Espesial a Kampania a Panagiwaras iti Tract iti Oktubre 20–Nobiembre 16!
1 Mangrugi iti Lunes, Oktubre 20, ken agtultuloy iti uppat a lawas, makiramantayo iti espesial a kampania a panagiwaras iti baro a tract a napauluan iti Kayatmo Kadi a Maammuan ti Kinapudno? Daytoy nga espesial a panagiwaras iti tract iti intero a lubong ket manamnama a manggutugot iti interes ti ad-adu pay a tattao iti kakaisuna a gubuayan ti kinapudno.—Juan 17:17.
2 Ti tract ket mangipaay iti ababa a sungbat ti Biblia kadagiti innem a napapateg a saludsod: “Maseknan kadi a talaga ti Dios kadatayo?” “Agpatingganto pay ngata ti gubat ken panagsagaba?” “Ania ti mapasamak kadatayo no mataytayo?” “Adda ngata pay namnama agpaay kadagiti natay?” “Kasano ti panagkararagko tapno ipangagnak ti Dios?” ken “Kasano a masagrapko ti pudpudno a kinaragsak?” Dagiti simbaan ti Kakristianuan dida pulos a nangipaay iti makapnek a sungbat kadagita a saludsod. Uray ti adu a saan a Kristiano ket agpampanunot met maipapan kadagita a banag, ngem mabalin a dida ammo a masarakan iti Biblia ti nalawag a sungbat kadagita a saludsod. Gapuna, namnamaentayo a daytoy a mensahe ket manggutugot iti interes ti adu a tattao.
3 Wanasenyo ti Teritoriayo: Aginggat’ mabalin, ikagumaanyo a wanasen ti amin a balay iti teritoriayo. No nalawa ti teritoriayo, mabalin nga ikeddeng dagiti panglakayen a mangibatikayo iti tract kadagidiay pagtaengan nga awan dagiti bumalayna iti damo nga isasarungkaryo. Diyo liplipatan ti mangted iti kopia kadagiti kaarruba, kakabagian, katrabahuan, kaeskuelaan, ken dadduma pay a masansan a makasarsaritayo. Nalabit kayatyo nga iyurnos ti ag-auxiliary pioneer iti Oktubre ken Nobiembre. Adda kadi anak wenno iyad-adalanyo iti Biblia a rumangrang-ay iti naespirituan ken nalabit kualipikadon a makiraman iti panagiwaras kas di bautisado nga agibumbunannag? No adda, ipakaammo dayta kadagiti panglakayen.
4 No Ania ti Ibaga: Ababa koma ti presentasionyo tapno ad-adu ti pakairanudanyo iti mensahe. Iyimtuod laeng kadagiti bumalay ti maysa kadagiti innem a saludsod iti akkub sa ipakita kadakuada ti sungbat iti tract. Mangted daytoy iti gundaway para iti amin nga agibumbunannag nga agusar iti presentasion a mayanatup iti teritoria. No adda mangipakita iti interes, laglagipenyo nga ilista ken sarungkaran. Kadagiti ngudo ti lawas bayat ti panagiwaras, mabalin nga itukon dagiti agdama a magasin a kadua ti tract. Kalpasan nga agpatingga ti panagiwaras inton Nobiembre 16, itukontayto ti libro nga Isursuro ti Biblia. No addada nabati a tract, mausar dagita iti tay-ak kas kadagiti gagangay a tract.
5 Mangirugi iti Panangyadal iti Biblia: Daytoy a tract ket nairanta a tumulong kadatayo a mangirugi kadagiti panangyadal iti Biblia. No sarungkaranyo ti maysa a nangipakita iti interes, mabalinyo nga isaludsod no ania a kinapudno manipud iti Biblia ti nangliwliwa ken nangyeg bang-ar kenkuana. Ipakita kenkuana ti makinlikud a panid ti tract a nakadakamatan ti urnostayo a panangyadal iti Biblia, ken ipaayan iti kopia ti libro nga Isursuro ti Biblia. No adda gundaway, usigenyo iti apagbiit ti maysa wenno dua a parapo iti kapitulo a makailawlawag iti ad-adu pay maipapan iti topiko a pinilina.
6 Birbiroken ni Jehova dagidiay agbalinto a managdaydayawna “buyogen ti espiritu ken kinapudno.” (Juan 4:23) Amintayo koma ngarud ket makiraman iti daytoy nga espesial a kampania a tumulong kadagiti sabsabali tapno maammuanda ti kinapudno!