Serye a Makatulong iti Ministeriotayo
1. Ania ti dua a panggep ti serye a “Pannakisarita iti Maysa a Kaarruba”?
1 Ti publiko nga edision Ti Pagwanawanan ket sagpaminsan nga addaan iti serye a napauluan iti “Pannakisarita iti Maysa a Kaarruba.” Ti dua a panggep daytoy ket tapno maidatag dagiti pannursuro ti Biblia iti makaguyugoy a pamay-an ken maipakita no kasanotayo a makirinnason a sitataktika maipapan iti maysa a topiko. (1 Ped. 3:15) Kasanotayo a mausar a naimbag dagitoy nga artikulo?
2. Kasanotayo nga usaren iti ministeriotayo dagitoy nga artikulo iti serye?
2 Usarenyo iti Ministerio: Mabalinyo ti mangibati kadagiti bukodyo a kopia dagiti ruar Ti Pagwanawanan nga addaan iti artikulo daytoy a serye. No sumupiat wenno adda saludsod ti bumalay, interesado, wenno yad-adalan iti Biblia nga umasping iti nailawlawag iti maysa kadagitoy nga artikulo, ikkanyo iti kopia sa ibagayo a pagsaritaanyo dayta. No awan ti kopiayo iti dayta a ruar ti magasin a nagparangan ti artikulo, mabalinyo nga i-download iti jw.org/ilo.
3. Kasanotayo nga ilawlawag iti bumalay ti maysa kadagitoy nga artikulo?
3 Kasanoyo nga ilawlawag iti bumalay ti maysa kadagitoy nga artikulo? Dadduma ti mangipabasa iti kasarsaritada ti sasao ti kaarruba sa basaenda met ti sasao ti Saksi. Epektibo daytoy a pamay-an gapu ta ipaayanna ti bumalay iti gundaway a mangusig kadagiti patpatienna iti wagas a saan a masair ti riknana.—Deut. 32:2.
4. Kasanotayo nga usaren dagitoy nga artikulo iti serye a mangsanay iti bagitayo?
4 Sanayenyo ti Bagiyo ken ti Sabsabali: Bayat a basbasaenyo dagitoy nga artikulo, siputanyo dagiti teksto, ilustrasion, ken argumento, agraman ti wagas a pannakaidatag ti material. Kalpasanna, ipakatyo dayta a pamay-an iti ministerioyo. (Prov. 1:5; 9:9) Kinuna ti maysa a kabsat a babai, “Bayat a basbasaek dagitoy nga artikulo, kas man la adda kaduak a ‘perpekto’ a payunir a kanayon nga ammona no ania ti maitutop nga isungbat!”
5. Kasanotayo a matulongan dagiti yad-adalantayo nga agsagana iti ministerio?
5 Mabalinyo met nga usaren dagitoy a pagtuladan nga iskrip iti panangtulongyo iti yad-adalanyo nga agsagana iti ministerio. Basaenyo a dua ti iskrip, a ti yad-adalanyo ti agakem kas agibumbunannag. Iti kastoy a pamay-an, masanay ti yad-adalanyo a mangilawlawag a sitataktika iti pammatina. (Col. 4:6) Talaga a dagitoy nga artikulo ket maysa kadagiti pamay-an ni Jehova a tumulong kadatayo a ‘mangitungpal a naan-anay’ iti ministeriotayo!—2 Tim. 4:5.