Us-usarenyo Kadi a Naan-anay?
1 “Magagaranakon a mangipaima iti daytoy!” Kasta ti insurat ti maysa a kabsat a babai kalpasan a nabasana ti Enero 1, 2008 a Pagwanawanan. Nausigmo kadin ti sumagmamano a benneg ti publiko nga edision, ken ammom kadin no kasanom nga ipaima daytoy idiay pangasabaan?
2 “Ti Masursurotayo ken Jesus”: Nalabit natakuatam a makatulong daytoy a benneg iti panangirugi kadagiti panangyadal iti Biblia. No saanmo pay a naaramid daytoy, padasem nga ibasa iti bumalay ti paulo ti artikulo sa ipakitam no ania ti kinuna ni Jesus maipapan iti daytoy a banag, kas nadakamat iti umuna a parapo. No makitam nga interesado, ikagumaam nga itultuloy ti saritaan babaen ti panangusarmo kadagiti mamagpanunot a saludsod nga agserbi kas subtitulo. Damagem no ania ti sungbat ti bumalay iti saludsod. Ilawlawagmo iti apagbiit ti aniaman a nainaig a ladawan, kalpasanna umakarkayo iti sumaruno a parapo. Iti damo a pannakisaritam iti bumalay, mabalinmo nga ilawlawag ti umuna a kagudua ti artikulo sa agsublikanto tapno ileppasyo ti artikulo. Nakasaganaka koma a mangitultuloy iti panagadal iti libro nga Isursuro ti Biblia.
3 “Tulbek ti Naragsak a Pamilia”: Daytoy a serye nga agparang iti tunggal tallo a bulan ket nairanta a tumulong kadagiti assawa a lallaki, babbai, ken nagannak no kasanoda nga iyaplikar dagiti prinsipio ti Biblia no adda bumangon a parikut a mangriribuk iti pamiliada. Mabalinmo met nga usaren dagitoy nga artikulo a tumulong kadagiti saan a Saksi tapno makitada ti sirib a linaon ti Biblia.—2 Tim. 3:16, 17.
4 Benneg a Para Kadagiti Agtutubo: Dagiti serye a “Para Kadakayo nga Agtutubo” ipaayanna ti agbasbasa iti gundaway a mangutob iti salaysay ti Biblia ken mabalin nga usaren iti panangsukimat iti salaysay ti Biblia. No agtutubo ti makasabaam, mabalinmo nga usaren dagitoy nga artikulo a mangilawlawag iti praktikal a pateg ti panangadal iti Sao ti Dios. (Sal. 119:9, 105) No nagannak ti makasaritam, mabalinmo nga itampok dagiti serye nga “Isuroyo Dagiti Annakyo” nga agparang maminsan iti tunggal dua a bulan. Dagitoy nga artikulo matulonganna dagiti ubbing a makasursuro kadagiti napateg a leksion manipud kadagiti karakter iti Biblia. Napadasam kadin nga imbasa dagitoy nga artikulo kadagiti annakmo?
5 Dadduma pay a Bennegna: Iti tunggal bulan, ti benneg a “Saludsod Dagiti Agbasbasa” sungbatanna dagiti saludsod a mabalin nga iyimtuod dagiti saan a Saksi. Mabalinmo nga itampok daytoy nga artikulo no ipaimam dagiti magasin bayat ti panangasabam iti binalaybalay. Ti benneg a “Surat Manipud iti . . .” ket naglaon iti nabiag a kapadasan nga insalaysay a mismo dagiti misionero ken dagiti dadduma pay maipapan kadagiti karit a pakaipaspasanguanda no iti panangitungpal iti ministerioda. Dagitoy nga artikulo ipakitana kadagiti interesado a tattao a ti naimbag a damag ket maikaskasaba iti intero a lubong, kas kaitungpalan ti pagilasinan ti kaadda ni Kristo.—Mat. 24:3, 14.
6 Ti binulan a benneg nga “Umadanika iti Dios,” a naibatay iti panagbasa iti Biblia iti Teokratiko nga Eskuelaan ti Panagministro, mabalin a tignayenna dagiti napasnek a tattao a mangammo iti ad-adu pay maipapan ken Jehova. Dagiti serye a “Tuladenyo ti Pammatida,” a maipabpablaak iti kada tallo a bulan ket nairanta a tumulong kadagiti tattao a mangiladawan iti panunotda kadagiti salaysay iti Biblia. Pagbalinenna pay a nabiag iti panunot dagiti agbasbasa dagiti karakter iti Biblia—dagiti pilida, dagiti karit a nakaipasanguanda, ken ti pammatida.
7 Anian a ragsaktayo ta binulan nga umaw-awattayo iti Pagwanawanan a nairanta nga usarentayo iti ministerio! Aramidentayo ngarud ti amin a kabaelantayo a mangkabesado iti linaonna ken usarentayo a naan-anay iti ministeriotayo.