No Kasano a Mayadalan iti Biblia Dagidiay Mapaimaantayo Kadagiti Magasin
1. Ania ti kalattayo bayat ti Abril ken Mayo?
1 Bayat ti Abril ken Mayo, itampoktayo Ti Pagwanawanan ken Agriingkayo! nga addaan iti kalat a mangirugi kadagiti panangyadal iti Biblia babaen ti libro nga Isursuro ti Biblia inton sumarungkarkayo. Makitayo iti baba dagiti sumagmamano a singasing a mabalin a makatulong. Laglagipenyo a masapul nga ibagayyo dagitoy iti teritoriayo ken ibagayo iti bukodyo a sasao. Nawayakayo a mangusar iti sabali a pamay-an nga epektibo kadakayo.
2. Kasanotayo nga usaren dagiti panglukat a panid iti libro nga Isursuro ti Biblia tapno mairugi ti panagadal iti Biblia?
2 Usarenyo Dagiti Panglukat a Panid: Ti maysa a pamay-an ket ti panangibaga iti kas iti daytoy inton sumarungkarkayo: “Dagiti magasin nga imbatik kadakayo iturongna ti atension iti Biblia. Imutektekanyo no apay a nakapatpateg ti panagbasa iti Biblia.” Basaenyo ti Isaias 48:17, 18; Juan 17:3; wenno ti sabali pay a maitutop a teksto. Kalpasanna, inton maipresenta ken maikkanyo ti bumalay iti kopia ti libro nga Isursuro ti Biblia, mabalinyo a kunaen:
◼ “Ipaayannatayo ti Biblia iti napaypayso a namnama para iti masanguanan.” Ipakitayo iti bumalay ti panid 4-5 sa isaludsodyo, “Ania kadagitoy a kari ti kayatyo a matungpal?” Iturongyo ti atension ti bumalay iti kapitulo a mangilawlawag iti Nainkasuratan a kari a napilina, ken usigenyo iti apagbiit ti maysa wenno dua a parapo no ipalubos ti bumalay.
◼ Wenno mabalinyo a kunaen, “Sungbatan ti Biblia dagiti kapatgan a saludsod iti biag.” Iturongyo ti atension ti bumalay iti panid 6 sa isaludsodyo no napampanunotnan ti aniaman kadagiti saludsod nga adda iti baba ti panid. Lukibenyo ti kapitulo a pakasarakan iti sungbat, ken ilawlawagyo iti apagbiit ti maysa wenno dua a parapo.
◼ Wenno mabalinyo nga ipakita ti sumagmamano a paulo iti listaan dagiti linaon ti libro sa isaludsodyo no ania kadagita a topiko ti paginteresanna. Lukibenyo dayta a kapitulo sa idemostrayo iti apagbiit ti panagadal iti Biblia.
3. Kasano a makairugitayo iti panangyadal iti Biblia no makaipaimatayo kadagiti magasin a mainaig iti (a) dumakdakes a kasasaad iti lubong? (b) pamilia? (c) kinamapagtalkan ti Biblia?
3 Mangibatikayo iti Saludsod iti Damo nga Isasarungkaryo: Ti sabali pay a pamay-an ket ti panangipasdek iti pundasion para iti panagsarungkar. Aramidenyo dayta iti damo pay laeng nga isasarungkaryo. No umawat ti bumalay kadagiti magasin, mangibatikayo iti saludsod ken ikariyo a sungbatanyo dayta inton sumarungkarkayo. Pagtulaganyo no kaano ti panagsubliyo ken siguraduenyo a tungpalen dayta. (Mat. 5:37) Inton sumarungkarkayo, ipalagipyo iti bumalay ti saludsod nga imbatiyo sa basaen ken ilawlawagyo iti apagbiit ti maysa wenno dua nga espesipiko a parapo iti libro nga Isursuro ti Biblia a mangsungbat iti dayta a saludsod. Ikkanyo iti kopiana tapno surotenna ti panangilawlawagyo. Adtoy ti sumagmamano a pagarigan.
◼ No ti magasin a naipaimayo ket mainaig iti dumakdakes a kasasaad ti lubong, mabalinyo a kunaen, “Inton maminsan ammuentanto ti sungbat ti Biblia iti daytoy a saludsod, Anianto ti aramiden ti Dios a panagbalbaliw ditoy daga?” Usarenyo ti panid 4-5 inton sumarungkarkayo. Wenno mabalinyo nga ibati daytoy a saludsod, “Pagayatan kadi ti Dios a mapasamak dagiti didigra?” Inton sumarungkarkayo, ipakitayo iti bumalay ti parapo 7-8 iti kapitulo 1.
◼ No ti magasin a naipaimayo ket mainaig iti pamilia, mabalinyo nga ibati daytoy a saludsod sakbay a pumanawkayo, “Ania ti mabalin nga aramiden ti tunggal kameng ti pamilia tapno naragragsak ti biag ti pamiliada?” Usigenyo ti parapo 4 iti kapitulo 14 inton sumarungkarkayo.
◼ No ti magasin a naipaimayo ket mainaig iti kinamapagtalkan ti Biblia, mabalinyo nga ibati daytoy a saludsod para iti sumaruno a panagsaritayo, “Umiso kadi ti Biblia no maipapan iti siensia?” Usigenyo ti parapo 8 iti kapitulo 2 inton sumarungkarkayo.
4. Ania ti mabalin nga aramidentayo no saan nga awaten ti bumalay ti libro nga Isursuro ti Biblia?
4 Iti ngudo ti tunggal saritaan, mangibatikayo iti sabali manen a saludsod a sungbatanyo iti sumaruno nga isasarungkaryo. Apaman a maipasdek ti regular a panagadal, pagsasarunuenyon nga adalen dagiti kapitulo iti libro. Kasano no saan nga awaten ti bumalay ti libro nga Isursuro ti Biblia? Itultuloyyo latta a kasabaan ken itulodan kadagiti magasin. Bayat a parparayrayenyo ti interesna, mabalin nga umanamongto met laeng nga agadal iti Biblia inton agangay.
5. Apay a saantay laeng a basta mangibati kadagiti magasin kadagiti tattao?
5 Imbilin ni Jesus a ‘mangaramidtayo iti ad-adalan, nga isurotayo ida.’ (Mat. 28:19, 20) Gapuna, ti kangrunaan a kalattayo a mangibati kadagiti magasin ket ti panangisuro iti kinapudno kadagiti napudno ti panagpuspusoda a tattao. Bayat ti Abril ken Mayo, ikagumaantayo ti mangirugi iti panangyadal iti Biblia kalpasan a makaipaimatayo iti Ti Pagwanawanan ken Agriingkayo!