Liwliwaenyo Dagidiay Nasnaayan ti Pusoda
1 Ad-adda ita nga agkasapulan ti sangatauan iti liwliwa. Kas panangtulad iti panangidaulo ti Aritayo a ni Jesu-Kristo, ikagkagumaantayo met ti “mangpatapat iti nasnaayan ti pusona.”—Isa. 61:1.
2 Pamay-an a Mangliwliwa: Tapno maliwliwatayo dagiti tattao, masapul a balanse ken positibo ti panangasabatayo. No limitarantayo ti mangdakamat kadagiti dakes nga aramid ken palso a doktrina ti lubong, maipamaysa ti saritaan iti Nainkasuratan a kinapudno ken iti naragsak a namnama maipapan kadagiti makaliwliwa a kari ti Dios. Di kayat a sawen daytoy a saantayon nga ilawlawag ti maipapan iti Armagedon. Ti trabahotayo ket ti panangiwaragawag “iti tawen ti naimbag a nakem iti biang ni Jehova ken ti aldaw ti pammales iti biang ti Diostayo,” agraman ti ‘panangpakdaar iti daydiay nadangkes manipud nadangkes a dalanna.’ Nupay kasta, ti panangted iti pakdaar mainaig iti Armagedon ken ti panangiladawan kadagiti makadadael a resultana ket saan a nairanta a manglab-aw iti tema ti naimbag a damag maipapan iti pagarian ti Dios.—Isa. 61:2; Ezeq. 3:18; Mat. 24:14.
3 Iti Binalaybalay: Gagangayen a makasarsaraktayo kadagiti tattao a masmasnaayan gapu iti sakit, ipapatay ti ing-ingungoten, kinaawan hustisia, wenno kinarigat ti biag. Kas tumutulad ken Kristo, ‘sumnek ti asitayo’ kadagiti masarakantayo iti ministerio ket makipagriknatayo kadakuada. (Luc. 7:13; Roma 12:15) Nupay mangibasatayo iti maysa wenno dua a teksto a mainaig iti parikut ti bumalay, nasken a ‘nasiglattayo no iti panagdengngeg,’ a palubosantayo nga iyebkasna ti kaririknana. (Sant. 1:19) No dumngegtayo nga umuna, ad-adda a nakasaganatayo a mangted iti liwliwa.
4 Iti maitutop a gundaway bayat ti saritaan, mabalintay a kunaen, “Adda kayatko nga iranud kenka a makaliwliwa a sasao manipud iti Biblia.” Naannadtayo koma, a ditay ikagumaan a supiaten ti tunggal di umiso a panangmatmat a mabalin nga iyebkas ti bumalay. Imbes ketdi, ikagumaantayo a paregtaen ken liwliwaen babaen ti panangusar iti Kasuratan a makapabang-ar iti puso. Mainaig iti daytoy a banag, mabalinyo a kitaen ti Pannakirinnason Manipud iti Kasuratan, panid 275-279 iti paulo a “Pammaregta.” Wenno saan, mabalinyo nga ikkan ti bumalay iti tract a Liwliwa Kadagiti Malmaldaang ken pagsaritaanyo ti makaparagsak a linaonna.
5 Mangbirok Kadagiti Gundaway a Mangliwliwa Kadagiti Sabsabali: Adda kadi ammoyo a kaarruba, katrabahuan, kaeskuelaan, wenno kapamilia nga agkasapulan iti liwliwa? Apay a dikay sumarungkar iti pagtaenganda ket usarenyo ti Biblia a mangliwliwa kadakuada? Gapu ta ammoyo no apay nga agkasapulanda iti liwliwa, makapagsaganakayo mainaig iti dayta a partikular a kasasaad. Adda dagidiay nangliwliwa babaen ti panagaramidda iti surat wenno iyaawagda iti telepono. Ti pudno nga ayat kadagiti padatayo a tao tignayennatayo a makipagrikna ken mangipaay iti kasapulan a liwliwa manipud iti Kasuratan.—Luc. 10:25-37.
6 Wen, addaantayo iti annongen a mangliwliwa kadagidiay agledleddaang, mangparagsak kadagidiay masmasnaayan, ken mangted iti namnama maipaay iti naragsak a masakbayan. Daytoy ti liwliwa a kasapulan dagiti tattao iti intero a lubong. Maliwliwa ken maaddaan iti namnama dagiti napudno ti panagpuspusoda a tattao no siraragsak nga iranudtayo ti agkakaimbag a banag nga inkari ti Dios. Sapay koma ta kanayon a silalagiptayo iti rebbengentayo a mangpatapat iti nasnaayan ti pusona.