Panangparang-ay iti Abilidadtayo iti Ministerio—Panangidemostra iti Panagadal iti Biblia Babaen ti Libro nga Isursuro ti Biblia

No Apay a Napateg: Mabalin a saan a maawatan ti adu a tattao ti kayattayo a sawen no mangitukontayo iti libre a panagadal iti Biblia iti pagtaengan. Mabalin a panunotenda a makiramanda iti grupo iti panagadal wenno agadalda babaen ti surat. Imbes a basta mangitukonkayo iti panagadal, apay a diyo ipakita no kasano nga aramiden dayta? Iti sumagmamano laeng a minuto, uray iti ruangan laeng, maipakitayo iti bumalay a naglaka ken makaparagsak ti agadal iti Biblia.

No Kasano nga Aramiden Daytoy:

Kalpasan a makiam-ammokayo, saludsodenyo iti bumalay no maseknan iti masanguanan.
Ibagayo nga adu a tattao ti maseknan met iti dayta sa ipakitayo “Dagiti Linaon” ti libro nga Isursuro ti Biblia. Ilawlawagyo a daytoy a libro ket addaan kadagiti leksion a nalaka a maawatan maipapan iti isursuro ti Biblia mainaig iti masanguanan ken dadduma pay a topiko, ken saludsodenyo no ania a kapitulo ti paginteresanna.
Ikkanyo iti kopia ti libro, ken iturongyo ti atensionna iti kapitulo a pinilina. Ilawlawagyo a dagiti saludsod iti rugi ti kapitulo ket masungbatan kadagiti sumaganad a parapo.
Kiddawenyo iti bumalay a basaenna ti umuna a parapo no kayatna sa basaenyo ti saludsod para iti dayta a parapo, ken usigenyo a dua ti sungbat. Basaen ken pagsaritaanyo dagiti teksto a naisitar iti parapo a mangpasingked iti sungbat. Ipakitayo no kasanoyo nga inugedan ti sungbat iti libroyo.
Usigenyo ti sumaruno a parapo, ngem iti daytoy a gundaway, kiddawenyo iti bumalay a padasenna a sungbatan ti saludsod iti bukodna a sasao.
Komendaranyo, ken makitulagkayo nga agsublikayto tapno ileppasyo ti leksion.
No maitutop, ipabuyayo ti video a Kasano ti Panagadal iti Biblia? iti jw.org/ilo.

Padasenyo Ita a Bulan:

Ikararagyo a bendisionan ni Jehova ti panagreggetyo a mangirugi iti baro a panangyadal iti Biblia.—Fil. 2:13.
Padasenyo ti mangirugi iti panangyadal iti Biblia babaen ti libro nga Isursuro ti Biblia, wenno ipabuyayo ti video a Kasano ti Panagadal iti Biblia? uray maminsan laeng bayat ti pannakiramanyo iti ministerio.