Baro a Serye iti Panangirugi iti Panangyadal iti Biblia
1. Ania ti baro a serye iti publiko nga edision Ti Pagwanawanan, ken ania ti nakairantaan daytoy?
1 Mangrugi inton umay a bulan, addanto baro a serye iti publiko nga edision Ti Pagwanawanan a tumulong kadatayo a mangirugi kadagiti panangyadal iti Biblia. Napauluan daytoy iti “Agsursuroka iti Sao ti Dios.” Awan duadua a maragsakanto ti dadduma iti teritoriatayo a mangbasa iti tunggal artikulo iti daytoy a serye. Nupay kasta, dagiti artikulo ket nairanta a mausar iti pannakisaritatayo iti bumalay.
2. Ania ti dadduma a ramanen dagitoy nga artikulo?
2 Dagiti Ramanen Daytoy a Baro nga Artikulo: Ti paulo ken dagiti subtitulo ket naisurat kas saludsod a mabalintayo nga iyimtuod iti bumalay bayat a kaskasabaantayo. Naisitar ngem saan a nakotar dagiti napapateg a teksto tapno tagiragsaken ti bumalay a basaen dagita iti mismo a binulong ti Sao ti Dios. Ababa dagiti parapona tapno mailawlawagtayo dayta uray no addatayo laeng iti ruangan. Ti tunggal artikulo ket tumukoy iti libro nga Isursuro ti Biblia a tumulong kadakayo a mangiruangan iti panangyadal iti dayta a publikasion no maitutop.
3. Iti panangasabatayo iti binalaybalay, kasanotayo nga usaren daytoy a serye iti panangirugi iti panangyadal iti Biblia iti ruangan?
3 No Kasano nga Usaren Daytoy: No itukonyo dagiti magasin, mabalinyo ti mangyimtuod iti makapainteres a saludsod maipapan iti tema ti artikulo. Kas pagarigan, iti ruar nga Enero 1, nailawlawag ti pateg ti Biblia. Mabalinyo nga isaludsod: “Ibilbilangyo kadi ti Biblia kas Sao ti Dios wenno maysa laeng a nasayaat a libro? [Palubosanyo a sumungbat.] Adda naammuak a makapainteres iti daytoy a topiko.” Dakamatenyo ti umuna a saludsod, basaenyo ti umuna a parapo, ken ukradenyo ti naisitar a teksto. Basaenyo manen ti saludsod sa pagkomentuenyo ti bumalay. Pagsaritaanyo ti ad-adu pay nga impormasion no maitutop, nga usarenyo dagiti nanumeruan a saludsod. Sakbay nga agpakadakayo, iturongyo ti atension ti bumalay iti sumaruno a nanumeruan a saludsod sa makitulagkayo no kaanokayo nga agsubli tapno pagsaritaanyo dayta. Agsublikayo iti tunggal lawas tapno pagsaritaanyo ti ad-adu pay nga artikulo agingga a maawatyo ti sumaruno a ruar nga ipaimayo. Ti sabali pay a pamay-an ket ti direkta a panangitukon iti panangyadal iti Biblia iti bumalay. Kalpasanna usarenyo ti artikulo iti magasin a mangidemostra iti panagadal.
4. Kasanotayo nga usaren dagitoy nga artikulo no agsarungkartayo?
4 Mabalinyo met nga usaren a sieepektibo daytoy a baro a serye kadagiti regular nga itultulodanyo iti magasin ken dagiti dadduma pay a sarsarungkaranyo. Mabalinyo nga ibaga: “Adda baro a benneg daytoy a Pagwanawanan. Kayatko nga ipakita no kasano nga adalen daytoy.” Ikarkararagmi a daytoy a baro a serye tulonganna ti ad-adu pay a ‘dumteng iti umiso a pannakaammo iti kinapudno.’—1 Tim. 2:4.