Tulonganyo Dagiti Napanglaw a Maaddaan iti Namnama
1 Naseknan unay ni Jesus kadagiti napanglaw. Adda dagiti gundaway a nangipaay iti material a tulong ken nangagas kadagiti masakit iti namilagruan a pamay-an, ngem ti panangikasaba iti “naimbag a damag” kadagiti napanglaw ti impamaysana. (Mat. 11:5) Ti Nakristianuan a ministeriotayo ita ket agtultuloy a makagunggona kadagiti napanglaw ken kadagiti sabsabali.—Mat. 24:14; 28:19, 20.
2 Napaypayso a Namnama: Masansan nga ikarkari dagiti ministro ti Kakristianuan a bumaknang dagiti napanglaw no nawadwad ti itedda a donasion iti simbaan. Ngem isursuro ti Biblia a ti laeng Pagarian ti Dios ti mamagpatingga iti kinapanglaw ken mangrisut kadagiti amin a parikut ti sangatauan. (Sal. 9:18; 145:16; Isa. 65:21-23) Babaen ti panangisuro kadagiti napanglaw no ania a talaga ti isursuro ti Biblia, mangiranranudtayo iti namnama ken tultulongantayo ida a mangpennek iti naespirituan a kasapulanda.—Mat. 5:3.
3 Dagiti Fariseo idi kaaldawan ni Jesus inumsida dagiti napanglaw, nga inawaganda ida kas ‘am- ha·’aʹrets, wenno “tattao ti daga.” Nupay kasta, imbilang ni Jesus a ‘napateg’ ti “darada,” wenno ti biagda. (Sal. 72:13, 14) Matuladtayo ni Jesus ken ‘makaipakitatayo iti pabor’ kadagiti napanglaw babaen ti panagbalintayo a naasi ken mannakipagrikna. (Prov. 14:31) Pulos a ditay kayat a tagibassiten wenno pagkedkedan a kasabaan dagiti tattao nga agnanaed kadagiti napanglaw a lugar. Napanglaw ti adu kadagiti mangipangpangag iti mensahe ti Pagarian.
4 Tulonganyo Itan Dagiti Napanglaw: Ti panangisuro kadagiti prinsipio ti Biblia kadagiti nakurapay iti teritoriatayo ket makatulong met kadakuada tapno sumayaat bassit ti kasasaadda. Kas pagarigan, kondenaren ti Biblia ti panagbarbartek, panagsugal, kinasadut, panagsigarilio, ken dadduma pay nga aramid a mangpapanglaw iti maysa a tao. (Prov. 6:10, 11; 23:21; 2 Cor. 7:1; Efe. 5:5) Iparparegta ti Kasuratan ti panagbalin a napudno ken ti panagtrabaho iti “amin-kararua,” ta dagitoy dagiti galad a matarigagayan kadagiti empleado. (Col. 3:22, 23; Heb. 13:18) Kinapudnona, iti maysa a surbey, ti kinamapagtalkan ken kinatarnaw ti kangrunaan nga ikabkabilangan dagiti amo no iti panangpilida kadagiti trabahadorda.
5 Maseknan ni Jehova iti panagsagaba dagiti napanglaw. Iti din agbayag, ispalento ni Jesu-Kristo “daydiay napanglaw nga agpatpatulong.” (Sal. 72:12) Bayat nga ur-urayentayo dayta, pribilehiotayo a liwliwaen dagiti sabsabali, a pakairamanan dagiti napanglaw, babaen ti panangiranud iti mensahe ti Biblia a mangipaay iti namnama.