Kadagiti Agbasbasa

MARAGSAKANKAMI a mangipakaammo kadakayo a mangrugi iti daytoy a ruar, adda sumagmamano a panagbalbaliw iti pakabuklan Ti Pagwanawanan. Sakbay nga ilawlawagmi dagita a panagbalbaliw, kayatmi a dakamaten dagiti saan a nabaliwan.

Saan a nabaliwan ti nagan daytoy a magasin a Ti Pagwanawanan Mangibumbunannag iti Pagarian ni Jehova. Gapuna, itultuloy Ti Pagwanawanan nga idaydayaw ni Jehova kas ti pudno a Dios ken liwliwaen dagiti agbasbasa babaen iti naimbag a damag ti Pagarianna. Iti daytoy a ruar, salaysayen dagiti artikulo iti panid 5 agingga iti 9 no ania ti Pagarian ken no kaano nga umay dayta. Kanayonanna, itultuloy Ti Pagwanawanan a pabilgen ti panamati ken Jesu-Kristo, itandudo ti kinapudno nga isursuro ti Biblia, ken ilawlawag ti kaipapanan dagiti pasamak iti lubong babaen ti tulong dagiti padto iti Biblia, kas iti ar-aramidenna iti adun a dekada.

Ania ngarud dagiti nagbaliwanna? Kayatmi nga ilawlawag ti dadduma kadagiti makapainteres a baro a pasetna nga agparang iti edision a napetsaan iti 1 iti kada bulan.a

Iti kada bulan, adda agparang a sumagmamano a mamagpanunot nga artikulo. Ti paset nga “Ammoyo Kadi?” ket mangipaay kadagiti makapainteres a kanayonan nga impormasion a mangilawlawag iti kaipapanan dagiti napili a salaysay iti Biblia. Itampok ti paset nga “Umadanika iti Dios” dagiti banag a masursurotayo maipapan ken Jehova manipud kadagiti espesipiko a teksto iti Biblia. Ti paset a “Saludsod Dagiti Agbasbasa” ilawlawagna ti sungbat dagiti gagangay a saludsod maipapan iti Biblia. Kas pagarigan, adu a tattao ti mangyim-imtuod iti, “Adda kadi ti Pagarian ti Dios iti pusoyo?” Ti sungbat dayta ket masarakanyo iti panid 13.

Adda met dagiti regular a paset a nairanta a tumulong kadagiti pamilia. Iti paset a “Tulbek ti Naragsak a Pamilia,” a mamimpat nga agparang iti kada tawen, maiparang dagiti agpayso a kasasaad dagiti agparparikut a pamilia ken mailawlawag no kasano a makatulong dagiti prinsipio ti Biblia tapno marisut dagita. Iti kada maikadua a bulan, agparang ti paset nga “Isuroyo Kadagiti Annakyo” nga usaren dagiti nagannak bayat nga ibasaanda dagiti annakda. Ti kasinnublat dayta ket ti paset a “Para Kadakayo nga Agtutubo,” a mangibalabala iti proyekto a panagadal iti Biblia a nadisenio para kadagiti agtutubo.

Adda pay sumagmamano nga artikulo a mamimpat nga agparang iti kada tawen. Ti paset a “Tuladenyo ti Pammatida” iparegtana a tuladentayo ti ulidan ti maysa a karakter iti Biblia. Kas pagarigan, iti panid 18 agingga iti 21 daytoy a ruar, mabasayo ti maysa a makatukay a salaysay maipapan ken propeta Elias ken maammuantayo no kasanotay a matulad ti pammatina. Ti paset a “Surat Manipud . . . ” iparangna ti report manipud kadagiti misionero ken kadagiti sabsabali pay iti nadumaduma a paset ti lubong. “Ti Masursurotayo ken Jesus” isalaysayna dagiti kangrunaan a pannursuro ti Biblia iti simple a pamay-an.

Agtalekkami a Ti Pagwanawanan ket agtultuloy a magustuan dagiti agbasbasa a mangraraem iti Biblia ken dagidiay mayat a mangammo iti talaga nga isursuro dayta a libro. Mangnamnamakami a daytoy a magasin ti makatulong kadakayo a mangpennek iti pannakawawyo iti kinapudno nga isursuro ti Biblia.

DAGITI NANGIPABLAAK

[Footnote]