Kadagiti Agbasbasa
MANGRUGI iti daytoy a ruar, adda sumagmamano a panagbalbaliw iti pakabuklan ti Agriingkayo! Nupay sabali ti dadduma a linaonna, kaaduan ket saan a nabaliwan.
Saan a nagbalbaliw ti panggep ti Agriingkayo! nga inkarina iti adun a dekada. Kas nailawlawag iti panid 4, ‘maipabpablaak daytoy a magasin nga agpaay a pakalawlawagan ti intero a pamilia.’ Babaen iti panangsukimatna kadagiti pasamak iti lubong, panangyam-ammona kadagiti tattao iti nadumaduma a kultura, panangdeskribirna kadagiti nakaskasdaaw a parsua, panangisalaysayna iti salun-at, wenno panangilawlawagna iti siensia para kadagiti saan a sientista, itultuloy ti Agriingkayo! a pakaammuan dagiti agbasbasa, tapno agsalukagda kadagiti mapaspasamak iti intero a lubong.
Iti ruarna nga Agosto 22, 1946, kastoy ti inkari ti Agriingkayo!: “Ti nainget a panangannurot iti kinapudno ti katan-okan a panggep daytoy a magasin.” Agsipud ta napudno iti dayta a kari, kanayon nga inkagumaan ti Agriingkayo! nga ipablaak dagiti napudno ken agpaypayso nga impormasion. Gapu iti dayta, naan-anay ken siaannad a nasukimat dagiti artikulo tapno masigurado ti kinaumisoda. Ngem impakita daytoy a magasin ti “nainget a panangannurotna iti kinapudno” iti napatpateg pay a wagas.
Nupay ti Agriingkayo! kanayon nga inturongna dagiti agbasbasa iti Biblia, mangrugi iti daytoy a ruar, ad-adunto pay a naibasar iti Biblia nga artikulo ti iruarna ngem iti napalabas. (Juan 17:17) Itultuloy met ti Agriingkayo! ti mangitampok kadagiti artikulo a mangisuro no kasano a makatulong kadatayo ti praktikal a balakad ti Biblia tapno makapagbiagtayo a siraragsak ken sibaballigi ita. Kas pagarigan, nagadu a naibasar iti Biblia a panangiwanwan ti maipapaay iti serye nga “Agimtuod Dagiti Agtutubo . . .” ken “Ti Panangmatmat ti Biblia,” nga agtultuloy a maipablaak iti daytoy a magasin. Maysa pay, ti Agriingkayo! itultuloyna nga iturong dagiti agbasbasa iti kari ti Biblia a natalna a baro a lubong nga asidegen a mangsukat iti agdama a dakes a sistema dagiti bambanag.—Apocalipsis 21:3, 4.
Ania pay ti naiduma? Mangrugi iti daytoy a ruar, binulan laengen a maipablaak ti Agriingkayo! iti kaaduan kadagiti 82 a lenguahe a pakaipabpablaakanna (dati a maipabpablaak iti mamindua iti makabulan iti adu a lenguahe).a Ti “Panangmatmat iti Lubong,” a kanayon a naipablaak iti Ingles sipud idi 1946, agparangto iti kada ruar ngem maysa laengen a panid imbes a dua. Iti panid 31, rugianmi met ti makapainteres a baro a paset a napauluan, “Ania ti Sungbatmo?” Ania ti linaonna, ken kasano nga usarem dayta?
Sukimatem biit ti panid 31 daytoy a ruar. Magustuanto dagiti agtutubo ti dadduma a paset dayta a panid. Dadduma pagpanunotenda dagiti nabaybayagen nga agad-adal iti Biblia. Kas pagarigan, ti pasetna a “Kaano a Napasamak?” tulongannaka a mangaramid iti listaan dagiti napapateg a pasamak a mangipakita no kaano a nagbiag dagiti karakter iti Biblia ken no kaano a natungpal dagiti napapateg a pasamak. Dagiti sungbat ti kaaduan kadagiti saludsod ket agparang iti espesipiko a panid iti daytoy met la a ruar, a balinsuek ti pannakaimalditna, idinto ta masarakan iti intero a magasin dagiti sungbat ti paset nga “Iti Daytoy a Ruar.” Apay a dika agsukimat sakbay a basaem dagiti sungbat ket kalpasanna, iranudmo iti sabsabali dagiti naammuam? Mabalin met nga usarenyo daytoy baro a paset kas pagibasaran ti sangapamiliaan wenno inggrupo a panagsasarita maipapan iti Biblia.
Agarup 60 a tawen ti napalabasen, kastoy ti inkari ti Agriingkayo!: “No maipapan kadagiti saklawenna, ikagumaan daytoy a magasin nga iparang dagiti impormasion sigun iti panangmatmat ti intero a lubong imbes nga iti maysa laeng a pagilian. Makapainteres daytoy iti amin a nasingpet ti panagpuspusoda a tattao iti amin a pagilian. . . . Dagiti material ken linaon daytoy a magasin . . . ket makaipaay iti impormasion, makaisuro ken makapainteres iti kaaduan a tattao, agtutubo man ken nataengan.” Umanamong dagiti agbasbasa iti intero a lubong a tinungpal ti Agriingkayo! ti karina. Ipasiguradomi kadakayo nga agtultuloy ngaaramidenna dayta.
Dagiti Agipabpablaak
[Footnote]
a Iti dadduma a lenguahe, maipabpablaak ti Agriingkayo! iti maminsan iti kada tallo a bulan isu a nalabit saan nga agparang kadagita nga edision ti dadduma a naisalaysay iti daytoy nga artikulo.
[Dagiti Ladawan iti panid 3]
Nupay napanaganan iti “The Golden Age” idi 1919, nabaliwan ti naganna iti “Consolation” idi 1937, ken “Awake!” idi 1946
[Dagiti Ladawan iti panid 4]
Ti “Agriingkayo!” nabayagen nga iturturongna dagiti agbasbasa iti Biblia
[Credit Lines]
Dagiti paltog: Retrato a kukua ti U.S. National Archives; mabisbisinan nga ubing: Rinetrato ni W. Cutting para iti WHO