Panangparang-ay iti Abilidadtayo iti Ministerio—Panangitukon iti Libro nga Isursuro ti Biblia

No Apay a Napateg: Ti libro nga Isursuro ti Biblia ti kangrunaan nga alikamentayo iti panangisuro. Ngem masapul nga ipaimatayo nga umuna dayta iti maysa a tao sakbay nga usarentayo a pangyadal kenkuana. Gapuna, ikagumaantayo koma amin ti agbalin a nalaing a mangitukon iti libro nga Isursuro ti Biblia iti ministerio. (Prov. 22:29) Adu ti mabalin nga aramiden dagiti agibumbunannag, ket pilienda no ania ti epektibo para kadakuada.

No Kasano nga Aramiden:

Mangibangon iti makapainteres a saludsod a mabalin a mangiturong iti bumalay iti espesipiko a kapitulo iti libro. Mabalinyo pay ti mangpili iti maysa a saludsod iti rugi ti tunggal kapitulo. Kalpasan a mangngegyo ti sungbat ti bumalay, mangibasa iti maitutop a teksto sa ipakita kenkuana ti maysa a parapo iti dayta a topiko a mabalin a pagsaritaanyo iti apagbiit.
Ti maysa pay a pamay-an ket ti panangusar kadagiti saludsod nga adda iti pangrugian a paset ti libro a mangparayray iti interes ti bumalay. Kalpasanna, ipakita kenkuana no sadino iti libro ti pakasarakan iti sungbat ti Biblia. Kas pagarigan, mabalinyo a dakamaten ti nabiit pay a naipadamag a trahedia ken ilawlawagyo nga adu ti agbirbirok iti sungbat kadagiti saludsod nga adda iti panid 3. Wenno mabalinyo nga ibaga a bumisbisitakayo ta kayatyo nga iranud ti nagsayaat a mapasamak iti masanguanan. Kalpasanna, ipakitayo dagiti ladawan iti panid 4-5 sa isaludsodyo: “Ania kadagitoy a kari ti kayatyo a makita a matungpal?” Ti sabali pay ket ti panangibaga a bumisbisitakayo iti apagbiit ta kayatyo a tulongan dagiti tattao a mangbirok kadagiti sungbat dagiti napapateg a saludsod iti biag. Kalpasanna, ipakitayo iti bumalay dagiti saludsod iti baba ti panid 6 ket saludsodenyo no ania kadagita ti paginteresanna unay.
Usaren ti direkta a panangirugi iti panagadal iti Biblia. Mabalinyo nga ibaga: “Kayatmi nga ipakita kadakayo daytoy a libro a tumulong iti panagadal iti Biblia. Nakitkitayo kadi idin daytoy? [Palubosan a sumungbat.] Kayatmi nga idemostra iti apagbiit no kasano nga usaren daytoy a libro agraman ti bukodyo a Biblia.”

Padasenyo Ita a Bulan:

Agpraktiskayo bayat ti panagdaydayaw ti pamiliayo.
No addakayo iti ministerio, ibagayo iti dadduma nga agibumbunannag ti planoyo nga ibaga. (Prov. 27:17) Baliwanyo ti presentasion no saan nga epektibo.