“Ania ti Sungbatmo?”

1. Ania a karit ti pakaipaspasanguan ti adu kadatayo?

¹ Ipatpategmo kadi ti Sao ti Dios ngem marigatanka a manglagip kadagiti detalye maipapan kadagiti salaysay ti Biblia wenno no ania a teksto ti nakailanadan dagiti espesipiko a sasao? Kayatmo kadi a matarusan a naimbag dagiti annakmo dagiti pamunganayan a kinapudno ken sursuro ti Biblia? Ti espesial nga artikulo nga “Ania ti Sungbatmo?” a binulan a maipabpablaak iti panid 31 ti Agriingkayo! ket makatulong kadagiti agtutubo ken nataengan tapno ad-adda a matarusanda ti Sao ti Dios.—Ara. 17:11.

2. Kasano a mausar ti nagduduma a paset ti artikulo nga “Ania ti Sungbatmo?”

² Kasano a mausarmo a naimbag daytoy nga artikulo? Kastoy ti insingasing ti Enero 2006 a ruar ti Agriingkayo!: ‘Sukimatem biit ti panid 31. Makaay-ayo kadagiti agbasbasa nga agtutubo ti dadduma a paset dayta a panid; idinto ta ti dadduma, pagpanunotenna dagiti nabaybayagen nga agad-adal iti Biblia. Kas pagarigan, ti pasetna a “Kaano a Napasamak?” tulongannaka a mangammo kadagiti pasamak bayat ti panaglabas ti tawen a mangipakita no kaano a nagbiag dagiti karakter iti Biblia ken no kaano a natungpal dagiti kangrunaan a pasamak. Dagiti sungbat ti kaaduan kadagiti saludsod ket agparang iti espesipiko a panid iti daytoy met la a ruar, a balinsuek ti pannakaimalditna, idinto ta masarakan iti intero a magasin dagiti sungbat ti paset nga “Iti Daytoy a Ruar.” Apay a dika agsukimat sakbay a basaem dagita a sungbat ket kalpasanna, iranudmo iti sabsabali dagiti nasursurom? Mabalinyo met nga usaren daytoy a baro nga artikulo, nga “Ania ti Sungbatmo?” kas pangibatayan ti sangapamiliaan wenno grupo a panagsasaritayo maipapan iti Biblia.’

3. Kasano a nagunggonaan ti dadduma a pamilia iti daytoy nga artikulo, ken ania a paset ti kaay-ayoyo unay?

³ Kinapudnona, kaay-ayo ti adu a pamilia nga usaren daytoy nga artikulo kas pangibatayan ti sangapamiliaan a panagadalda. Insurat ti maysa nga ina: “Napanunotmi nga agassawa a nasayaat nga iramanmi ti paset nga ‘Ubbing, Birokenyo Dagiti Ladawan’ iti panagadalmi kas pamilia tapno nabiag ken makapainteres dayta iti tallo ti tawenna a balasitangmi. Maragragsakankami a mangbuybuya kenkuana bayat a magaggagaran a mangala iti bukodna a kopia ti Agriingkayo! ket lukibenna ti tunggal panid agingga a masarakanna ti birbirokenna.” Kinuna ti maysa nga ama a taga-Brazil: “Siak ken ti pito ti tawenna nga anakko kaay-ayomi unay daytoy nga artikulo ti Agriingkayo! Tinulonganna ni Moises nga agimdeng, mangbirok kadagiti teksto ti Biblia, mangapresiar kadagiti ladawan, ken mangtarus kadagiti petsa.” Insurat ni Ashley nga agtawen iti walo: “Pagyamanan iti artikulo nga ‘Ania ti Sungbatmo?’ iti makinlikud nga akkub ti Agriingkayo! Nagadu ti naadalko maipapan iti Biblia gapu iti dayta.”

4. Kasano nga usaren ti maysa a pamilia ti artikulo nga “Ania ti Sungbatmo? kas paset ti sangapamiliaan a panagadalda iti Biblia?

⁴ Apay a diyo usigen sagpaminsan ti artikulo nga “Ania ti Sungbatmo?” kas paset ti sangapamiliaan a panagadalyo? Mabalinyo nga usaren ti Index wenno ti CD-ROM a Watchtower Library no birokenyo ti sungbat dagiti dadduma a narigat a saludsod. Iti kasta, masursuruanyo dagiti annakyo no kasano ti agsukimat. No adda dadakkelen nga annakyo, apay a diyo dutokan ida nga agsukimat kadagiti sungbat ti paset nga “Asinoak?” wenno ti “Kaano a Napasamak?” sakbay ti panagadalyo kas pamilia? Mabalin a mairanudda ti nasukimatda kabayatan ti panagadal. Ti epektibo a panangusar iti daytoy a panid ket maysa a pamay-an tapno dagiti nagannak maitukitda ti Sao ti Dios kadagiti annakda, a tulonganda ida a mangammo iti “nasantuan a sursurat” manipud kinamaladaga.—2 Tim. 3:15; Deut. 6:7.