Kasano ti Panangmatmatko Kadagiti Babbabassit a Kapaset ti Dara ken iti Panangagas a Pakausaran ti Mismo a Darak?
Ibilin ti Biblia kadagiti Kristiano nga “umadayoda iti . . . dara.” (Ara. 15:20) Gapuna, dagiti Saksi ni Jehova saanda nga agpayalison iti dara wenno iti uppat a kangrunaan a pasetna—ti nalabaga a selula, puraw a selula, platelet, ken plasma. Saanda met nga idonar ti darada agpaay iti dadduma wenno ipaidulin dayta tapno mayalison kadakuada inton agangay.—Lev. 17:13, 14; Ara. 15:28, 29.
Ania dagiti blood fraction wenno babbabassit a kapaset ti dara, ken apay a ti tunggal Kristiano ti mangikeddeng no usarenna dayta wenno saan?
Dagiti babbabassit a kapaset ti dara ket dagiti elemento a naala manipud iti dara babaen ti proseso a maawagan iti fractionation wenno panamagsisina kadagiti paset ti dara. Kas pagarigan, ti plasma a maysa kadagiti uppat a kangrunaan a paset ti dara, ket mabalin a masinasina kadagiti sumaganad a substansia: danum, agarup 91 a porsiento; protina, kas kadagiti albumin, globulin, ken fibrinogen, agarup 7 a porsiento; ken dadduma pay a substansia, kas kadagiti sustansia, hormone, gas, bitamina, rugit ti bagi, ken electrolyte, agarup 1.5 a porsiento.
Ti bilin nga adaywantayo ti dara ramanenna met kadi dagiti babbabassit a kapaset ti dara? Ditay masinunuo. Saan a nangipaay ti Biblia iti espesipiko a bilin maipapan kadagiti babbabassit a kapaset ti dara. Siempre, adu a babbabassit a kapaset ti dara ti naala manipud iti naidonar a dara a mausar iti panangagas. Ikeddeng ti tunggal Kristiano sigun iti konsiensiana no awatenna wenno saan ti panangagas a pakausaran dagitoy a substansia.
No agar-aramidka kadagiti kasta a desision, usigem dagiti sumaganad a saludsod: Maawatak kadi a no diak awaten ti amin a babbabassit a kapaset ti dara, kaipapananna a diak awaten ti dadduma nga agas, kas kadagidiay mangpapigsa iti resistensiak kontra iti sumagmamano a virus ken sakit, wenno dagidiay makatulong iti panagbalay ti dara, tapno agsardeng ti panagpadarak? Mailawlawagko kadi iti doktor no apay nga ipalubosko wenno diak ipalubos ti pannakausar ti sumagmamano a babbabassit a kapaset ti dara?
Apay a siak ti mangikeddeng no awatek ti dadduma a pamay-an ti panangagas a pakausaran ti mismo a darak?
Nupay saan nga idonar wenno ipaidulin dagiti Kristiano ti mismo a darada a mausarto iti panangyalison, dadduma a panangagas wenno panangeksamen iti mismo a dara ti tao ket saan unay a nalawag a maisalungasing kadagiti prinsipio ti Biblia. Gapuna, ikeddeng ti tunggal maysa sigun iti ipalubos ti konsiensiana no awatenna wenno saan ti dadduma a kita ti panangagas a pakausaran ti mismo a darana.
No agdesisionka, iyimtuodmo iti bagim: No ti dadduma a darak ket maipadalan iti makina ken nalabit apagbiit a masinga ti panagtarayna, ipalubos kadi ti konsiensiak a matmatak dayta a dara kas paset pay laeng ti bagik, isu a saan a masapul a ‘maiparukpok iti daga’? (Deut. 12:23, 24) Maburibor ngata ti sinanay ti Biblia a konsiensiak no kabayatan nga ag-agasandak, mangalada iti darak, baliwanda ti pakabuklanna, sa isublida met laeng iti bagik? Matarusak kadi a no diak awaten ti amin a kita ti panangagas a pakausaran ti mismo a darak kaipapananna a pagkedkedak dagiti panangagas a kas iti dialysis wenno ti pannakausar ti heart-lung machine? Inkararagko kadin daytoy a banag sakbay a nagdesisionak?
Ania dagiti pangngeddengko?
Usigem ti dua a work sheet kadagiti sumaganad a panid. Nailista iti Work Sheet 1 ti sumagmamano kadagiti babbabassit a kapaset ti dara ken no kasano a maus-usar dagita iti panangagas. Kur-itam no ania ti desisionmo, no awatem wenno saan ti tunggal maysa kadagitoy a babbabassit a kapaset ti dara. Nailista iti Work Sheet 2 ti sumagmamano a gagangay a pamay-an ti panangagas a pakausaran ti mismo a daram. Kur-itam no ania ti desisionmo, no awatem wenno saan dagitoy a pamay-an. Dagitoy a work sheet ket saan a legal a dokumento, ngem makatulong dagiti sungbatmo kadagitoy tapno makompletom ti impormasion iti DPA (durable power of attorney) card-mo.
Sika koma a mismo ti agdesision saan ket a ti sabsabali. Awan met koma ti mangbabalaw kadagiti desision ti dadduma pay a Kristiano. Kadagitoy a banag, “tunggal maysa awitennanto ti bukodna” a responsabilidad.—Gal. 6:4, 5.
Palagip: Nagduduma ti wagas dagiti doktor a mangaramid kadagitoy a pamay-an ti panangagas. Rumbeng a pailawlawagmo iti doktormo ti eksakto a ramanen ti aniaman a maisingasing a pamay-an ti panangagas tapno masiguradom a maitunos dayta kadagiti prinsipio ti Biblia ken kadagiti desision nga ipalubos ti konsiensiam.