Dikay Bumdeng!

1. Iti ania a pamay-an a saantayo a ‘medmedmedan ti naimbag’?

¹ Babaen ti aktibo a pannakiraman iti panangiwaragawag iti naimbag a damag maipapan iti Pagarian ti Dios, saantayo a ‘medmedmedan ti naimbag’ kadagiti tattao kadagiti naituding a teritoriatayo. (Prov. 3:27) Awanen ti nasaysayaat a mensahe nga iranudtayo kadagiti tattao no di ti nasaysayaat a kasasaad iti sidong ti turay ti Dios. Nupay mabalin a nagagetkayo a mangiranud iti namnama nga itden ti Pagarian babaen ti panangasaba iti di pormal a pamay-an wenno panagipaima kadagiti literatura, apay a diyo aramiden a kalat ti mangyadal iti Biblia, no awan pay ti iyad-adalanyo?

2. Ania ti mabalin a mangigawid kadatayo a mangirugi iti panangyadal iti Biblia?

² No dadduma, ti maysa kadagiti kadakkelan a lapped iti panangirugi iti panangyadal iti Biblia ket ti mismo a kaririknatayo maipapan iti dayta a banag. Adda dagiti bumdeng a mangyadal iti Biblia gapu ta awan ti talekda iti bagida wenno gapu ta okupadoda. Mabalin a makatulong kadakayo dagiti sumaganad a singasing tapno saantayo a bumdeng a makiraman iti trabaho a panangyadal iti Biblia.—Mat. 28:19; Ara. 20:20.

3. Apay a kualipikadotayo a mangisuro iti Biblia?

³ Kinaawan Talek iti Bagi: Nalabit nababa laeng ti adalyo wenno mabalin nga awan ti talekyo iti abilidadyo a mangyadal iti Biblia gapu iti dadduma pay a rason. Dagiti epektibo a Kristiano a ministro idi umuna a siglo ket ‘awan adalda ken gagangay’ a tattao. Ania ti nakatulong kadakuada a mangisuro iti kinapudno? “Nakikuykuyogda idi ken Jesus.” (Ara. 4:13) Nakasursuroda iti Naindaklan a Mannursuro a ni Jesus, a dagiti pannursuro ken pamay-an ti panangisurona ket naitalimeng iti Kasuratan para kadatayo. Uray no nababa ti adalyo, umaw-awatkayo iti naespirituan nga edukasion a nangatngato ngem iti aniaman a sekular nga edukasion.—Isa. 50:4; 2 Cor. 3:5.

4. Ania ti masursurotayo iti ulidan ni Amos?

⁴ Adda dagiti panawen a nagusar ni Jehova kadagiti mammadto a mangtubngar kadagiti nakabasol nga agtuturay wenno kadagiti dadduma pay nga addaan iti nangato a saad. Nanumo ti dadduma kadakuada, kas ken Amos. Kinuna ni Amos: “Saanak a mammadto, wenno uray anak ti mammadto; no di ket maysaak a pumapastor ken agkedkeddel kadagiti higos ti kaykayo a sikomoro.” (Amos 7:14) Nupay kasta, saan a bimdeng ni Amos a mangipakaammo iti pangngeddeng ni Jehova maibusor ken Amazias, a maysa a padi nga agdaydayaw iti sinan-urbon a baka. (Amos 7:16, 17) Nasken a kanayon a laglagipentayo a trabaho ti Dios ti itungtungpaltayo ken pagbalinennatayo a kualipikado a mangaramid iti trabaho nga impaannongna kadatayo.—2 Tim. 3:17.

5. Apay nga ikagumaantayo ti mangirugi iti panangyadal iti Biblia uray no okupadotayo?

⁵ Okupado nga Eskediul: Uray no okupadokayo, nalabit nga adda tiempo nga inlatangyo para iti regular a pannakiramanyo iti ministerio. Ti panangyadal iti Biblia ket mabalin a maysa kadagiti makaparagsak nga aspeto ti ministerio. Maysa a pribilehio ti pannakakita iti Sao ni Jehova a mangim-impluensia iti biag ti maysa a tao. (Heb. 4:12) Maay-ayo ni Jehova no mangaramidtayo kadagiti panagsakripisio tapno matulongantayo ti maysa a tao a ‘makagteng iti umiso a pannakaammo iti kinapudno.’ (1 Tim. 2:4) Uray dagiti anghel, maragsakanda met no adda maysa a mangtallikud iti dati a kabibiagna ket rumang-ay iti naespirituan.—Luc. 15:10.

6. Ania a pribilehio ti adda kadatayo iti panangitungpal iti pagayatan ti Dios?

⁶ ‘Pagayatan ti Dios a maisalakan koma dagiti amin a kita ti tattao ken dumtengda iti umiso a pannakaammo iti kinapudno.’ (1 Tim. 2:4) Anian a nagsayaat ti pribilehiotayo nga agtrabaho maitunos iti pagayatan ti Dios, a ditay bumdeng a mangirugi kadagiti panangyadal iti Biblia!