“Ti Baro a Milenio—Ania a Masakbayan ti Agur-uray Kenka?”
1 Kasta ti pampanunoten ti tattao iti intero a lubong. Nupay adu ti nagapuanan ti sangatauan iti sinigsiglo, desperado dagiti tattao gapu ta agraraira latta dagiti kangrunaan a parikut a mangparparigat kadagiti tattao iti rinibu a tawenen. (Job 14:1; Sal. 90:10) Pakasarakan ngay ti sangatauan iti solusion?
2 Iti bulan ti Oktubre ken Nobiembre, addaantayo iti naisangsangayan a gundaway a mangipaay iti sungbat dayta a saludsod kadagiti kaarrubatayo. Kasano? Babaen ti panangiwaras iti Kingdom News No. 36. Napauluan iti “Ti Baro a Milenio—Ania a Masakbayan ti Agur-uray Kenka?” Iti umuna a kagudua ti Oktubre, itukontayo ti magasin a Pagwanawanan ken Agriingkayo! Sa manipud Lunes, Oktubre 16, agingga iti Biernes, Nobiembre 17, makiramantayo iti nasaknap a panangiwaras iti Kingdom News No. 36. Iti daytoy a kampania, ipamaysatayo nga ipaima ti Kingdom News No. 36 iti lawlawasna. Kadagiti ngudo ti lawas, itukontayo dayta agraman dagiti agdama a magasin.
3 Naan-anayto Kadi a Makiramankayo? Dagiti panglakayen, ministerial nga adipen, ken payunir ti mangyun-una iti daytoy a kampania, yantangay isuda ti mangidadaulo iti trabaho. Binalbaliwan ti adu nga agibumbunannag ti kasasaadda tapno ag-auxiliary pioneer-da bayat iti maysa wenno iti dua a bulan ti kampania. Implano ti dadduma ti mangbusbos iti ad-adu nga oras iti ministerio ngem iti gagangay.
4 Makatulong dagiti konduktor ti Panagadal iti Libro ti Kongregasion a mangparegta iti tunggal kameng ti grupoda a makiraman a naan-anay iti panangiwaras iti Kingdom News No. 36. Nalabit adda dagiti agibumbunannag a nagbalin a di aktibo iti trabaho a panangasaba. Nasken a sarungkaran dagiti panglakayen dagitoy a kakabsat tapno maammuan no kasano a matulongan ida. Mabalin a mayurnos a kuyogen a mangasaba ti maysa nga aduan kapadasan nga agibumbunannag ti asinoman a di aktibo kabayatan dagita a bulan. Mabalin a ti simple a panangipresentar iti Kingdom News No. 36 ti makatulong tapno agbalin nga aktibo manen dagitoy nga agibumbunannag.
5 Nasayaat met a gundaway daytoy tapno makiraman iti panangasaba dagiti mayad-adalan iti Biblia a malmalpasen iti libro a Pannakaammo a makualipikar a kas di bautisado nga agibumbunannag. Uray dagiti ubbing mabalinda ti makiraman iti daytoy makaparagsak a trabaho.
6 Masapul laeng ti simple a presentasion. Mabalinyo a kunaen:
◼ “Nagboluntarioak a tumulong iti panangiwaras iti daytoy napateg unay a mensahe iti tunggal pamilia ditoy [nagan ti siudad wenno pagilian]. Daytoy ti kopiayo. Pangngaasiyo ta basaenyo.” Nalabit nasaysayaat no dikay agus-usar iti bag no mangiwaraskayo iti Kingdom News No. 36.
7 Nasayaat ti Pannakaiplanona a Taripnong Sakbay ti Panangasaba: Masapul a siguraduen dagiti panglakayen a kombiniente ken praktikal dagiti nayurnos a panangasaba. Nangnangruna a rumbeng a siguraduen ti manangaywan iti serbisio nga adda nawadwad a teritoria iti binalaybalay ken lugar ti negosio tapno maaddaan ti amin iti gundaway a makiraman a naan-anay iti trabaho. Aginggat’ mabalin, mayurnos koma dagiti taripnong sakbay ti panangasaba iti lawlawasna, kadagiti ngudo ti lawas, ken iti rabii. Mabalin a mayurnos ti panagtataripnong iti malem para kadagiti estudiante, trabahador a nabatangbatang ti oras ti trabahoda, ken dadduma pay.
8 No Ania ti Aramiden Kadagidiay Awan Kadagiti Pagtaenganda: Kayattayo a makasarita ti ad-adu a bumalay no mabalbalin. No diyo madanon ti bumalay, ilistayo ti address ket agsublikayo iti sabali nga oras ken aldaw. No iti maudi a lawas ti kampania ket diyo pay la nadanon dagitoy a bumalay, mabalinyo ti mangibati iti kopia ti Kingdom News No. 36 para kadakuada iti lugar a di nalayang kadagiti lumablabas. No nasulinek ti teritoria ken no adu unay ti teritoria a saan a maileppas kabayatan ti kampania, mabalin nga ibilin dagiti panglakayen kadagiti kakabsat a mangibatida iti kopia ti Kingdom News No. 36 kadagiti pagtaengan nga awan ti madanon a tao uray no damo pay la dayta nga isasarungkar.
9 Okupadotayo Koma! Ikagumaan koma dagiti kongregasion a mawanas ti teritoriada sakbay a malpas ti kampania inton Nobiembre 17. No nalawa ti teritoriayo, mabalin nga agbukbukod a mangasaba ti dadduma nga agibumbunannag no la ket ta praktikal ken natalged daytoy. Iti daytoy nga urnos, ad-adu ti madanon a maikari a tattao. Siguraduenyo nga irekord ti amin a nasarakan nga interesado.
10 Nasken a pattapattaen dagiti panglakayen no mano ti kanayonan a magasin a kasapulan ti kongregasion sada agpedido. Saan a kasapulan nga agpedido iti Kingdom News No. 36, yantangay addan naipatulod iti kada kongregasion. No dakkel ti teritoria, 250 a kopia ti maited nga iwaras ti tunggal special, regular, ken auxiliary pioneer, idinto ta 50 a kopia ti maited iti kada agibumbunannag. Nakasagana ken magagarankay met laeng kadi nga agbalin nga okupado iti daytoy naisangsangayan nga aktibidad? Anian a pribilehiotayo a mangipakaammo iti amin a kaarrubatayo ti maipapan iti inkari ti Dios iti asidegen a masanguanan!