Nangipaayda iti Ulidan ti Kinamatalek
1 Adda baro a benneg ti amin-tiempo a panagserbi ditoy Pilipinas a nangrugi idi 1954 —ti panagserbi kas special pioneer. Dagiti makabael a lallaki ken babbai nga addaan kapadasan iti Nakristianuan a ministerio, sidadaan nga inawatda dagiti annongen nga agserbi iti sadinoman a pangibaonan kadakuada ti organisasion. Ita, kalpasan ti sumagmamano a dekada, agtultuloy a mangipapaay dagiti special pioneer iti ulidan ti kinamatalek a maikari a tuladen.—Heb. 6:12.
2 Mangidadauloda: Idi damo, indaulo dagiti special pioneer ti trabaho a panangasaba kadagiti lugar nga awan ti Saksi, nangnangruna kadagiti Isla iti Visayas ken iti Mindanao. Sinarungkaranda dagiti amin nga interesado ken inyadalanda ida iti Biblia. Gapu iti kinapingetda, ginasut a baro a kongregasion ti nabuangay. Ti awan sardayna a panangasabada ket nagdakkel ti naitulongna iti nakaskasdaaw nga irarang-ay ti organisasion a maim-imatangantayo ita. (Isa. 60:22) Agtultuloy a napateg ti akem dagiti special pioneer iti pannakaikasaba ti naimbag a damag “iti isuamin a parsua nga adda iti baba ti langit.”—Col. 1:23.
3 Maikarida a Tuladen: Dadduma nga special pioneer ti sumagmamanon a dekada nga agserserbi iti amin-tiempo a ministerio. Iti panaglabas dagiti tawen, napasudi ti pammati dagitoy a nasungdo a lallaki ken babbai iti sidong ti nadumaduma a kasasaad. (1 Ped. 1:6, 7) Sidadaanda a nangisakripisio kadagiti material a pagnam-ayan tapno makapagserbida kadagiti lugar a dakdakkel ti panagkasapulan. Dadduma ti lallakay ken babbaketen ken nakapuyen ti salun-atda, wenno maipaspasangoda kadagiti narikut a kasasaad. (2 Cor. 4:16, 17) Kaskasdi, ‘agtultuloyda nga agbarusbos bayat ti kinaubanan.’ (Sal. 92:14) Agtalekda ken Jehova ket mapasaranda ti pamendisionna.—Sal. 34:8; Prov. 10:22.
4 Sigurado a maikari dagiti special pioneer iti naimpusuan a komendasiontayo. No adda dagiti special pioneer a naidestino iti kongregasionyo, gundawayanyo ti oportunidad a makikadua kadakuada tapno magunggonaankayo kadagiti kapadasanda. Apresiarenyo ti panagserbida kas matalek a manangiwaragawag iti Pagarian. Maparegtakayo iti kinatibkerda. Amin a tumulad iti pammatida matagiragsakda met ti anamong ken pamendision ni Jehova gapu ta “dagidiay agtignay iti kinamatalek makaparagsakda kenkuana.”—Prov. 12:22.