Agriingkayo!—Magasin a Nalawat’ Panangallukoyna iti Publiko
Daytoy a magasin damo a napauluan ti The Golden Age. Ti immuna a ruar napetsaan Oktubre 1, 1919. Magasin idi daytoy a nangireport iti adu a tay-ak ti natauan a ganuat. Riniingna ti tattao iti mapaspasamak ditoy lubong ket impakitana kadakuada a ti pudpudno a solusion kadagiti parikut ti sangatauan isut’ Milenio a Turay ni Kristo, a dayta ti talaganto a mangiserrek iti “nabalitokan a periodo” para iti sangatauan. Ti disenio ti akkub daytoy a magasin nagbaliwbaliw, ngem nagtalinaed nga isu met laeng ti mensahena. Ti The Golden Age nadisenio a maibunong iti publiko, ket iti adu a tawen dakdakkel ti sirkulasionna ngem iti The Watch Tower.
Nangrugi iti ruar ti Oktubre 6, 1937, ti paulona nagbalin a Consolation. Naikanatad unay daydi gapu iti pannakairurumen a mapaspasaran dagiti adu ken ti riribuk a nakaisagmakan ti lubong idi Gubat Sangalubongan II. Ti liwliwa nga intukon ti magasin, nupay kasta, ket daydiay makaallukoy laeng kadagiti addaan pudpudno a panagayat iti kinapudno.
Iti ruar ti Agosto 22, 1946, naaramaten ti paulo nga Agriingkayo! Naigunamgunam ti panangriing kadagiti tattao iti kaiyulogan dagiti sangalubongan a paspasamak. Inusar ti magasin dagiti kadawyan a gubuayan ti damag, ngem addaan met kadagiti bukodna a koresponsal iti intero a globo. Ti balanse, praktikal, makasukisok nga artikulo ti Agriingkayo! a mangsalaysay iti nalawa a sakup dagiti tema a mangparegta kadagiti managbasa tapno amirisenda ti kaskenan a mensahe ti magasin, nga isu daytoy, a dagiti sangalubongan a pasamak tungtungpalenda dagiti padto ti Biblia, a mangipakita nga agbibiagtayon iti maudi nga al-aldaw ket din agbayag ti Pagarian ti Dios iyegnanton ti agnanayon a pagimbagan kadagidiay mangadal ken mangaramid iti pagayatan ti Dios. Daytoy a magasin nagbalin nga epektibo nga instrumento iti sangalubongan a panangiwaragawag iti naimbag a damag ti Pagarian ti Dios ken nagserbi a rangtay kadagiti naun-uneg nga artikulo nga adalen a nailanad iti Pagwanawanan ken liblibro.
Idi rugrugi ti 1993, maiyim-imprentan ti Agriingkayo! iti 67 a pagsasao, 13,240,000 a kopia kada ruar.