Pananglaglagip iti Subbot Buyogen ti Apresasion
1, 2. Apay a laglagipentayo ti subbot buyogen ti apresasion?
1 Kas panagtulnog iti bilin ni Jesus, dagiti Kristiano iti intero a lubong agtataripnongda kalpasan ti ilelennek ti init inton Sabado, Marso 22, 2008, tapno laglagipenda ti ipapatay ni Jesu-Kristo. (Luc. 22:19; 1 Cor. 11:23-26) Matignaytayo a mangaramid iti dayta buyogen ti nauneg nga apresasion gapu kadagiti amin a naibanag iti dayta a petsa 1,975 a tawenen ti napalabas. Impaay ni Jesus ti kasayaatan a sungbat kadagiti pammabalaw ni Satanas idi sinantipikarna ti nagan ni Amana babaen ti panagtalinaedna a naan-anay a natarnaw bayat ti nasaem nga ipapatayna iti kayo a pagtutuokan.—Job 1:11; Prov. 27:11.
2 Ti naiparukpok a dara ni Jesus pinatalgedanna ti baro a tulag, a nangilukat iti gundaway para kadagiti imperpekto a tattao a maibilang kas annak ti Dios nga addaan iti namnama a makipagturay ken Kristo iti nailangitan a Pagarianna. (Jer. 31:31-34; Mar. 14:24) Kanayonanna, silalawag a naiparangarang no kasano kauneg ti ayat ti Dios iti sangatauan idi insakripisiona ti patpatgenna nga Anak, kas inlawlawag a mismo ni Jesus kenni Nicodemo.—Juan 3:16.
3. Kasano a mabenepisiaran dagidiay tumabuno iti Memorial?
3 Awisenyo Dagiti Sabsabali: Naisingasing iti Enero a ruar Ti Ministeriotayo iti Pagarian nga ilistayo dagiti am-ammoyo ken awisenyo ida a mismo. Inrugiyo kadin nga awisen dagidiay inlistayo? Mangar-aramidkayo kadin kadagiti urnos tapno naan-anay a makiramankayo iti kampania a mangrugi inton Marso 1 mainaig iti panangawis kadagiti tattao a tumabuno iti Memorial? Dagidiay tumabuno makangngegdanto iti Nainkasuratan nga impormasion a mangpatanor iti pammati iti subbot, banag a mangitunda iti biag nga agnanayon.—Roma 10:17.
4. Apay a masapul a sumangpettayo a nasapa inton Memorial?
4 Amin a makabael masapul nga iplanoda ti sumangpet a nasapa tapno sibabara nga abrasaenda dagidiay tumabuno nga inawisda. Gapu ta adu ti tumabtabuno iti Memorial, nasken nga ipaayantayo iti naisangsangayan nga atension dagiti kabbaro kasta met dagiti sagpaminsan a tumabtabuno kadagiti gimong.
5. Kasanoyo a maisagana ti pusoyo para iti daytoy nga okasion?
5 Isaganayo ti Pusoyo: Ti Panangsukimat Kadagiti Kasuratan iti Inaldaw—2008 ken ti 2008 Calendar ket naglaon iti eskediul para iti espesial a panagbasa iti Biblia mainaig iti Memorial. Mangrugi dayta inton Marso 17. Maisaganayo ti pusoyo para iti panangrambak iti Memorial no usigenyo dagiti napateg a pasamak kabayatan ti maudi nga al-aldaw ni Jesus ditoy daga. (Esd. 7:10) Ti panangutob a nabuyogan iti kararag kadagitoy a salaysay ti Biblia paunegenna ti apresasionyo iti ayat ni Jehova ken ti Anakna iti pannakaipaay ti subbot.—Sal. 143:5.
6. Kasanotay a mabenepisiaran iti panangparayray iti apresasiontayo iti subbot?
6 Bayat nga umad-adani ti Memorial, sapay koma ta isaganatayo a naimbag ti bagbagitayo ken dagiti sabsabali agpaay iti daytoy a napateg nga okasion. Ti pananglaglagip iti subbot buyogen ti apresasion patibkerenna ti relasiontayo kenni Jehova ken iti Anakna. (2 Cor. 5:14, 15) Tignayennatayo met dayta a mangtulad kadakuada no iti panangipakita iti managsakripisio nga ayat kadagiti sabsabali.—1 Juan 4:11.