Surotenyo ti Ulidan nga Impasdek ni Jesus
1. Ania nga ulidan ti impasdek ni Jesus?
1 No makiramantayo iti trabaho a panangaramid kadagiti adalan, masapul a laglagipentayo a ti ulidantayo ket dakkel ti epektona kadagidiay mangpalpaliiw kadatayo. Nangisuro ni Jesus babaen ti sao ken aramid. Dagiti sinursuruanna nakitada ti regtana, ti ayatna kadagiti tattao, ti nasged a tarigagayna a mangsantipikar iti nagan ti Amana, ken ti determinasionna a mangaramid iti pagayatan ti Amana.—1 Ped. 2:21.
2. Ania ti mabalin nga epekto ti ulidantayo kadagidiay kakaduatayo iti ministerio?
2 Iti Panangasaba iti Binalaybalay: Kas ken Jesus, ti ulidantayo ket adda epektona kadagiti kakaduatayo. No makita dagiti kabbaro ken bassit pay ti kapadasanna nga agibumbunannag ti kinaregtatayo a mangasaba, matignayda a mangutob iti kalidad ti ministerioda. No makitada ti rag-o ken ti napaypayso a pannakaseknantayo kadagiti sabsabali, mapalagipanda iti kinapateg ti panangiparangarang kadagita a kualidad iti ministerioda. No mapaliiwda ti kinaaneptayo a mangusar iti Kasuratan, agsarungkar, ken mangyadal iti Biblia, magutugotda a mangaramid met iti kasta.
3. Kasano a makaisuro ti ulidantayo kadagiti iyad-adalantayo iti Biblia, ken ania ti nalabit masursuroda?
3 Iti Panangyadal iti Biblia: Dagiti iyad-adalantayo iti Biblia palpaliiwenda ti konduktatayo. Kas pagarigan, nupay mabalin nga ilawlawagtayo kadakuada ti kinapateg ti panagsagana para iti panagadal, panangbasa kadagiti teksto, ken pananguged kadagiti kangrunaan a punto, madlawda no nakasaganatayo wenno saan. (Roma 2:21) No kanayon a sumangpettayo iti nagtulagantayo nga oras ti panagadal, mabalin nga ipangpangrunada ti agadal iti Biblia uray no adda koma pay ti sabali nga aramidenda. Awan duadua a mapaliiwda met ti sakripisio nga ar-aramidentayo maipaay iti ministerio ken ti di maisin a pammatitayo. Di pakasdaawan a masansan nga agbalin met a naregta ken nabunga nga ebanghelisador dagiti iyad-adalan dagidiay mangsursurot a naimbag iti ulidan ni Jesus.
4. Iti itatabunotayo kadagiti gimong ti kongregasion, ania ti maisuro ti ulidantayo?
4 Iti Itatabuno Kadagiti Gimong ti Kongregasion: Amin a kameng ti kongregasion Kristiano ket addaan iti paset iti panangisuro babaen ti ulidan kadagiti gimong ti kongregasion. Dagiti interesado a tumabtabunon kadagiti gimong mabenepisiaranda iti nasayaat nga ulidan a makitada iti kongregasion. Mapaliiwda ti nabara a panaglalangen, panagkaykaysa, ken ti naemma a panagkawkawes ken panaglanglangatayo. (Sal. 133:1) Mapaliiwda met ti regular nga itatabunotayo ken ti panangipaduyakyaktayo iti pammatitayo kadagiti gimong ti kongregasion. Adda bisita a timmabuno naminsan kadagiti gimongtayo ket napaliiwna ti maysa nga ubing a nabiitna la a nasarakan iti bukodna a Biblia ti naisitar a teksto ken sinurotna a naimbag ti pannakaibasana. Dayta ti nangtignay kenkuana nga agpayadal iti Biblia.
5. Apay a pulos a ditay koma tagibassiten ti kinapateg ti ulidantayo?
5 Idagadag ti Kasuratan a tuladentayo ti nasayaat nga ulidan ti tunggal maysa. (Fil. 3:17; Heb. 13:7) Laglagipentayo ngarud a no surotentayo a naimbag ti ulidan nga impasdek ni Jesus, mapaliiw dayta dagiti sabsabali ken mabalin a nasayaat ti epektona kadakuada. Gapu ta kasta, sapay koma ta ipapusotayo ti sasao a masarakan iti 1 Timoteo 4:16: “Itultuloymo nga asikasuen ti bagim ken ti isursurom.”