Sarungkaram Dagiti Amin a Mangipakita iti Interes
1 Adu kadatayo ti adda ita iti kinapudno gapu ta adda nakapaliiw iti positibo a reaksiontayo iti mensahe ti Pagarian ken siaanus a sinarsarungkarannatayo—nalabit iti sumagmamano a daras—tapno rumayray dayta nga interes. Nasken a nagagettayo met ngarud a mangsarungkar kadagiti amin a mangipakita iti interes. Wen, ti panagsarungkar ket karaman iti annongentayo a ‘mangaramid iti ad-adalan.’—Mat. 28:19, 20.
2 Siputam No Interesado: Uray no ti maysa a tao ket saan a mangala iti literatura, madlawtayo no adda panangapresiarna iti mensahe ti Pagarian babaen ti ekspresion ti rupana ken iti panagsasaona. Dayta ti panggapuantayo a mangsarungkar kenkuana. Adda kabsat a lalaki a nangsarungkar iti maysa a lalaki iti agsasaruno a lima a lawas ngem saan a nakaipaima iti literatura. Iti maikanem nga isasarungkarna, ti lalaki ket nangalan iti literatura ken nayadalan iti Biblia idi agangay.
3 No madlawmo nga interesado ti maysa a tao, subliam a dagus, nalabit kalpasan ti sumagmamano nga aldaw. Dimo ikkan iti gundaway “daydiay nadangkes” a mangrabsut iti naimula iti puso dayta a tao. (Mat. 13:19) Siguraduem a tungpalem ti karim no nagtulagkayo a sarungkaram iti espesipiko nga aldaw ken oras.—Mat. 5:37.
4 Iti Panangasaba iti Lansangan: Ikagkagumaam met laeng kadi a surnadan ti interes dagidiay nakasaritam iti lansangan wenno nakasabaam iti di pormal? Iti ngudo ti saritaanyo, mabalinmo a kunaen: “Maragsakanak iti panagsaritata. Sadino ti pakasarakak kenka tapno makapagsaritatanto manen?” No maitutop, adda dagiti agibumbunannag nga isudan ti mangited iti numero ti teleponoda wenno, alaenda met ti numero ti telepono dagiti interesado. No makita dagiti tattao a kanayon a mangaskasabaka iti lansangan ken iti isu met laeng a lugar, mabalin a saanda nga agkedked a mangited kenka iti numero ti telepono wenno adresda. Uray no agkedkedda a mangted iti adres wenno numero ti teleponoda, maparayraymo latta ti interesda inton makitam manen ida iti lansangan.
5 Makaparagsak no makitatayo a lumanglangto dagiti mula a sinibugan ken sinukaytayo. Umasping iti dayta, dakkel met a rag-o ti apitentayo no sarungkaran ken tulongantayo dagiti indibidual a rumang-ay iti naespirituan. (1 Cor. 3:6) Ikagumaam ngarud a sarungkaran dagiti amin a mangipakita iti interes.