Panagdayaw ken Jehova kas Maysa a Pamilia
1 Idi panawen ti Biblia, adu dagiti aktibidad a sangsangkamaysa nga aramiden dagiti kameng ti pamilia. Pagtitinnulonganda dagiti inaldaw a trabaho ken kangrunaanna, agdaydayawda ken Jehova kas maysa a pamilia. (Lev. 10:12-14; Deut. 31:12) Kadagiti adu a lugar ita, manmanon nga agkakadua dagiti kameng ti pamilia a mangaramid kadagiti bambanag. Nupay kasta, bigbigen dagiti Kristiano ti kinapateg ti panagkakadua kas pamilia, nangruna no mainaig iti panagdayaw. Maragsakan la ketdi ti Namunganay iti pamilia no sangsangkamaysa dagiti pamilia nga agdaydayaw kenkuana!
2 Agkakadua a Mangasaba: Ti panagkakadua a mangikasaba iti naimbag a damag palagdaenna ti singgalut ti pamilia. Gapuna, ti maysa a panglakayen regular koma a kaduana ni baketna ken dagiti annakna a mangasaba, saan laeng a dagiti kakabsat iti kongregasionda. (1 Tim. 3:4, 5) Uray dagiti agdaldaliasat a manangaywan, nga adu ti as-asikasuenda, iwayaanda latta a kaduaen ti assawada a mangasaba.
3 Dagiti nagannak matulonganda dagiti annakda a rumang-ay kas ebanghelisador no agkuyogda a mangasaba. Saan laeng a mapaliiw dagiti ubbing ti rag-o ken pannakapnek dagiti dadakkelda iti trabaho a panangasaba no di ket makitada no kasano ti panangyebkas dagiti dadakkelda iti ayatda kenni Jehova ken kadagiti padada a tattao. (Deut. 6:5-7) Napateg daytoy uray no dadakkelen dagiti annakda. Adda maysa a pagassawaan nga uray no agtawenen iti nagbaetan ti 15 ken 21 dagiti annakda a lallaki, kadkaduaenda latta ida a mangasaba. Kuna ti ama: “Adda latta maisuromi kadakuada tunggal rummuarkami. Ket siguraduenmi a makaparagsak ken makapabileg a kapadasan dayta.”
4 Agkakadua nga Agsagana: Natakuatan ti adu a pamilia a makagunggona ti sangsangkamaysa a panagsagana para iti ministerio. Masansan a magustuan dagiti ubbing ti panagensayoda a sangapamiliaan, a kas no agsisinnublatda nga agakem kas agibumbunannag wenno bumalay. Adda dagiti mangbusbusbos iti sumagmamano a minuto nga agensayo iti ngudo ti panagadalda kas pamilia.
5 Naragragsaktayo no kaduatayo dagiti ay-ayatentayo kadagiti napateg ken makapnek nga aktibidad. Anian a makaparagsak no agkakadua dagiti kameng ti pamilia a mangasaba iti binalaybalay, agsarungkar, ken mangyadal iti Biblia! No ngarud sangapamiliaan nga agdaydayawkayo ken Jehova, maikunayo a sirarag-o: “No maipapan kaniak ken iti sangakabbalayak, agserbikamto ken Jehova.”—Jos. 24:15.