna (par. 16), ken ti kinamanangngaasi, kinamanagparabur, kinamasindadaanna a mamakawan, kinaanus, ken kinasungdona (par. 19). Kas panggupgop, kuna ti parapo 20: “No ad-adu ti ammom maipapan ken Jehova, agbalin nga ad-adda a napaypayso kenka ken dakdakkel ti panggapuam a mangayat ken umadani kenkuana.”
3 Kasanotayo nga usaren ti libro nga Isursuro ti Biblia tapno matulongan dagiti estudiante iti Biblia nga umadani ken Jehova? Kalpasan ti panangusigtayo iti parapo a mangitampok iti maysa kadagiti galad ni Jehova, mabalin nga isaludsodtayo iti estudiante, “Ania ti nasursurom iti daytoy maipapan ken ni Jehova kas maysa a persona?” wenno “Kasano nga ipakita daytoy a maseknan kenka ti Dios?” Babaen ti sagpaminsan a panangusar kadagiti kasta a saludsod bayat ti panagadal, maisurotayo kadagiti iyad-adalantayo no kasano ti mangutob kadagiti maad-adalda ken matulongantayo ida a mangpatanor iti apresasion kadagiti awan kapadpadna a galad ni Jehova.
4 Usaren ti Kahon a Pangrepaso: Iti ngudo ti tunggal kapitulo, pagkomentuenyo ti estudiante iti bukodna a sasao iti tunggal punto iti kahon a “No Ania ti Isursuro ti Biblia.” Iturongyo ti atensionna kadagiti naisitar a teksto. Tapno maaonyo no ania ti adda iti puso ti estudiante, mabalin a sagpaminsan nga isaludsodyo, “Ania ti makunam maipapan iti isursuro ti Biblia iti daytoy a punto?” No aramidenyo dayta, saanyo laeng a maipaganetget dagiti kangrunaan a punto iti kapitulo no di ket matarusanyo pay no ania a talaga ti patpatien ti estudiante. Daytoy ti tumulong iti estudiante a mangpatanor iti relasionna ken ni Jehova.