Dagiti Saludsod

◼ Kadagiti ania a praktikal a pamay-an a matulongantayo dagiti payunir?

Idi 2009 a tawen serbisio, agarup 800,000 a kakabsat iti intero a lubong ti nagserbi kas regular ken special pioneer. Dagitoy nga agserserbi iti amin a tiempo insakripisioda ti umuna a bungbunga ti tiempo, pigsa, ken material a sanikuada tapno maiwaragawagda ti naimbag a damag maipapan iti Pagarian. (Prov. 3:9) Naay-ayo la ketdi ni Jehova iti kinapingetda! Kadagiti ania a wagas a matuladtayo ti panangmatmat ni Jehova ken matulongantayo dagiti payunir a maaddaan iti rag-o ken makapagtultuloy kas payunir?

Sigurado a ti nasayaat a sasaotayo maparegtana ida nga agtultuloy kas payunir. (Prov. 25:11) Mabalintayo kadi a baliwan ti linawas nga eskediultayo tapno makaduatayo ida iti ministerio? No makikaduatayo kadakuada, nalabit isingasingtayo nga usarentayo ti lugantayo imbes a ti luganda. Ken no makikalugantayo kadakuada, mabalin a mangtedtayo iti para gasolina. (1 Cor. 13:5; Fil. 2:4) Maipakitatayo ti naayat a panangsuportatayo kadakuada no padagusen ken sagpaminsan nga awisentayo ida a mangan iti balaytayo.—1 Ped. 4:8, 9.

Ipasigurado ti Kasuratan nga ipaay ni Jehova dagiti kasapulan dagidiay mangyun-una iti Pagarianna. (Sal. 37:25; Mat. 6:33) Ti maysa a pamay-an nga ar-aramidenna daytoy ket babaen ti naayat a Nakristianuan a panagkakabsattayo. (1 Juan 3:16-18) Siempre, saan a namnamaen dagiti payunir nga ibaklay dagiti kakabsat dagiti pinansial a kasapulanda. Ken mabalin a mabainda met a mangibaga no ania dagiti kasapulanda. Nupay kasta, matulongantayo dagitoy a matalek a payunir ken ‘maan-anaytayo dagiti pagkurkuranganda’ kadagiti praktikal a pamay-an no managpaliiw ken sipapanunottayo kadakuada.—2 Cor. 8:14, 15.

Idi nagpa-Roma ni Febe, a naregta nga ebanghelisador iti kongregasion idiay Cencrea idi umuna a siglo, imparegta ni Pablo kadagiti kakabsat idiay Roma: “Isu abrasaenyo iti Apo iti wagas a maikari iti sasanto, ken . . . tulonganyo iti aniaman a banag a mabalin a pakasapulanna kadakayo.” (Roma 16:1, 2) Addaantayo iti oportunidad a mangipakita iti isu met laeng a naayat a panangsuporta kadagiti regular ken special pioneer iti kongregasiontayo nga agtultuloy a mangiwarwaragawag iti naimbag a damag.—Ara. 5:42.

◼ Umiso Kadi ti Mangiplastar iti Dakkel a Ladawan ni Jesus Kabayatan ti Memorial?

Para kadagiti pudno a Kristiano, ti panangiladawan kadagiti eksena ken tattao iti Biblia ket agserbi laeng a dekorasion a mangyilustrar ken mangisuro. Saan a mausar dagitoy iti panagdaydayawtayo ken Jehova. (2 Corinto 5:7; kitaenyo ti The Watchtower, May 15, 1972, pages 295-296.) Kadagiti dadduma a Kingdom Hall, adda nakaplastar a sumagmamano a napipintas a ladawan dagiti eksena iti Biblia. Saan met ketdi a dakes dayta.

Ngem no maipapan iti panangrambak iti Pangrabii ti Apo, saan a maitutop ti mangiplastar iti ladawan ni Jesus. Masapul a ti emblema nga adda iti lamisaan ken ti palawag ti nangnangruna a pakaiturongan ti atensiontayo. Kayattayo met nga ikabilangan dagiti kabbaro a tumabuno, a ti dadduma kadakuada ket mabalin a ti ladawan ni Jesus ti ad-adda a pangituronganda iti atensionda wenno mabalin a pagrukbabanda pay ketdi gapu iti dati a narelihiosuan nga an-annurotenda. Iti Roma kapitulo 14 ken 1 Corinto kapitulo 10, impakita ni apostol Pablo a nasken nga ikabilangantayo ti konsiensia dagiti dadduma, uray dagidiay nalaka a maitibtibkol gapu iti napalabas a kapadasanda.