Panangipablaak Ti Pagwanawanan

Idi damo a napataud, idi Hulio 1879, naawagan Zion’s Watch Tower and Herald of Christ’s Presence. Daytoy a magasin, a nangitandudo iti subbot a daton ni Jesu-Kristo, naipablaak tapno mangted ti naespirituan a taraon iti sangakabbalayan ti pammati. Idi Enero 1, 1909, nasuktan ti paulona iti The Watch Tower and Herald of Christ’s Presence, tapno nabatbatad ti pannakaitampok ti panggep ti magasin. Idi Enero 1, 1939, tapno ad-adda a maigunamgunam ti kinapudno a ni Kristo ket agturturayen sadi langit kas Ari, nabaliwan ti paulona iti The Watchtower and Herald of Christ’s Kingdom. Ket idi Marso 1, 1939, idi a ti paulona nagbalin a Ti Pagwanawanan Mangibumbunannag ti Pagarian ni Jehova, ad-adda a naitampok ni Jehova kas Sapasap a Soberano, daydiay nangted ti autoridad a panagturay iti Anakna.

Idi damo a naipablaak, ti Watch Tower ket walo-panid a publikasion, a napataud maminsan makabulan. Nagbalin a 16 ti panidna idi 1891, ket naipablaak iti maminduat’ makabulan idi 1892. Nagbalin a 32 ti panidna kadagiti adu a pagsasao idi 1950.

Nabannayat a nangrugi ti pannakaipatarus ti Watch Tower kadagiti sabali a pagsasao. Adda agsolsolo a sample a ruar a naipablaak iti Sueko idi 1883 tapno mausar kas tract. Nanipud 1886 inggat’ 1889, adda bassit nga edision ti magasin a naiyimprenta iti Aleman. Ngem sa la nagparang manen ti Watch Tower iti Aleman idi 1897 sa nagtultuloyen nga awan ressat a naipablaak. Idi 1916 naiyimprentan iti pito a pagsasao​—Aleman, Danes-Norwego, Ingles, Pinlandes, Polaco, Pranses, ken Sueko. Idi a gimmanetget unay ti panangikasaba iti naimbag a damag idi 1922, nagbalin a 16 ti bilang dagiti pagsasao a nakaipablaakan ti magasin. Idi 1993, nupay kasta, regularen a mapatpataud iti 112 a pagsasao​—dagidiay us-usaren ti dakkel a paset ti populasion toy daga. Ramanenna daytoy saan laeng a dagiti pagsasao a kas iti Ingles, Español, ken Hapones, a kadagita minilion a kopia ti maiyimprenta kada ruar, no di pay ket ti Palauan, Tuvaluan, ken dadduma pay a sumagmamano la a gasut ti maibumbunong.

Iti las-ud ti adu a tawen Ti Pagwanawanan namatmatan kas magasin nga ad-adda para iti “bassit nga ipastoran” dagiti konsagrado a Kristiano. Medio limitado idi ti sirkulasionna; idi 1916, 45,000 laeng a kopia ti maiyim-imprenta. Ngem nangrugi idi 1935, naulit-ulit a naipaganetget kadagiti “Jonadab,” wenno “dakkel a bunggoy,” a regular nga alaen ken basaenda Ti Pagwanawanan. Idi 1939, idi a ti akkub ti magasin intampokna ti Pagarian, naitukon iti publiko ti panagsuskribeda iti Pagwanawanan bayat ti uppat a bulan nga internasional a kampania. Kas resultana, ti listaan dagiti nagsuskribe dimmanon iti 120,000. Iti sumuno a tawen regularen a naitukon kadagiti tattao Ti Pagwanawanan kadagiti kalsada. Bigla nga immadu ti sirkulasionna. Idi rugrugi ti 1993, 16,400,000 ti maiyim-imprentan kada ruarna iti amin a pagsasao.